Matthew 13

¹Uwo munsi Yezu ava imuhira, ajya ku kiyaga yicara ku nkombe.

²Imbaga nyamwinshi y'abantu iramukikiza bituma ajya mu bwato yicaramo, abantu bose bahagarara ku nkombe.

³Nuko ababwira ibintu byinshi akoresheje imigani ati: “Habayeho umuntu wagiye kubiba,

⁴igihe abiba imbuto zimwe zigenda zigwa ku nzira, hanyuma inyoni ziraza zirazitoragura.

⁵Izindi zigwa ku gasi zihita zimera, kuko ubutaka ari bugufi.

⁶Izuba ricanye rirazotsa ziruma, kuko zidafite aho zishorera imizi.

⁷Izindi zigwa mu mahwa, amahwa azirengaho maze ziragwingira.

⁸Izindi zigwa mu butaka bwiza zirera, zimwe zera imbuto ijana, izindi mirongo itandatu, izindi mirongo itatu.

⁹Ufite amatwi yumva ngaho niyumve!”

¹⁰Nuko abigishwa be baramwegera baramubaza bati: “Ni iki gituma wigisha abantu ukoresheje imigani?”

¹¹Arabasubiza ati: “Mwebwe mwahawe kumenya amabanga y'ubwami bw'ijuru, nyamara bo ntibabihawe.

¹²Ufite azongererwa ndetse ahabwe byinshi, naho udafite na busa azakwa n'utwo yaririragaho.

¹³Naho abandi igituma mbabwira nkoresheje imigani ni uko bareba ariko ntibabone, batega amatwi ariko ntibumve kandi ntibasobanukirwe.

¹⁴Bityo biba nk'uko byavuzwe n'umuhanuzi Ezayi ngo: ‘Kumva muzumva ariko ntimuzasobanukirwa, kureba muzareba ariko nta cyo muzabona.

¹⁵Erega aba ni abantu binangiye! Biziba amatwi, bahunza amaso, kugira ngo be kubona, be no kumva, kandi be gusobanukirwa, kugira ngo batangarukira nkabakiza.’

¹⁶Mwebwe murahirwa kuko amaso yanyu areba, n'amatwi yanyu akaba yumva.

¹⁷Ndababwira nkomeje ko abahanuzi benshi n'intungane nyinshi bashatse kureba ibyo mureba ntibabibona, kandi bashatse kumva ibyo mwumva ntibabyumva.

¹⁸“Nimutege amatwi rero mwumve iby'uwo mugani w'umubibyi.

¹⁹Umuntu wese wumva Ijambo ry'ubwami bw'ijuru ntarisobanukirwe, ahwanye na ha handi ku nzira imbuto zaguye, maze Sekibi akaza agasahura icyabibwe mu mutima we.

²⁰Aho zabibwe ku gasi ni nk'umuntu wumva Ijambo ry'Imana, ako kanya akaryakirana ubwuzu,

²¹nyamara ntatume rishorera imizi muri we, bityo akarimarana igihe gito. Iyo habaye ingorane cyangwa gutotezwa ahōrwa Ijambo ry'Imana, ahita acika intege.

²²Aho zabibwe mu mahwa ni nk'umuntu wumva Ijambo ry'Imana, nyamara guhagarikwa umutima n'iby'isi no gushukwa n'ubukungu, bikarenga kuri iryo Jambo rikaba nk'imbuto zarumbye.

²³Aho zabibwe mu butaka bwiza ni nk'umuntu wumva Ijambo ry'Imana akarisobanukirwa akera imbuto, umwe ijana, undi mirongo itandatu, undi mirongo itatu.”

²⁴Yezu abaha ikindi kigereranyo ati: “Iby'ubwami bw'ijuru wabigereranya n'umuntu wari warabibye imbuto nziza mu murima we.

²⁵Igihe abantu basinziriye, umwanzi araza abiba urukungu hagati mu ngano.

²⁶Nuko imyaka ibaye imigengararo, urukungu ruramenyekana.

²⁷Abagaragu babibonye, basanga nyir'umurima baramubaza bati: ‘Mbese ntiwabibye imbuto nziza mu murima wawe? None se urukungu rwajemo rute?’

²⁸Arabasubiza ati: ‘Ibyo ni umwanzi wabikoze.’ Abagaragu bati: ‘Mbese urashaka ko tujya kururandura?’

²⁹Na we ati: ‘Oya, mutarurandurana n'ingano.

³⁰Nimureke bikurane byombi kugeza igihe cy'isarura, ni bwo nzabwira abasaruzi nti: Mubanze murundanye urukungu, muruhambiremo imiba muyitwike, maze ingano muzihunike mu kigega cyanjye.’ ”

³¹Yezu yongera kubaha ikigereranyo ati: “Ubwami bw'ijuru wabugereranya n'akabuto kitwa sinapi, umuntu yabibye mu murima we.

³²Karutwa n'izindi mbuto zose, nyamara kamara kumera kagasumba ibindi bihingwa kakangana n'igiti, inyoni zikaza zikarika mu mashami yacyo.”

³³Arongera abaha n'ikindi kigereranyo ati: “Ubwami bw'ijuru wabugereranya n'umusemburo umugore yafashe, akawuvanga n'ibyibo bitatu by'ifu kugeza ubwo yose itutumbye.”

³⁴Ibyo byose Yezu yabibwiraga rubanda akoresheje imigani. Nta cyo yababwiraga adakoresheje imigani.

³⁵Kwari ukugira ngo bibe nk'uko byavuzwe n'umuhanuzi ngo: “Nzababwirira mu migani, mbamenyeshe ibyahishwe kuva isi yaremwa.”

³⁶Nuko Yezu asezera kuri rubanda asubira imuhira. Abigishwa be bajya aho ari baramubwira bati: “Dusobanurire cya kigereranyo cy'urukungu rwabibwe mu murima.”

³⁷Nuko arababwira ati: “Ubiba imbuto nziza ni Umwana w'umuntu,

³⁸umurima abibamo ni isi. Imbuto nziza abiba ni abayoboka ubwami bw'ijuru, naho urukungu ni abayoboka Sekibi.

³⁹Umwanzi warubibye ni Satani. Isarura ryo ni imperuka y'isi, naho abasaruzi ni abamarayika.

⁴⁰Nk'uko barundarunda urukungu bakarutwika, ni ko bizamera ku mperuka y'isi.

⁴¹Umwana w'umuntu azatuma abamarayika be, batoratore abatera abandi gukora ibyaha n'inkozi z'ibibi, babakure mu bwami bwe

⁴²maze babarohe mu itanura ry'umuriro, aho bazarira kandi bagahekenya amenyo.

⁴³Ubwo abatunganiye Imana bazarabagirana nk'izuba mu bwami bwa Se. Ufite amatwi yumva ngaho niyumve!

⁴⁴“Iby'ubwami bw'ijuru wabigereranya n'ikintu cy'agaciro gihishwe mu murima, umuntu yakigwaho akongera akagihisha maze akagenda yamazwe n'ibyishimo, ku buryo agurisha ibyo afite byose akagaruka kugura uwo murima.

⁴⁵“Na none iby'ubwami bw'ijuru wabigereranya n'umucuruzi washakaga amasaro y'agahebuzo.

⁴⁶Nuko abonye rimwe ry'igiciro kinini, aragenda agurisha ibye byose ararigura.

⁴⁷“Byongeye kandi, iby'ubwami bw'ijuru wabigereranya n'umutego w'amafi banaze mu kiyaga, ugafata amafi y'amoko yose.

⁴⁸Iyo umaze kūzura bawukururira ku nkombe, bakicara bakajonjora amafi, ameza bakayashyira mu bitebo, amabi bakayajugunya.

⁴⁹Uko ni ko bizamera ku mperuka y'isi, abamarayika bazaza bajonjore ababi babakure mu ntungane,

⁵⁰babarohe mu itanura ry'umuriro aho bazarira kandi bagahekenya amenyo.”

⁵¹Nuko arababaza ati: “Ibyo byose murabyumvise?” Bati: “Yee.”

⁵²Arababwira ati: “Noneho rero umwigishamategeko wese wigishijwe iby'ubwami bw'ijuru, wamugereranya na nyir'urugo ukora mu byo atunze, akazana ibintu bimwe bishya n'ibindi bya kera.”

⁵³Nuko Yezu amaze kubacira iyo migani, arahava

⁵⁴ajya mu mujyi w'iwabo maze yigishiriza mu rusengero rwaho. Baratangara cyane bati: “Mbese ubwenge afite n'ibitangaza akora abikura he?

⁵⁵Mbese si umwana wa wa mubaji? Ese nyina ntiyitwa Mariya? Mbese abavandimwe be si Yakobo na Yozefu na Simoni na Yuda?

⁵⁶Mbese bashiki be bose ntiduturanye? None se biriya akora byose abikura he?”

⁵⁷Ibyo bituma batamwemera. Yezu ni ko kubabwira ati: “Nta handi umuhanuzi asuzugurwa, uretse mu karere k'iwabo n'iwe mu rugo.”

⁵⁸Nuko aho ntiyahakorera ibitangaza byinshi kubera ko batamwemeye.