John 1

¹Mbere ya byose uwitwa Jambo yari ariho. Jambo uwo yari kumwe n'Imana kandi yari Imana.

²Yari kumwe n'Imana mbere ya byose.

³Ibintu byose byabayeho kubera we, nta na kimwe cyabayeho kitabimukesha.

⁴Muri we harimo ubugingo kandi ubwo bugingo bwari urumuri rw'abantu.

⁵Nuko urwo rumuri ruboneshereza mu mwijima, umwijima ntiwarutsinda.

⁶Habayeho umuntu watumwe n'Imana akitwa Yohani.

⁷Yaje ari umugabo wo guhamya iby'urwo rumuri, kugira ngo atume bose barwemera.

⁸Si we wari urumuri ahubwo yazanywe no guhamya ibyarwo.

⁹Jambo ni we rumuri nyakuri rwaje ku isi, maze rumurikira umuntu wese.

¹⁰Yari ku isi kandi isi yabayeho kubera we, nyamara isi ntiyamumenya.

¹¹Yaje mu bye ariko abe ntibamwakira.

¹²Nyamara abamwakiriye bose bakemera uwo ari we, yabahaye ubushobozi bwo kuba abana b'Imana.

¹³Kuba abana b'Imana ntibiva ku buryo busanzwe bwo kubyara, cyangwa ngo biterwe n'icyifuzo cy'umubiri cyangwa n'ubushake bw'umuntu, ahubwo babyarwa n'Imana.

¹⁴Jambo yabaye umuntu aba hagati muri twe, yuzuye ubuntu n'ukuri. Nuko tubona ikuzo rye, ari ryo kuzo Umwana w'ikinege akomora kuri Se.

¹⁵Yohani ahamya ibye ararangurura ati: “Nguyu uwo navugaga nti: ‘Uje nyuma yanjye aranduta kuko yahozeho mbere yanjye.’ ”

¹⁶Twese twahawe ku migisha ye isendereye, kandi tugirirwa ubuntu bugeretse ku bundi.

¹⁷Amategeko yanyujijwe kuri Musa, naho ubuntu n'ukuri byo byaje binyujijwe kuri Yezu Kristo.

¹⁸Nta muntu wigeze abona Imana, ahubwo Umwana w'ikinege uhorana na Se ni we wayimenyekanishije.

¹⁹Dore ibyo Yohani yahamije, ubwo Abayahudi b'i Yeruzalemu batumaga abatambyi n'Abalevi kumubaza bati: “Uri nde?”

²⁰Abasubiza atishisha aranaberurira ati “Si jye Kristo.”

²¹Nuko baramubaza bati: “None se uri nde? Ese uri Eliya?” Ati: “Sindi we.” Baramubaza ati: “Mbese uri wa Muhanuzi?” Ati: “Oya.”

²²Noneho baramubaza bati: “None se uri nde kugira ngo tubone icyo dusubiza abadutumye? Ese ibyawe ubivugaho iki?”

²³Arabasubiza ati: “Ndi urangururira ijwi mu butayu ati: ‘Nimuringanize inzira ya Nyagasani’, nk'uko umuhanuzi Ezayi yabivuze.”

²⁴Abari batumwe bari abo mu Bafarizayi.

²⁵Nuko baramubaza bati: “Kuki ubatiza niba utari Kristo cyangwa Eliya, cyangwa wa Muhanuzi?”

²⁶Yohani arabasubiza ati: “Jyewe mbatirisha amazi, nyamara muri mwe hari uwo mutazi.

²⁷Yaje nyuma yanjye, ariko ntibinkwiriye no gupfundura agashumi k'urukweto rwe.”

²⁸Ibyo byabereye i Betaniya, iburasirazuba bw'uruzi rwa Yorodani aho Yohani yabatirizaga.

²⁹Bukeye Yohani abona Yezu aje amusanga, maze aravuga ati: “Dore Umwana w'intama w'Imana ukuraho ibyaha by'abantu bo ku isi!

³⁰Uyu ni we navugaga nti: ‘Nyuma yanjye haje umuntu unduta, kuko yahozeho mbere yanjye.’

³¹Nanjye mbere sinari nzi uwo ari we, ariko icyatumye nza mbatirisha amazi kwari ukugira ngo agaragarizwe Abisiraheli.”

³²Nuko Yohani arahamya ati: “Nabonye Mwuka w'Imana amanuka ava mu ijuru asa n'inuma, maze aguma kuri we.

³³Jye sinari nzi uwo ari we, ariko Imana yantumye kubatirisha amazi yari yarambwiye iti: ‘Uwo uzabona Mwuka amumanukiyeho maze akamugumaho, ni we ubatirisha Mwuka Muziranenge.’

³⁴Narabyiboneye none ndahamya ko uwo ari we Mwana w'Imana.”

³⁵Bukeye Yohani akaba ahagararanye na babiri mu bigishwa be.

³⁶Abonye Yezu ahita aravuga ati: “Dore Umwana w'intama w'Imana!”

³⁷Bumvise avuga atyo, abo bigishwa bombi bahita bakurikira Yezu.

³⁸Yezu arahindukira abona bamukurikiye, arababaza ati: “Murashaka iki?” Baramusubiza bati: “Rabi (risobanurwa ngo ‘Mwigisha’), ucumbitse he?”

³⁹Arabasubiza ati: “Nimuze muharebe!” Nuko baragenda babona aho yari acumbitse, maze uwo munsi bagumana na we. Hari mu masaa kumi.

⁴⁰Andereya uva inda imwe na Simoni Petero, yari umwe muri babiri bumvise ibyo Yohani avuze maze bagakurikira Yezu.

⁴¹Uwo abanza gushaka umuvandimwe we Simoni, amubonye aramubwira ati: “Twabonye Mesiya” (risobanurwa ngo “Kristo”),

⁴²maze amugeza kuri Yezu. Yezu amwitegereje aravuga ati: “Uri Simoni mwene Yohani, ariko uzitwa Kefa.” Kefa risobanurwa ngo “Petero”.

⁴³Bukeye Yezu yiyemeza kujya muri Galileya, ahura na Filipo aramubwira ati: “Nkurikira!”

⁴⁴Filipo yari uw'i Betsayida, iwabo wa Andereya na Petero.

⁴⁵Filipo abona Natanayeli aramubwira ati: “Twabonye wa muntu uvugwa mu Mategeko yanditswe na Musa no mu byanditswe n'abahanuzi. Uwo ni Yezu mwene Yozefu w'i Nazareti.”

⁴⁶Nuko Natanayeli aramubaza ati: “Mbese hari ikintu cyiza cyakomoka i Nazareti?” Filipo aramusubiza ati: “Ngwino urebe!”

⁴⁷Yezu abonye Natanayeli aje amusanga aravuga ati: “Dore Umwisiraheli nyakuri utagira uburiganya.”

⁴⁸Natanayeli aramubaza ati: “Wamenye ute?” Yezu aramusubiza ati: “Filipo ataraguhamagara, igihe wari munsi y'igiti cy'umutini nari nakubonye.”

⁴⁹Natanayeli aramubwira ati: “Mwigisha, koko ni wowe Mwana w'Imana, ni wowe Mwami w'Abisiraheli.”

⁵⁰Yezu ati: “Mbese unyemejwe n'uko nkubwiye nti ‘Nakubonye munsi y'umutini?’ Uzabona ibiruta ibyo.”

⁵¹Nuko yungamo ati: “Ndakubwira nkomeje ko uzabona ijuru rikingutse, ubone n'abamarayika b'Imana bazamukira kandi bamanukira ku Mwana w'umuntu.”