1 Peter 4

¹Ore naa te nkaraki naitamioki Kristo to sesen, enterreten sii intae ate teina damunoto, amu ore pooki onoto emion to sesen nemeitoki aas ing'ok,

²pee meitoki ninye arubare imbaa o sesen too nkolong'i enyena naatelekutua te nkop anaa enatiu ing'uarrat oo ltung'ana kake anaa eyieunoto e Nkai.

³Nchoo enkata natulusoiyie eidip nena naayieu neas iloreren oolamita Enkai oopuoyie enkiborra oo nkonyek, o ng'uarrat e merai, ooitalala indaat, incholieki e okore, agilak loo nkitanapat ooserem kulie aitin.

⁴Neing'asia te nedol intae mishularere ninche te nena baa e nkiminchalisho, nemor intae;

⁵kake kepuo aaisho iwalat ilo oterretene pee eiguanare ilooishu o lootuata.

⁶Naa te nkaraki ena pee etolikioki sii ilootuata Ilomon Supati le Nkai pee eiguanareki to sesen anaa iltung'ana, nepok te nkiyang'et anaa Enkai.

⁷Etinyikua enkiting'oto oo ntokitin pooki, neaku enoto eng'eno o ndamunot naauno nebor pee itumokiki enkomono.

⁸Ore enalusoo te pooki, embung'a enyorrata nauno olikae o likae amu keitoip enyorrata olorora loo ng'ok.

⁹Intoomono olikae olikae metii enking'unyung'uny.

¹⁰Taasishore inkishoorot naaba anaa inikinchooki aisiaayie ilkulikae, anaa olaing'urani supat te mpiris e Nkai oo mpukunot kumok.

¹¹Naa te neiro oltung'ani inchoo eiro anaa enatiu Ororei le Nkai; naa te neisiaaisho oltung'ani, inchoo eisiaaisho anaa enkidimata naishoo Enkai: pee eisiaai Enkai te pooki toki tiatua Yesu Kristo, laa enenye enkisisa, o enkitoria ntarasi o ntarasi. Eesai.

¹²Ilanyor laainei, eming'asia intae too ntemat naata emion e nkima naapuonu shumata intae, aatem intae anaa duoo kentoki omoni naipang'aka intae.

¹³Kake enting'idata te nkaraki ning'arierie Kristo isinaitin lenyena pee itumutumu sii intae aating'idata te ng'ida sapuk te nkata naibalieki enkisisa o enkitoo enye.

¹⁴Kake imayianana intae te nesukenyi intae te nkaraki enkarna e Kristo, imayianana amu eton te shumata intae oltau le nkisisa e nkitoo o le Nkai.

¹⁵Kake emincho obo te intae meitamei te nkaraki etara metua anaa olapurroni, anaa olarruoni, anaa olaisuroni.

¹⁶Kake te neitamei oltung'ani, eji amu olairukoni, mincho edol enkurruna, kake inchoo eisis Enkai teina arna.

¹⁷Amu etabawua enkata e nkiguana naa te nkaji e Nkai eng'asu. Amaa te naa iyiook eng'as, kaji pasa etiu enkiting'oto e lelo lemeiruk Ororei supat le Nkai?

¹⁸Naa, “Amaa aa te pesho eitajeuni Oltung'ani supat, ai ti aaji eliooyu oltung'ani lemeiruk Enkai naa olaasani loo ng'ok?”

¹⁹Te nkaraki ena enchoo lelo pooki oomeyu te risioroto o enyorrata e Nkai, eas isupati neitarasaki iltauja lenye ilo oitayio enkop oisiligayu.