Mark 16

¹Isabato ishize, Mariya w'i Magadala na Salome na Mariya nyina wa Yakobo, bagura amavuta ahumura neza kugira ngo bajye gusīga umurambo wa Yezu.

²Ku cyumweru ari wo munsi wa mbere, bagera ku mva izuba rirashe.

³Baza babazanya bati “Ni nde uri budukurire rya buye ku muryango w'imva?”

⁴Bitegereje basanga rya buye ryahirikiwe hirya, nubwo ryari rinini cyane.

⁵Binjiye mu mva babona umusore wicaye mu ruhande rw'iburyo, yambaye ikanzu yererana, maze bagwa mu kantu.

⁶Arababwira ati: “Mwitinya! Murashaka Yezu w'i Nazareti umwe babambye ku musaraba, ariko yazutse ntari hano. Dore n'aho bari bamushyize ngaha!

⁷Ahubwo nimugende mumenyeshe Petero n'abandi bigishwa, ko azabategerereza muri Galileya. Ni ho muzamusanga nk'uko yabibabwiye.”

⁸Nuko basohoka mu mva bahunga, bagenda bahinda umushyitsi bayobewe ibyo ari byo. Ntibagira uwo babibwira kubera ubwoba.

⁹[Muri icyo gitondo cy'umunsi wa mbere Yezu amaze kuzuka, abanza kwiyereka Mariya w'i Magadala, uwo yari yarameneshejemo ingabo ndwi za Satani.

¹⁰Mariya ajya kubimenyesha abari barabanye na Yezu, asanga bababaye cyane barira.

¹¹Ariko nubwo bumvise avuga ko Yezu ari muzima kandi ko yamwiboneye, ntibabyemera.

¹²Hanyuma y'ibyo Yezu abonekera abandi babiri mu bigishwa be bari mu nzira bajya mu cyaro, adasa uko yari asanzwe asa.

¹³Bagaruka kubimenyesha abasigaye, na bwo ntibabyemera.

¹⁴Hanyuma abonekera ba bandi cumi n'umwe bafungura. Abagayira kutamwizera kwabo no kugira imitima inangiye, kuko batemeye ibyo babwiwe n'abamubonye amaze kuzuka.

¹⁵Nuko arababwira ati: “Nimujye ku isi hose mwamamaze Ubutumwa bwiza mu bantu bose.

¹⁶Ubwemera akabatizwa azakizwa, ariko utabwemera azacirwaho iteka.

¹⁷Ibimenyetso bizaranga abazaba babwemeye ni ibi: mu izina ryanjye bazamenesha ingabo za Satani, kandi bazavuga indimi zindi nshya.

¹⁸Nibafata inzoka cyangwa nibanywa uburozi, nta cyo bizabatwara. Bazarambika ibiganza ku barwayi bakire.”

¹⁹Nyagasani Yezu amaze kubabwira ibyo ajyanwa mu ijuru, yicara ku ntebe ya cyami iburyo bw'Imana.

²⁰Nuko abigishwa be bajya hose bamamaza ibye. Nyagasani yabafashaga muri uwo murimo, atanga ibimenyetso bishyigikira ukuri kw'amagambo yabo.]