Galatians 6

¹Bavandimwe, niba umuntu afashwe acumura, mwebwe abayoborwa na Mwuka mumugarure ku murongo, ariko mubikorane ubugwaneza. Erega nawe ubwawe wirinde uwo uri we wese, kuko nawe washobora kugwa mu bishuko.

²Mwakirane ibibaremereye, bityo muzaba mwumviye itegeko rya Kristo byuzuye.

³Umuntu wibwira ko akomeye kandi nta cyo ari cyo aba yibeshya.

⁴Ahubwo umuntu wese niyigenzure ubwe mu byo akora. Niba hari icyo afite kwirata, agikore ku giti cye atigereranya ku bandi,

⁵kuko buri wese azibarizwa ibyo azaba yarakoze.

⁶Uwigishwa Ijambo ry'Imana ajye asangira ibyo atunze byose n'urimwigisha.

⁷Ntimukibeshye, Imana ntikinishwa. Imbuto umuntu abiba ni zo azasarura.

⁸Ubiba imbuto z'ibishimisha kamere ye, azasarura urupfu. Naho ubiba imbuto z'ibishimisha Mwuka w'Imana, azasarura ubugingo buhoraho.

⁹Ntitukarambirwe gukora ibyiza, kuko nitudacogora tuzasarura igihe kigeze.

¹⁰Nuko rero igihe cyose tubonye uburyo tujye tugirira neza abantu bose, ariko cyane cyane abo dusangira kwemera Kristo.

¹¹Dore izi nyuguti nini ni jye ubwanjye uziyandikiye n'ukwanjye kuboko!

¹²Abashaka gushimwa n'abantu ku mpamvu z'imigenzo igaragara ni bo babahatira gukebwa. Intego yabo ni imwe nsa: ni ukugira ngo badatotezwa bazira umusaraba wa Kristo.

¹³Nyamara kandi abo bantu nubwo bakebwa, ubwabo ntibumvira Amategeko. Barashaka gusa ko mukebwa kugira ngo babone uko birata uwo muhango ukorewe imibiri yanyu.

¹⁴Naho jye nta kindi ngomba kwiratana kitari umusaraba w'Umwami wacu Yezu Kristo. Uwo musaraba ni wo utuma isi imbera nk'iwubambweho, nanjye nkabera isi nk'uwubambweho.

¹⁵Ku bwanjye gukebwa cyangwa kudakebwa nta cyo bimaze, igifite akamaro ni uko umuntu yaremwa ukundi gushya.

¹⁶Abagenza batyo bakurikiza uwo mugambi, ndetse ab'umuryango wose w'Imana, Imana nibahe amahoro n'imbabazi.

¹⁷Ahasigaye ntihakagire uwongera kundushya, kuko inkovu mfite ku mubiri ziranga ko ndi uwa Yezu.

¹⁸Bavandimwe, Umwami wacu Yezu Kristo nagumye kubagirira ubuntu. Amina.