Galatians 2

¹Nyuma y'imyaka cumi n'ine nsubira i Yeruzalemu hamwe na Barinaba, na Tito turamujyana.

²Icyanteye kujyayo ni uko Imana yari yabimpishuriye. Nuko nihererana n'abitwaga abayobozi baho, mbasobanurira ibyerekeye Ubutumwa bwiza ngeza ku batari Abayahudi. Kwari ukugira ngo ntaba nararuhiye ubusa cyangwa ngo ejo ntazaruhira ubundi.

³Yewe na Tito wamperekeje utari Umuyahudi, habe ngo ahatirwe gukebwa.

⁴Icyakora aba yarakebwe bitewe na bamwe biyita abavandimwe, bacengeye muri twe rwihishwa. Abo bari bagendereye kugenzura ukwishyira ukizana dufite muri Kristo Yezu, kugira ngo badushyire mu buja.

⁵Nta bwo twigeze tubabererekera na gato, kugira ngo ukuri k'Ubutumwa bwiza kugume muri mwe kudahinyutse.

⁶Ku byerekeye ba bandi bitwa abayobozi – icyo bari cyo nta cyo bindebaho, kuko Imana itita ku busumbane bw'abantu – abo ngabo nta kintu gishya bantegetse.

⁷Ahubwo na bo babonye ko Imana yanshinze umurimo wo kugeza Ubutumwa bwiza ku batari Abayahudi, nk'uko yawushinze Petero mu Bayahudi.

⁸Koko Imana yampaye ububasha bwo kuba Intumwa yayo ku batari Abayahudi, kimwe n'uko yabuhaye Petero ngo abe Intumwa ku Bayahudi.

⁹Yakobo na Petero na Yohani bitwa inkingi z'Umuryango w'Imana, bamaze kuzirikana ubwo buntu Imana yangiriye, jye na Barinaba badukora mu ntoki. Icyo kiba ikimenyetso cy'ubufatanye, kugira ngo twe tujye mu batari Abayahudi, naho bo bagume mu Bayahudi.

¹⁰Icyo badusabye gusa ni ukwibuka abakene kandi nanjye ibyo nashishikariye kubikora.

¹¹Icyakora ubwo Petero yazaga Antiyokiya namurwanyije ku mugaragaro, kuko yari yigayishije.

¹²Mbere y'uko abantu baturutse kwa Yakobo bahagera, Petero yasangiraga n'abatari Abayahudi. Aho baziye yigira nyoni nyinshi, areka gukomeza gusangira na bo kuko yatinyaga abavugaga ko gukebwa ari ngombwa.

¹³N'abandi Bayahudi batangira kugenza nka we, ku buryo na Barinaba yakurikije urwo rugero rw'uburyarya.

¹⁴Nuko mbonye ko badakurikiza ukuri k'Ubutumwa bwiza, ni ko kubwira Petero mu ruhame nti: “Niba wowe w'Umuyahudi warifataga nk'abatari bo ugata umurongo w'idini ya kiyahudi, ubu se bishoboka bite ko wahatira abatari Abayahudi kwifata nk'Abayahudi?”

¹⁵Twebwe turi Abayahudi kavukire, ntituri “abavamahanga b'abanyabyaha.”

¹⁶Nyamara tuzi ko umuntu atagirwa intungane no gukora ibyategetswe n'Amategeko, ahubwo agirwa intungane imbere y'Imana no kwemera Kristo Yezu. Ndetse natwe twemeye Kristo Yezu kugira ngo tugirwe intungane tubitewe no kumwemera, tutabitewe no gukora ibyategetswe n'Amategeko. Erega nta muntu ugirwa intungane abitewe no gukora ibyategetswe n'Amategeko!

¹⁷Ariko rero niba dushaka kugirwa intungane tubikesha Kristo, kandi tukaboneka ko natwe turi abanyabyaha, byaba se bivuga ko Kristo ari we utuma abantu bakora ibyaha? Ntibikabeho!

¹⁸Nanjye nsubiye kugengwa n'Amategeko, byasa no kongera kubaka ibyo namaze gusenya, bityo na none nkaba nigize uwica amategeko.

¹⁹Ku byerekeye kugengwa n'Amategeko, jye narapfuye mu ruhande rw'Amategeko, kugira ngo noneho mbeho ngengwa n'Imana.

²⁰Nabambanywe na Kristo ku musaraba ku buryo atari jye ukiriho, ahubwo ari Kristo uriho muri jye. Imibereho yanjye yo muri iki gihe nyikesha kwizera Umwana w'Imana, wankunze akampfira.

²¹Sinirengagiza ubuntu bw'Imana, kuko niba ari Amategeko ahesha umuntu gutunganira Imana, noneho urupfu rwa Kristo rwaba rubaye impfabusa.