Revelation 16

¹Hanyuma numva ijwi rikaze ry'uvugira cyane mu Ngoro y'Imana, abwira ba bamarayika barindwi ati: “Nimugende musuke ku isi za nzabya ndwi zuzuye uburakari bw'Imana.”

²Umumarayika wa mbere aragenda asuka urwabya rwe ku isi, ibisebe bibi biryana bihita byaduka ku bantu bashyizweho ikimenyetso cya cya gikōko bakanaramya ishusho yacyo.

³Umumarayika wa kabiri asuka urwabya rwe mu nyanja, amazi ahita ahinduka amaraso nk'ay'umuntu wapfuye, maze ibifite ubuzima byose byo mu nyanja birapfa.

⁴Umumarayika wa gatatu asuka urwabya rwe mu nzuzi no mu masōko y'amazi, bihita bihinduka amaraso.

⁵Nuko numva umumarayika ushinzwe iby'amazi agira ati: “Uri intabera kuko wagennye guca imanza utyo, wowe Muziranenge uriho kandi wahozeho.

⁶Kubera ko bamennye amaraso y'intore zawe n'ay'abahanuzi bawe, ni cyo gitumye nawe ubaha amaraso ngo abe ari yo banywa, ubakaniye urubakwiye.”

⁷Hanyuma numva ijwi ry'uvugira ku rutambiro agira ati: “Ni koko Nyagasani Mana Ishoborabyose, uca imanza z'ukuri n'ubutabera.”

⁸Umumarayika wa kane asuka urwabya rwe ku zuba, rihita rihabwa uburenganzira bwo kotsa abantu bikabije.

⁹Nuko abantu bababurwa n'icyokere cy'izuba rikaze, maze batuka Imana ifite ububasha kuri ibyo byorezo, nyamara ntibemera kwisubiraho ngo bayihe ikuzo.

¹⁰Umumarayika wa gatanu asuka urwabya rwe ku ntebe ya cyami ya cya gikōko, ubwami bwacyo buhita bucura umwijima. Abantu bakanjakanja indimi zabo babitewe no kuribwa cyane,

¹¹maze batuka Imana nyir'ijuru kubera ububabare n'ibisebe bafite. Nyamara ntibemera kwisubiraho ngo bareke ibibi bakora.

¹²Umumarayika wa gatandatu asuka urwabya rwe mu ruzi rugari rwa Efurati, amazi yarwo ahita akama kugira ngo abami baturutse iburasirazuba babone inzira.

¹³Nuko mbona ingabo za Satani eshatu zisa n'ibikeri, zavaga mu kanwa ka cya kiyoka no mu kanwa ka cya gikōko, no mu kanwa ka wa muhanurabinyoma.

¹⁴Izo ni zo ngabo za Satani zikora ibitangaza byo kwemeza abantu, zisanga abami bo ku isi yose ngo zibakoranyirize kujya ku rugamba kuri wa munsi ukomeye w'Imana Ishoborabyose.

¹⁵Nyagasani aravuga ati: “Dore ndaje ngutunguye nk'umujura! Hahirwa umuntu wese uhora ari maso, akagumana imyambaro ye kugira ngo atavaho agenda ari umutumbure, maze agaterwa isoni n'uko bamubona yambaye ubusa.”

¹⁶Izo ngabo za Satani zikoranyiriza abami ahantu hitwa Harimagedoni mu giheburayi.

¹⁷Umumarayika wa karindwi asuka urwabya rwe mu kirere, maze mu Ngoro y'Imana kuri ya ntebe ya cyami humvikana ijwi ry'uvuga cyane ati: “Karabaye!”

¹⁸Nuko imirabyo irarabya, amajwi ararangira, inkuba zirahinda n'isi iratingita cyane. Kuva abantu baba ku isi ntihigeze habaho umutingito w'isi ukaze nk'uwo.

¹⁹Wa mujyi w'icyatwa Babiloni usadukamo gatatu, n'indi mijyi y'amahanga irasenyuka. Uwo mujyi w'icyatwa Imana iwugerera mu kebo kawukwiye, iwuhira inzoga ibirira mu gikombe, ari yo burakari bwayo bukaze.

²⁰Ibirwa byose birahunga, imisozi na yo ntiyongera kuboneka.

²¹Nuko amahindu manini ava mu ijuru agwira abantu, rimwe rifite uburemere bwaba nk'ibiro mirongo ine. Abantu ni ko gutuka Imana kubera icyo cyorezo cy'amahindu kuko cyari gikabije.