Colossians 4

¹Namwe abafite abo mukoresha mubahe ibibakwiriye n'ibibatunganiye, mwibuka ko namwe mufite Shobuja mu ijuru.

²Mwese mugumye gusenga mubihugukiye, mushimira Imana.

³Natwe mudusabire kugira ngo Imana itwugururire amarembo, idushoboze kujya kuvuga ubutumwa bwayo ari bwo banga ryerekeye Kristo, ni ryo bampōye banshyira kuri iyi ngoyi.

⁴Munsabire ngo mvuge ibyaryo uko bikwiye, mbishyire ku mugaragaro.

⁵Murajye mwitondera uko mwifata ku batazi Kristo, mukoreshe neza igihe mufite ngo mubabwire ibye.

⁶Muhorane imvugo y'ineza ifitiye abantu akamaro, bityo muzamenya uko musubiza umuntu wese ugize icyo ababaza.

⁷Tikiko umuvandimwe nkunda cyane azababwira ibyanjye byose. Ni umufasha wanjye w'indahemuka, dufatanyije umurimo wa Nyagasani.

⁸Nguwo ndamuboherereje ngo abamenyeshe uko tumerewe, maze abakomeze.

⁹Azanye na Onezimo ukomoka muri mwe, na we ni umuvandimwe nkunda cyane w'indahemuka. Bazabatekerereza iby'ino byose.

¹⁰Arisitariko dufunganywe, na Mariko mwene se wabo wa Barinaba ngo mutahe. Mwabwiwe ibyerekeye Mariko, nagera iwanyu muzamufate neza.

¹¹Yezu witwa Yusito na we arabatashya. Mu Bayahudi bemeye Kristo, abo ni bo bonyine dufatanyije umurimo w'ibyerekeye ubwami bw'Imana kandi baramfashije cyane.

¹²Epafura ukomoka muri mwe arabatashya, na we ni umugaragu wa Kristo Yezu. Iteka ashishikarira kubasabira kugira ngo mukomere mube indakemwa, mumenye mudashidikanya ibyo Imana ishaka byose.

¹³Ndahamya rwose yuko abavunikira, mwebwe n'ab'i Lawodiseya n'ab'i Hiyerapoli.

¹⁴Umuganga Luka dukunda cyane, hamwe na Dema barabatashya.

¹⁵Mundamukirize abavandimwe b'i Lawodiseya na Nimfa, n'itorero rya Kristo rikoranira iwe.

¹⁶Nimumara gusoma uru rwandiko, muzarwoherereze ab'itorero rya Kristo ry'i Lawodiseya, kugira ngo na bo barusome, namwe muzasome urwo nandikiye ab'i Lawodiseya nirubageraho.

¹⁷Muzabwire Arikipo muti: “Itondere wa murimo wahawe gukorera Nyagasani, uzawurangize neza.”

¹⁸Jyewe Pawulo ndabatashya. Ibi ni jye ubyiyandikiye n'ukwanjye kuboko. Mujye mwibuka ingoyi ndiho. Nyagasani nagumye kubagirira ubuntu.