Acts 3

¹Umunsi umwe saa cyenda, ari cyo gihe cyo gusenga, Petero na Yohani bagiye mu rugo rw'Ingoro y'Imana.

²Hariho umuntu wavutse ari ikirema bahekaga buri munsi, bakamushyira ku irembo ry'Ingoro y'Imana ryitwa “Irembo ry'Igikundiro”, kugira ngo asabirize amafaranga abazaga mu rugo rw'Ingoro.

³Ngo abone Petero na Yohani bagiye kwinjira mu rugo rw'Ingoro na bo arabasaba.

⁴Petero na Yohani baramutumbira, maze Petero aramubwira ati: “Ngaho turebe!”

⁵Nuko uwo mugabo agumya kubahanga amaso agira ngo hari icyo bamuha.

⁶Petero aramubwira ati: “Nta mafaranga mfite, yaba ifeza yaba izahabu, ariko icyo mfite ndakiguha. Mu izina rya Yezu Kristo w'i Nazareti, ndagutegetse nti: ‘Haguruka maze ugende!’ ”

⁷Nuko amufata ukuboko kw'iburyo aramuhagurutsa. Muri ako kanya, ibirenge bye n'ubugombambari birakomera.

⁸Nuko arabaduka arahagarara, atangira kugenda. Yinjirana na bo mu rugo rw'Ingoro y'Imana atambuka, yitera hejuru asingiza Imana.

⁹Rubanda rwose babonye agenda kandi asingiza Imana,

¹⁰bamenya ko ari wa wundi wajyaga asabiriza, yicaye ku irembo ry'Ingoro y'Imana bita iry'Igikundiro, barumirwa bayoberwa icyamubayeho.

¹¹Igihe uwo muntu yanze kuvirira Petero na Yohani, rubanda rwose barashika babasanga ku ibaraza ryitwa irya Salomo, baratangara cyane.

¹²Petero abibonye arababaza ati: “Bisiraheli, ni iki gitumye muduhanga amaso, nk'aho ari ububasha bwacu cyangwa se kubaha Imana kwacu byatumye uyu muntu ashobora gutambuka?

¹³Imana ya Aburahamu n'Imana ya Izaki n'Imana ya Yakobo, Imana ya ba sogokuruza yahaye ikuzo Umugaragu wayo Yezu, uwo mwebwe mwatanze mukamwihakanira imbere ya Pilato, kandi we yari yiyemeje kumurekura.

¹⁴Mwihakanye uwo Muziranenge akaba n'Intungane, maze mu cyimbo cye musaba ko bababohorera umwicanyi.

¹⁵Nuko uwo Mugaba w'ubugingo we muramwica, ariko Imana iramuzura. Ni twe bagabo bo kubihamya.

¹⁶Uyu muntu mureba kandi muzi yakijijwe ubumuga kubera kwizera ubushobozi bwa Yezu. Ubushobozi bwa Yezu n'ukwizera gukomoka kuri we, ni byo byamuhaye kuba muzima rwose mwese mubireba.

¹⁷“None rero bavandimwe, nzi yuko mwebwe n'abategetsi banyu mwishe Yezu mutazi icyo mukora.

¹⁸Nyamara Imana ni yo yatumye biba bityo, ikurikije uko yari yaratumye abahanuzi bose kuvuga mbere ko Kristo agomba kubabazwa.

¹⁹Nuko rero nimwisubireho, mugarukire Imana kugira ngo ibyaha byanyu bihanagurwe,

²⁰habeho ibihe byo guhemburwa bituruka kuri Nyagasani, kandi aboherereze Yezu ari we Kristo yabatoranyirije mbere.

²¹Yezu uwo agomba kuguma mu ijuru kugeza igihe Imana izahindura byose bishya, nk'uko yabivuze kera kose itumye abahanuzi bayo.

²²Musa yaravuze ati: ‘Nyagasani Imana yanyu azabatumaho umuhanuzi umeze nkanjye ukomoka muri mwe, muzumvire ibyo azababwira byose.

²³Umuntu wese utazumvira uwo muhanuzi azarimburwe.’

²⁴Kandi abahanuzi bose uhereye kuri Samweli no ku bamukurikiye, igihe cyose bahanuraga bagushaga ku by'iyi minsi turimo.

²⁵Ni mwe mwarazwe ibyavuzwe n'abahanuzi n'ibyo Imana yasezeranye na ba sokuruza, igihe yabwiraga Aburahamu iti: ‘Amahanga yose yo ku isi azaherwa umugisha mu rubyaro rwawe.’

²⁶Noneho igihe Imana yahagurutsaga uwo Mugaragu wayo, ni mwebwe yabanje kumutumaho kugira ngo abaheshe umugisha, bityo umuntu wese muri mwe azinukwe ibibi yakoze.”