Mark 13

¹Yezu asohotse mu rugo rw'Ingoro y'Imana, umwe mu bigishwa be aramubwira ati: “Mwigisha, irebere nawe! Mbega inzu yubakishijwe amabuye meza! Mbega imyubakire y'agatangaza!”

²Yezu aramusubiza ati: “Ntureba iyi nyubako y'agatangaza? Nta buye rizasigara rigeretse ku rindi, byose bizasenywa!”

³Nuko Yezu yicara ku Musozi w'Iminzenze ahateganye n'Ingoro y'Imana, ari kumwe na Petero na Yakobo na Yohani na Andereya biherereye. Baramubaza bati:

⁴“Tubwire igihe ibyo bizabera, n'ikimenyetso kizerekana ko igihe cyabyo byose kigeze.”

⁵Yezu afata ijambo ati: “Muramenye ntihazagire ubayobya,

⁶kuko hazaduka benshi biyita izina ryanjye bavuga bati: ‘Ni jye Kristo’, kandi bazayobya benshi.

⁷Nimwumva urusaku rw'intambara ziri hafi n'amakuru y'intambara za kure, ntibizabakure umutima. Ibyo bizagomba kuba ariko si byo herezo.

⁸Igihugu kizarwana n'ikindi, kandi umwami atere undi mwami. Hazaba imitingito y'isi hirya no hino, hatere n'inzara. Ibyo bizaba bimeze nk'imigendo ibanziriza ibise by'umugore.

⁹“Namwe ubwanyu, muramenye! Bazabajyana mu nkiko no mu nsengero zabo babakubite. Muzanahagarikwa imbere y'abami n'abandi bategetsi babampōra, bityo muzaba abagabo bo guhamya ibyanjye.

¹⁰Icyakora ni ngombwa ko Ubutumwa bwiza bubanza kwamamazwa mu bihugu byose.

¹¹Byongeye kandi igihe bazabarega mu nkiko, ntimuzahagarike umutima mbere y'igihe mwibaza ibyo muzireguza, kuko igihe nikigera muzahabwa icyo mukwiriye kuvuga. Si mwe muzaba mwivugira, ahubwo ni Mwuka Muziranenge uzavuga.

¹²Umuntu azicisha umuvandimwe we, umubyeyi na we azicisha umwana we, n'abana bazagomera ababyeyi babo babicishe.

¹³Muzangwa n'abantu bose babampōra, ariko uzihangana akageza ku munsi w'imperuka azarokoka.

¹⁴“Nimubona cya ‘Giterashozi kirimbuzi’ gihagaze aho kitagomba kuba – usoma ibi abyumve neza – icyo gihe abazaba bari muri Yudeya bazahungire mu misozi.

¹⁵Uzaba ari hejuru y'inzu, aramenye ntazamanuke ngo yinjire mu nzu agire icyo avanamo.

¹⁶N'uzaba ari mu murima ntazasubire imuhira gushaka umwitero we.

¹⁷Hagowe abazaba batwite cyangwa bonsa muri iyo minsi!

¹⁸Musabe Imana ibyo bye kuzaba mu mezi y'imbeho,

¹⁹kuko muri iyo minsi hazaba amakuba akabije atigeze abaho kuva isi yaremwa kugeza ubu, kandi atazongera kubaho ukundi.

²⁰Iyo Nyagasani atagabanya iyo minsi, nta wari kuzarokoka. Ariko kubera abo yitoranyirije, iyo minsi yarayigabanyije.

²¹Icyo gihe rero, nihagira ubabwira ati: ‘Dore nguyu Kristo’, cyangwa ati: ‘Nguriya’, ntimuzabyemere.

²²Hazaduka abiyita Kristo n'abiyita abahanuzi. Bazerekana ibimenyetso bakore n'ibitangaza, ku buryo bayobya abo Imana yitoranyirije bibaye ibishoboka.

²³Mwebwe rero murabe maso, ibyo byose mbaye mbibabwiye bitaraba.

²⁴“Ariko muri iyo minsi, nyuma y'iyo mibabaro, izuba rizijima n'ukwezi kwe kumurika,

²⁵inyenyeri zihanantuke ku ijuru, n'ibinyabubasha byo mu ijuru bihungabane.

²⁶Ubwo ni bwo abantu bazabona Umwana w'umuntu aje mu bicu, afite ububasha bwinshi n'ikuzo.

²⁷Ni bwo azatuma abamarayika gukoranya abo yitoranyirije babavane iburasirazuba n'iburengerazuba, mu majyaruguru no mu majyepfo, kugera aho isi n'ijuru bigarukira.

²⁸“Murebere ku giti cy'umutini kibabere urugero: iyo mubonye amashami yacyo atoshye akameraho ibibabi, mumenya ko impeshyi yegereje.

²⁹Ni na ko rero igihe muzabona ibyo nababwiye bibaye, muzamenya ko Umwana w'umuntu ari hafi, ndetse ko ageze ku irembo.

³⁰Ndababwira nkomeje ko ab'iki gihe batazashira ibyo byose bitabaye.

³¹Ijuru n'isi bizashira, ariko amagambo yanjye azahoraho.

³²“Icyakora, umunsi n'isaha bizaberaho ntawe ubizi, habe n'abamarayika bo mu ijuru cyangwa Umwana w'Imana, bizwi na Data wenyine.

³³Muramenye rero mube maso [musenge,] kuko mutazi igihe ibyo byose bizabera.

³⁴Byagereranywa n'umuntu wagiye mu rugendo agasigira abagaragu urugo rwe, buri wese amugeneye icyo agomba gukora, agategeka n'umurinzi w'irembo kuba maso.

³⁵Murabe maso rero kuko mutazi igihe nyir'urugo azahindukirira, haba mu matarama cyangwa mu gicuku, cyangwa mu nkoko cyangwa umuseke utambitse.

³⁶Muramenye atazabatungura agasanga musinziriye.

³⁷Ibyo mbabwiye ndabibwira bose: mube maso!”