1 Thessalonians 4

¹Ore enabaiyie ilalashera, o nkanashera kinkilikuan intae nikisai intae tiatua Olaitoriani Yesu, anaa enitayioloito te iyiook enaishiaakino te nitiuu to lkuaak o te nkitishipata e Nkai, ore anaa eniaasitata, entaas ina oleng oleng.

²Amu iyiololo inkiteng'enat, nikinchoo iyiook intae eing'uaa Olaitoriani Yesu.

³Amu ena eyeiunoto e Nkai te intae nchere pee iakuku iloosinya nilamilama eloloito,

⁴neyiolou sii pooki ng'ae linyi enaiko te nerikoki kewan enkitok te sinyatisho o te nkanyit,

⁵neme tiatua ing'uarrat torrok anaa iltung'ana lemeiyiolo Enkai;

⁶inchere pee mepong'ori oltung'ani ainyal olalashe lenye te na bae; amu Olaitoriani oitalaku tiatua kuna baa pooki, anaa enikinturukokito aaikok intae te dukuya.

⁷Eitu eipotoki iyiook Enkai olduruk kake atua esinyatisho eipotoko iyiook.

⁸Metaa ore oltung'ani pooki lemeshilaa ena neme oltung'ani eitu eshilaa kake Enkai, naisho intae Enkiyang'et enye Sinyati.

⁹Kake ore tialo enyorrata oo lalashera, nemeeta tipat pee eigeroki likae tung'ani ntae ae toki, amu ore intae maate eiteng'ena intae Enkai entonyorrata olikae o likae,

¹⁰nedede inchere inyorrinyorro ilalashera o nkanashera pooki natii atua Makedonia. Kake kisai intae ilalashera entaas ina oleng oleng,

¹¹ning'oruru pee itonini aaitirring'a nigolielie isiaaitin inyi. Niaasishosho too nkaik inyi anaa enikintanapa intae;

¹²pee itilitili kuldo leme ile ncholiek inyi, nemeitoki aaku oltung'ani ingarakinono.

¹³Ilalashera o nkanashera mikiyieu nimiaatata intae eyiolounoto tialo lelo ootuata pee misinanuonuo enaa anaiko kulikae lemeeta osiligi.

¹⁴Amu ore te nkaraki nikiruko inchere etua Yesu neitoki apiu, neijia sii etiu, ore tiatua Yesu, kerrinyu Enkai te nebo ninye lelo ootuata.

¹⁵Amu ena kimbalakinye intae to rorei lo Laitoriani, inchere ore iyiook ilooishu, ootelekutua ometabau elotunoto o Laitoriani, nimikipuo aaituruk te lelo ootuata.

¹⁶Amu Olaitoriani makewan odou eing'uaa keper to ltoilo le nkitoria o to ltoilo lo lmalaika kitok o endarata e mowuo e Nkai. Ore ilootuata tiatua Kristo nepiu te dukuya.

¹⁷Ore iyiook ilooishu, ootelekutua, neibung'i iyiook aailepie te nebo ninche tiatua inkatampo pee kinang'are Olaitoriani to loing'ang'e, nikiaku iyiook tenebo Olaitoriani anaake.

¹⁸Metaa entagoloto olikae olikae te kulo rorei.