Luke 2

¹Muri icyo gihe umwami w'i Roma witwaga Ogusito, ategeka ko haba ibarura ry'abaturage bo mu bihugu byose byategekwaga n'Abanyaroma.

²Iryo barura rya mbere ryabaye igihe Kwirini yari umutegetsi w'intara ya Siriya.

³Nuko abantu bose bajya kwiyandikisha, buri wese mu mujyi w'iwabo.

⁴Yozefu na we ava mu mujyi wa Nazareti mu ntara ya Galileya agana mu ntara ya Yudeya, ajya mu mujyi wa Betelehemu aho umwami Dawidi yavukiye, kuko yari uwo mu nzu no mu muryango wa Dawidi.

⁵Yozefu ajya kwiyandikishayo ari kumwe na Mariya, umugeni yasabye wari utwite.

⁶Bakiri i Betelehemu araramukwa,

⁷abyara umuhungu we w'impfura amufubika utwenda tw'impinja, amuryamisha mu muvure kuko nta mwanya bari babonye mu icumbi.

⁸Muri ako karere hari abashumba barariraga intama zabo ku gasozi.

⁹Umumarayika wa Nyagasani arababonekera, ikuzo rirabagirana rya Nyagasani rirabagota, maze bagira ubwoba bwinshi.

¹⁰Uwo mumarayika ni ko kubabwira ati: “Mwitinya, dore mbazaniye inkuru nziza izashimisha cyane abantu bose.

¹¹Uyu munsi mu mujyi wa Dawidi havukiye Umukiza wanyu, ari we Kristo Nyagasani.

¹²Dore ikiza kumubabwira: muri busange uruhinja rufubitse utwenda ruryamye mu muvure.”

¹³Ako kanya hatunguka umutwe w'ingabo nyinshi zo mu ijuru, zisanga uwo mumarayika zisingiza Imana ziti:

¹⁴“Mu ijuru Imana nisingizwe, no ku isi abantu yishimira bagire amahoro.”

¹⁵Abamarayika bamaze gusubira mu ijuru, abashumba barabwirana bati: “Nimureke tujye i Betelehemu turebe ibyabaye, ibyo Nyagasani atumenyesheje.”

¹⁶Bagenda bihuta basangayo Mariya na Yozefu, n'uruhinja ruryamye mu muvure.

¹⁷Babonye uwo mwana batekerereza abantu ibyo bamubwiweho.

¹⁸Ababyumvise bose batangazwa cyane n'ibyo abo bashumba bababwiraga.

¹⁹Mariya we abika ibyo byose ku mutima, agahora abizirikana.

²⁰Nyuma abashumba basubirayo bagenda basingiza Imana, bayihimbaza kubera ibyo bumvise n'ibyo babonye byose, kuko babisanze uko bari babibwiwe.

²¹Iminsi umunani ishize, igihe cy'imihango yo gukeba umwana kigeze bamwita Yezu, ari ryo zina umumarayika yari yaravuze nyina atarasama inda.

²²Igihe kiragera ababyeyi be bubahiriza itegeko rya Musa ryerekeye guhumanurwa, bajyana umwana i Yeruzalemu kumumurikira Nyagasani,

²³nk'uko byanditswe mu Mategeko ya Nyagasani ngo “Umuhungu wese w'impfura azegurirwa Nyagasani.”

²⁴Bari bajyanywe kandi no gutura igitambo cy'ibyana by'inuma bibiri, cyangwa intungura ebyiri nk'uko byanditswe mu Mategeko ya Nyagasani.

²⁵I Yeruzalemu hari umuntu witwa Simeyoni, akaba umugabo utunganiye Imana kandi akayubaha. Yari ategereje Uzazanira Abisiraheli agakiza. Mwuka Muziranenge yari kumwe na we,

²⁶kandi yari yaramuhishuriye ko atazapfa atabanje kubona Kristo wa Nyagasani.

²⁷Nuko Simeyoni ajyanwa na Mwuka mu rugo rw'Ingoro y'Imana. Ababyeyi b'umwana Yezu bari bamujyanyeyo kugira ngo bamukorere imihango itegetswe.

²⁸Simeyoni aramuterura ashimira Imana ati:

²⁹“Databuja, washohoje ibyo wansezeranyije, none undeke nigendere amahoro.

³⁰Niboneye n'amaso yanjye agakiza kawe,

³¹ako wageneye amahanga yose.

³²Niboneye urumuri rwo kumurikira amahanga, niboneye n'ikuzo ry'ubwoko bwawe bw'Abisiraheli.”

³³Nuko se na nyina bagumya gutangazwa n'ibyo Simeyoni amuvuzeho.

³⁴Simeyoni abasabira umugisha kandi abwira Mariya nyina w'uwo mwana ati: “Dore uyu mwana azanywe no kugira ngo benshi mu Bisiraheli bagwe abandi babyuke. Imana izamugira intangamugabo benshi bazarwanya,

³⁵bityo ibitekerezo bihishwe mu mitima ya benshi bishyirwe ahagaragara. Nawe kandi bizakubera nk'inkota ikwahuranyije umutima.”

³⁶Hariho n'umuhanuzikazi witwaga Ana, umukobwa wa Fanuweli wo mu muryango wa Ashēri. Yari ageze mu za bukuru kandi yari yaramaranye n'umugabo we imyaka irindwi,

³⁷maze arapfakara. Amara imyaka mirongo inani n'ine adasiba mu rugo rw'Ingoro akorera Imana ijoro n'amanywa, yigomwa kurya kandi asenga.

³⁸Nuko uwo mwanya Ana araza, ashimira Imana kandi iby'uwo mwana abitekerereza abari bategereje bose ko Yeruzalemu ivanwa mu buja.

³⁹Ababyeyi ba Yezu barangije imihango yose yategetswe na Nyagasani, basubira mu mujyi wabo i Nazareti muri Galileya.

⁴⁰Umwana arakura arakomera, agwiza ubwenge kandi atona ku Mana.

⁴¹Buri mwaka ababyeyi ba Yezu bajyaga i Yeruzalemu, kugira ngo bizihize umunsi wa Pasika y'Abayahudi.

⁴²Yezu amaze imyaka cumi n'ibiri, ajyana na bo muri ibyo birori nk'uko bari basanzwe babijyamo.

⁴³Iminsi mikuru irangiye ababyeyi barataha, ariko umwana Yezu yisigarira i Yeruzalemu bo batabizi.

⁴⁴Bagenda urugendo rw'umunsi wose bakeka ko ari mu bantu bagendanaga. Hanyuma batangira kumushakira muri bene wabo no mu bandi bari baziranye.

⁴⁵Nuko batamubonye basubira i Yeruzalemu bamushaka.

⁴⁶Nyuma y'iminsi itatu bamubona mu rugo rw'Ingoro y'Imana, yicaye hamwe n'abigisha abateze amatwi, ababaza n'ibibazo.

⁴⁷Abamwumvaga bose batangazwaga n'ubwenge bwe n'ibyo yabasubizaga.

⁴⁸Ababyeyi be bamubonye barumirwa. Nyina aramubaza ati: “Mwana wanjye, watugenje ute? Dore jye na so ntaho tutagushakiye duhagaritse umutima!”

⁴⁹Arabasubiza ati: “Ariko se mwanshakiraga iki? Ese ntimwari muzi ko ngomba kuba mu Nzu ya Data?”

⁵⁰Nyamara ntibasobanukirwa icyo ababwiye.

⁵¹Hamyuma asubirana na bo i Nazareti, akomeza kubumvira. Nyina akajya azirikana ibyo byose.

⁵²Uko Yezu yakuraga ni ko yungukaga ubwenge kandi ashimwa n'Imana n'abantu.