Galatians 4

¹Icyo nshaka kuvuga ni uko ugenewe guhabwa umunani mu bya se, igihe akiri umwana nta cyo aba arusha umugaragu w'inkoreragahato, nubwo ari we uzaba umutware wa byose.

²Ahubwo agumya kugengwa n'abamurera n'abashinzwe ibintu bye, kugeza igihe se yategetse.

³Natwe igihe twari nk'abana, burya twakoreshwaga agahato n'ibinyabutware bigenga iyi si.

⁴Ariko igihe cyagenwe kigeze Imana yohereje Umwana wayo, abyarwa n'umugore kandi avuka agengwa n'Amategeko,

⁵kugira ngo acungure abari bakigengwa n'Amategeko, bityo tugirwe abana b'Imana.

⁶Koko muri abana bayo ndetse Imana yashyize mu mitima yacu Mwuka w'Umwana wayo, utuma tuyitakambira tuti: “Aba!” ni ukuvuga ngo: “Data!”

⁷Bityo wowe ntukiri inkoreragahato ahubwo uri umwana w'Imana, kandi ubwo uri umwana wayo iguteganyirije umunani yageneye abana bayo.

⁸Kera mutaramenya Imana, mwari inkoreragahato z'ibyitwa “imana” bitari Imana nyakuri.

⁹None ubwo mumaze kumenya Imana ndetse ikirutaho na yo ikaba ibazi, bishoboka bite ko mwashaka gusubira mu buja bwa bya binyabutware by'ibitindi bitagira icyo bishoboye?

¹⁰Musigaye muziririza iminsi runaka kimwe n'amezi n'ibihe n'imyaka!

¹¹Mfite impungenge ku bwanyu ko ahari ibyo nabakoreye byose naba naravunikiye ubusa.

¹²Bavandimwe, ndabinginze ngo mumere nkanjye nk'uko nanjye nigize nkamwe. Burya nta kibi mwigeze munkorera.

¹³Muzi ko icyatumye bwa mbere mbona uburyo bwo kubagezaho Ubutumwa bwiza ari uko nari ndwaye.

¹⁴Iyo ndwara yanjye yababereye ikigeragezo, ariko ntimwigeze munsuzugura cyangwa ngo mbatere ishozi. Ahubwo mwanyakiriye nk'aho ndi umumarayika utumwe n'Imana, ndetse mwanyakiriye nk'aho ndi Yezu Kristo ubwe.

¹⁵None se bwa bwuzu mwari mufite bwagiye he? Koko ndahamya ko iyo biba ibishoboka, muba mwarinogoyemo amaso mukayanyihera.

¹⁶Mbese ubu mpindutse umwanzi wanyu kuko mbabwiza ukuri?

¹⁷Ba bantu babafitiye ishyaka ariko si ishyaka ryiza, icyo bashaka ni ukudutandukanya kugira ngo abe ari bo mugirira ishyaka.

¹⁸Si bibi kugira ishyaka iyo ari ishyaka ryo gukora ibyiza, mukarigira igihe cyose atari igihe ndi muri mwe gusa.

¹⁹Bana banjye, nk'uko umubyeyi uri ku nda ababazwa n'ibise, ni ko nanjye ibyanyu bimbabaza kugeza igihe Kristo agaragariye muri mwe.

²⁰Iyaba nari nshoboye kuba hamwe namwe ubu, ngo nongere mbibabwire ku bundi buryo. Ibyanyu bimpagaritse umutima!

²¹Yemwe abashaka kugengwa n'Amategeko, cyo nimumbwire. Mbese ntimwumva icyo Amategeko avuga?

²²Ibyanditswe bivuga ko Aburahamu yari afite abahungu babiri, umwe yavutse ku muja we Hagari, undi ku mugore we Sara utigeze mu buja.

²³Uw'umugore w'umuja yavutse ku buryo busanzwe, naho uw'umugore utigeze mu buja we yavutse bishingiye ku Isezerano ry'Imana.

²⁴Ibyo ni ikigereranyo. Abo bagore bombi bagereranywa n'Amasezerano abiri Imana yagiranye n'abantu bayo. Rimwe muri yo ryatangiwe ku musozi wa Sinayi ribyara abana b'ubuja, ni ryo rigereranywa na Hagari.

²⁵Hagari we ashushanya wa musozi wa Sinayi wo muri Arabiya, kandi akaba agereranywa na Yeruzalemu isanzwe iri mu buja, yo n'abayituye bose.

²⁶Naho aba Yeruzalemu yo mu ijuru barishyira bakizana, kandi ni yo mama utubyara.

²⁷Ni na ko Ibyanditswe bivuga biti: “Ishime mugore w'ingumba, wowe utigeze ubyara! Vuga cyane urangurure ijwi, wowe utigeze kuribwa n'ibise! Kuko umugore w'intabwa azagira abana benshi, azagira abana kurusha uw'inkundwakazi.”

²⁸Bavandimwe, nk'uko Izaki yavutse ni ko namwe mwavutse bishingiye ku Isezerano ry'Imana.

²⁹Nk'uko byabaye icyo gihe, umwana wavutse ku buryo busanzwe agatoteza uwabyawe ku bwa Mwuka, na n'ubu ni ko biri.

³⁰Ariko se Ibyanditswe bibivugaho iki? Biravuga biti: “Irukana uriya muja n'umuhungu we! Umuhungu w'umuja ntagomba kugabana umunani n'uw'umugore utigeze aba umuja.”

³¹Nuko rero bavandimwe, twe ntituri abana b'umuja, ahubwo turi ab'umugore utigeze mu buja.