Philemon 1

¹Jyewe Pawulo waboshywe mpōrwa Yezu Kristo, jye n'umuvandimwe Timoteyo, turakuramutsa ncuti yacu Filemoni dusangiye umurimo,

²tutibagiwe na mushiki wacu Afiya na Arikipo, dufatanyije kuba ku rugamba kimwe n'itorero rya Kristo rikoranira mu rugo rwawe.

³Imana Data nibagirire ubuntu, ibahe n'amahoro, ifatanyije na Nyagasani Yezu Kristo.

⁴Filemoni, igihe cyose nsenze ndakuzirikana ngashimira Imana yanjye,

⁵kuko numva bavuga ukuntu wizera Nyagasani Yezu, ugakunda n'intore z'Imana zose.

⁶Ndasaba Imana ngo ukwizera Kristo dusangiye kukugirire akamaro, gutume urushaho gusobanukirwa ibyiza byose duheshwa na we.

⁷Muvandimwe, urukundo rwawe rwanteye ibyishimo, rundema n'agatima kuko wahumurije intore z'Imana.

⁸Ubusanzwe rero mfite uburenganzira mpabwa na Kristo, bwo kugutegeka gukora ibikwiriye nta cyo nishisha.

⁹Nyamara kuko ngukunda mpisemo ahubwo kubigusaba. Jyewe Pawulo, ubu ugeze mu zabukuru nkaba ndi n'imfungwa mpōrwa Kristo Yezu,

¹⁰ndakwinginga ku byerekeye Onezimo. Ni umwana wanjye nibyariye ndi ku ngoyi.

¹¹Uwari warakubereye imburamumaro, ubu atubereye twembi ingirakamaro.

¹²Ndamukoherereje rero nguwo ni ubura bwanjye.

¹³Mba narahisemo kumwigumanira hano ngo ankorere mu mwanya wawe, ndi ku ngoyi mpōrwa Ubutumwa bwiza.

¹⁴Nyamara nta cyo nashatse gukora utakinyemereye, kugira ngo ineza wagira uyigire ku bwende bwawe atari uko ubihatiwe.

¹⁵Ubirebye, Onezimo yaba yaratandukanye nawe by'akanya gato, kugira ngo uzamwakire mubane iteka

¹⁶atakiri umugaragu w'inkoreragahato, ahubwo arenze kuba umugaragu, abaye umuvandimwe w'inkoramutima. Jyewe ubwanjye ni ko mubona ndetse cyane, ariko wowe uzarushaho kumubona utyo kubera imibanire isanzwe no kubera kuba umwe muri Nyagasani.

¹⁷Niba rero wumva ko turi umwe, umwakire nk'aho ari jye wakiriye.

¹⁸Niba kandi yaragufudikiye cyangwa hari icyo agomba kukwishyura, ube ari jye ubibaraho.

¹⁹Ibi ni jye Pawulo ubyiyandikiye n'ukwanjye kuboko, nzamwishyurira. Siniriwe nkwibutsa umwenda nawe undimo. Erega uwo mwenda ni wowe ubwawe!

²⁰Nyabuneka muvandimwe, ungirire ubwo buntu kubera Nyagasani, bityo uraba ufatanyije na Kristo kundema agatima.

²¹Nkwandikiye niringiye ko uzanyumvira, ugakora ibyo ngusabye ndetse ukarushaho.

²²Si ibyo gusa, muntegurire n'icumbi kuko niringira ko Imana yumvise amasengesho yanyu, ikazangarura muri mwe.

²³Epafura tubohanywe duhōrwa Kristo Yezu aragutashya,

²⁴kimwe na Mariko na Arisitariko, na Dema na Luka dufatanyije umurimo.

²⁵Nyagasani Yezu Kristo nagumye kubagirira ubuntu.