Revelation 4

¹Hanyuma ngira ntya mbona mu ijuru urugi rukinguye. Uwo nari numvise bwa mbere ijwi rye ryarangiraga nk'iry'impanda, arambwira ati: “Zamuka uze hano nkwereke ibigiye gukurikiraho.”

²Ako kanya Mwuka w'Imana anzaho, maze ndabonekerwa, mbona intebe ya cyami y'Imana mu ijuru, mbona n'Uyicayeho

³arabagirana nk'amabuye y'agaciro yitwa yasipi na sarudiyo. Iyo ntebe ya cyami kandi yari izengurutswe n'umukororombya warabagiranaga nk'ibuye rya emerodi.

⁴Yari izengurutswe kandi n'izindi ntebe za cyami makumyabiri n'enye, zicaweho n'abakuru makumyabiri na bane bambaye imyenda yera, kandi batamirije amakamba y'izahabu.

⁵Kuri iyo ntebe ya cyami haturukaga imirabyo n'amajwi no guhinda kw'inkuba. Imbere y'iyo ntebe hari hateretswe amatara arindwi yaka umuriro, ari yo binyamwuka by'Imana.

⁶Imbere y'iyo ntebe hari igisa n'ikiyaga kigizwe n'ikirahuri, kibonerana nk'ibuye ry'isarabwayi. Imbere y'iyo ntebe n'ahayizengurutse hakaba ibyitwa ibinyabuzima bine, byuzuyeho amaso imbere n'inyuma.

⁷Ikinyabuzima cya mbere cyasaga n'intare, icya kabiri kigasa n'ikimasa, icya gatatu mu maso kigasa n'umuntu, naho icya kane kigasa na kagoma iguruka.

⁸Buri kinyabuzima cyari gifite amababa atandatu, kandi byose byari byuzuyeho amaso ku nda n'inyuma hose. Ijoro n'amanywa ntibituza kuririmba biti: “Umuziranenge, Umuziranenge, Umuziranenge, ni Nyagasani Imana Ishoborabyose. Ni yo yahozeho kandi iriho, kandi igiye kuza.”

⁹Ibyo binyabuzima bine ni ko bihora biririmba biha ikuzo Imana ihoraho iteka ryose, yicaye kuri ya ntebe ya cyami, bikayubaha bikanayishimira. Uko bigize bityo kandi

¹⁰ba bakuru makumyabiri na bane na bo bikubita imbere y'Iyicaye kuri ya ntebe ya cyami, bakaramya Ihoraho iteka ryose. Ubwo kandi bakaba banaze amakamba yabo imbere y'iyo ntebe, bakavuga bati:

¹¹“Nyagasani Mana yacu, ni wowe ukwiye guhabwa ikuzo n'icyubahiro n'ububasha, koko ni wowe waremye ibintu byose. Byaremwe ku bushake bwawe, ni wowe ubibeshaho.”