Matthew 25

¹“Icyo gihe iby'ubwami bw'ijuru bizaba nk'iby'uyu mugani. Habayeho abakobwa icumi bafashe amatara yabo bajya gusanganira umukwe.

²Batanu muri bo bari abapfu, abandi batanu ari abanyamutima.

³Abakobwa b'abapfu bajyana amatara yabo ariko ntibitwaza amavuta yo kongeramo.

⁴Abanyamutima bo bajyana amatara yabo hamwe n'amacupa y'amavuta ku ruhande.

⁵Umukwe atinze bose barahunyiza, barasinzira.

⁶“Igicuku kinishye bumva urusaku ngo ‘Dore umukwe araje nimujye kumusanganira!’

⁷Ubwo abakobwa bose barabaduka baboneza amatara yabo.

⁸Abakobwa b'abapfu ni ko kubwira abanyamutima bati: ‘Nimuduhe ku mavuta yanyu kuko amatara yacu agiye kuzima!’

⁹Abanyamutima bati: ‘Oya, ntabwo yadukwira twese, ahubwo nimujye mu bacuruzi mwigurire ayanyu.’

¹⁰“Igihe bagiye kuyagura, umukwe araza. Abakobwa biteguye binjirana na we mu bukwe, maze urugi ruhita rukingwa.

¹¹“Hanyuma ba bakobwa bandi baza kuza, barahamagara bati: ‘Mutware mutware, nimudukingurire!’

¹²Arabasubiza ati: ‘Ni ukuri simbazi!’ ”

¹³Yezu yungamo ati: “Nuko rero murabe maso, kuko mutazi umunsi cyangwa igihe.

¹⁴“Iby'icyo gihe wabigereranya n'umuntu witeguraga urugendo, maze ahamagara abagaragu be ababitsa imari ye.

¹⁵Umwe amuha ibiro na mirongo itanu by'izahabu, undi ibiro mirongo itandatu, naho uwa gatatu amuha ibiro mirongo itatu akurikije ubushobozi bwa buri wese, maze arigendera.

¹⁶Nuko uwahawe ibiro ijana na mirongo itanu ahita ajya gucuruza iyo zahabu, yunguka ibindi biro ijana na mirongo itanu.

¹⁷N'uwahawe ibiro mirongo itandatu na we abigenza atyo, yungukamo ibindi biro mirongo itandatu.

¹⁸Naho uwahawe ibiro mirongo itatu aragenda acukura umwobo, awuhishamo iyo mari ya shebuja.

¹⁹“Hahise igihe kirekire shebuja w'abo bagaragu aragaruka, maze bamumurikira ibyo yababikije.

²⁰Nuko uwahawe ibiro ijana na mirongo itanu by'izahabu asanga shebuja, amumurikira ibindi biro ijana na mirongo itanu maze aramubwira ati: ‘Mwambikije ibiro ijana na mirongo itanu, none ngibi hamwe n'ibindi biro ijana na mirongo itanu nungutsemo.’

²¹Shebuja ni ko kumubwira ati: ‘Nuko nuko mugaragu mwiza w'indahemuka, ubwo wabaye indahemuka muri bike nzakwegurira byinshi, ngwino twishimane.’

²²“Uwahawe ibiro mirongo itandatu na we asanga shebuja aramubwira ati: ‘Mwambikije ibiro mirongo itandatu, none ngibi hamwe n'ibindi biro mirongo itandatu nungutsemo.’

²³Na we shebuja aramubwira ati: ‘Nuko nuko mugaragu mwiza w'indahemuka, ubwo wabaye indahemuka muri bike nzakwegurira byinshi, ngwino twishimane.’

²⁴“Hanyuma haza uwahawe ibiro mirongo itatu abwira shebuja ati: ‘Nari nzi ko uri umuntu utoroshye, usarura aho utabibye ukanura ibyo utanitse,

²⁵nuko ngira ubwoba maze imari yawe nyicukurira umwobo ndayihisha, none dore ibyawe!’

²⁶“Shebuja aramusubiza ati: ‘Wa mugaragu mubi we! Wa munebwe we! Harya ngo wari uzi ko nsarura aho ntabibye, nkanura ibyo ntanitse!

²⁷Kuki utabikije imari yanjye mu isanduku yo kuzigama? Aho ngarukiye mba nyibikuje hamwe n'inyungu zayo.

²⁸Nimumwake izo zahabu muzihe uwahawe ibiro ijana na mirongo itanu,

²⁹kuko ufite wese azongererwa, naho udafite na busa azakwa n'utwo yaririragaho.

³⁰Uwo mugaragu mubi nimumujugunye hanze mu mwijima, ni ho bazarira kandi bagahekenya amenyo.’

³¹“Igihe Umwana w'umuntu azaza afite ikuzo ashagawe n'abamarayika bose, azicara ku ntebe ya cyami afite ikuzo rimukwiriye.

³²Abatuye amahanga yose yo ku isi bazakoranyirizwa imbere ye, maze abavangure nk'uko umushumba avangura intama akazitandukanya n'ihene.

³³Azashyira intama iburyo bwe, naho ihene zijye ibumoso.

³⁴Noneho Umwami azabwira abari iburyo bwe ati: ‘Nimuze abo Data yahaye umugisha, mugabirwe ubwami yabateguriye kuva isi ikiremwa.

³⁵Igihe nari nshonje mwaramfunguriye, ngize inyota mumpa icyo kunywa, nje ndi umushyitsi murancumbikira

³⁶igihe nari mbuze icyo nambara muranyambika, ndwaye murandwaza, ndi imfungwa muza kunsura.’

³⁷“Nuko izo ntungane zizamusubiza ziti: ‘Nyagasani, ni ryari twakubonye ushonje tukagufungurira, cyangwa ufite inyota tukaguha icyo kunywa?

³⁸Ni ryari twakubonye uri umushyitsi tukagucumbikira, cyangwa ubuze icyo wambara tukakwambika?

³⁹Ni ryari twakubonye urwaye cyangwa uri imfungwa maze tukaza kugusura?’

⁴⁰Nuko Umwami azabasubiza ati: ‘Ndababwira nkomeje ko ibyo mwakoreye umwe muri aba bavandimwe banjye boroheje, burya ari jye mwabikoreye.’

⁴¹“Hanyuma Umwami azabwira ab'ibumoso bwe ati: ‘Nimumve iruhande mwa bivume mwe, mujye mu muriro w'iteka wateguriwe Satani n'abamarayika be!

⁴²Igihe nari nshonje ntimwamfunguriye, ngize inyota ntimwampa icyo kunywa,

⁴³nje ndi umushyitsi ntimwancumbikira igihe nari mbuze icyo nambara ntimwanyambika, ndwaye ndi n'imfungwa ntimwansura.’

⁴⁴“Icyo gihe na bo bazamusubiza bati: ‘Nyagasani, ni ryari twakubonye ushonje, ufite inyota, uri umushyitsi, ubuze icyo wambara, urwaye cyangwa uri imfungwa maze ntitugufashe?’

⁴⁵“Umwami azabasubiza ati: ‘Ndababwira nkomeje ko ibyo mutakoreye umwe muri aba boroheje, burya nanjye mutabinkoreye.’

⁴⁶Ubwo rero bazahita bajya mu gihano cy'iteka, naho za ntungane zijye mu bugingo buhoraho.”