Matthew 16

¹Nuko Abafarizayi n'Abasaduseyi basanga Yezu, bamusaba ikimenyetso cyemeza ko yatumwe n'Imana, ariko ari umutego bamutega.

²Yezu arabasubiza ati: “Iyo izuba rirenze muravuga muti: ‘Ejo hazaramuka umucyo kuko ijuru ari umutuku’,

³bwacya mukavuga muti: ‘Haramutse umuvumbi kuko ijuru ritukura kandi rikaba ryijimye.’ Muzi gutahura ijuru ngo mumenye ibihe, nyamara mukananirwa gutahura ibimenyetso biranga iby'iki gihe.

⁴Abantu b'iki gihe b'abasambanyi n'abagizi ba nabi bashaka ko mbaha ikimenyetso, nyamara nta kimenyetso kindi bazahabwa kitari icya Yonasi.” Nuko abasiga aho, aragenda.

⁵Bafashe hakurya, abigishwa ba Yezu basanga bibagiwe kujyana imigati.

⁶Yezu arababwira ati: “Muramenye mujye mwirinda umusemburo w'Abafarizayi n'uw'Abasaduseyi.”

⁷Bo rero baravugana bati: “Ubanza ari uko nta migati twazanye!”

⁸Yezu amenye ibyo bavugana arababwira ati: “Yemwe abafite ukwizera guke mwe, ni iki gituma mujya impaka ngo nta migati mufite?

⁹Mbese ntimurasobanukirwa, nta n'ubwo mwibuka ya migati itanu yahagije bya bihumbi bitanu, n'umubare w'inkangara z'ibyasagutse mwahavanye?

¹⁰Cyangwa se ntimwibuka na ya migati irindwi yahagije bya bihumbi bine, na bya bitebo by'ibyasagutse mwahavanye?

¹¹Kuki mudasobanukirwa ko atari imigati nababwiraga? Mujye mwirinda ahubwo umusemburo w'Abafarizayi n'uw'Abasaduseyi.”

¹²Noneho abigishwa basobanukirwa ko atari umusemburo w'imigati yababwiraga kwirinda, ahubwo ko ari uw'inyigisho z'Abafarizayi n'Abasaduseyi.

¹³Bageze mu karere gahereranye n'i Kayizariya ya Filipo, Yezu abaza abigishwa be ati: “Umwana w'umuntu abantu bavuga ko ari nde?”

¹⁴Baramusubiza bati: “Bamwe bavuga ko uri Yohani Mubatiza, abandi ngo uri Eliya, naho abandi ngo uri Yeremiya cyangwa undi wo mu bahanuzi.”

¹⁵Nuko Yezu arababaza ati: “Mwebwe se muvuga ko ndi nde?”

¹⁶Simoni Petero aramusubiza ati: “Uri Kristo Umwana w'Imana nzima.”

¹⁷Yezu aramubwira ati: “Urahirwa Simoni mwene Yonasi, kuko ibyo nta muntu wabiguhishuriye, ahubwo ni Data uri mu ijuru.

¹⁸Noneho nanjye reka nkubwire: uri Petero (ni ukuvuga ‘Ibuye’), kandi kuri urwo rutare nzubakaho Umuryango wanjye, ndetse n'urupfu ntiruzabasha kuwutsinda.

¹⁹Nzaguha imfunguzo z'ubwami bw'ijuru, icyo uzaboha ku isi kizaba cyaboshywe n'Imana mu ijuru, kandi icyo uzabohora ku isi kizaba cyabohowe n'Imana mu ijuru.”

²⁰Nuko Yezu yihanangiriza abigishwa be kutagira uwo bahingukiriza ko ari we Kristo.

²¹Uhereye ubwo, Yezu atangira gusobanurira abigishwa be ko ari ngombwa ko ajya i Yeruzalemu, akababazwa cyane n'abakuru b'imiryango n'abakuru bo mu batambyi n'abigishamategeko, bakamwica maze ku munsi wa gatatu akazuka.

²²Nuko Petero aramwihererana, atangira kumuhana ati: “Nyagasani, ibyo biragatsindwa! Imana ntizakunda ko bikubaho!”

²³Yezu arahindukira aramubwira ati: “Mva iruhande Satani! Umbereye inkomyi kuko ibitekerezo byawe bitavuye ku Mana, ahubwo ari iby'abantu.”

²⁴Nuko Yezu abwira abigishwa be ati: “Ushaka kunyoboka wese nareke kwiyitaho, ahubwo atware umusaraba we ankurikire.

²⁵Ushaka gukiza ubuzima bwe azabubura, naho uhara ubuzima bwe ari jye ahōrwa azaba abukijije.

²⁶Mbese umuntu byamumarira iki kwigarurira isi yose, ariko akaba yivukije ubugingo bwe? Cyangwa se ubugingo bw'umuntu yabugurana iki?

²⁷Ni koko Umwana w'umuntu agiye kuzaza afite ikuzo rya Se, ashagawe n'abamarayika be, maze agirire umuntu wese ibikwiranye n'ibyo yakoze.

²⁸Ndababwira nkomeje ko bamwe mu bari aha, batazapfa batabonye Umwana w'umuntu aje kwima ingoma ye.”