1 Timothy 5

¹Mibuaaki olpayian kitok kake irorie anaa papaai lino. Ntaasa iltung'ana ooti anaa ilalashera linono,

²ninko nkituaak moruak anaa noo ng'utunyi, ninko nkituaak kutiti anaa nkanashera inono te sinyatisho pooki.

³Iyanyita inkolia naara te dede.

⁴Naa te neeta enkoliai inkera aashu inoo nkoko, inchoo eng'as aitabaya nena siaaitin e nkirukoto too lmareita lenye neisho intoiwuo enye olerrinyore amu keng'amaroyu ena te dukuya Enkai.

⁵Ore naa enkoliai te dede, netung'uayioki aa ninye ake naa Enkai eisilig nebik eomon dama o kewarie;

⁶kake ore ina naa ng'uarrat ake naaitore, netua hoo neishu.

⁷Intanapa nena pee metum ake ninche ileyiat.

⁸Te netii oltung'ani lemegolie iltung'ana lenyena neisulaki lelo le nkaji enye, neiturrayie ninye enkirukoto, neaku torrono alang oleitu eiruk.

⁹Nchoo eng'amuni aaiger enkoliai nemeitong'or ilarin ntomoni ile, naa enkitok apa o lpayian obo,

¹⁰neeta ake sii shakenisho oo mbaa enyena sidain anaa enaitubulua inkera neitoomonishe, neitukuo inkejek oo sinyat, netasarua lelo oonyamal, netasheikine aas impukunot pooki oo siaaitin sidain too nkoitoi pooki.

¹¹Kake tanya ing'amu aiger inkolia kutiti: amu te nepaashari ninche neyieu neyami,

¹²neaku keiguanareki ninche amu eiturraitie enapa kiroroto natang'asa aaibung.

¹³Ore ake etiu neijia, keitamok ate enturuaisho neirrang'irrang aaruk inkajijik, neme neijia ake, kake keeta sii olmarenke o enkilepilep nekurrisho neiro mbaa nemeishiaakino neiro.

¹⁴Metaa ajo nanu, keishiaakino neyami inkolia kutiti, neiu inkera, neitore nkajijik enye, peyie metum olmang'atinta erishata nasukenyie iyiook.

¹⁵Amu eidipa kulie aatapong'ori aasuj Sheitani.

¹⁶Te netii enkairukoni naata inkolia too lmarei lenye, nchoo enap ninche; Mincho esirit eiteleikini olola, peyie etum ataretu nena kulie olia te dede.

¹⁷Nchoo lelo payiani laa larikok supati edamuni neigilieki aaisho enkanyit, neisulaki lelo oonyok te likioroto o te nkiteng'enare.

¹⁸Amu ejo ilkigerot, “Mien olkiteng enkutuk eidong'ito enkurma,” nejo sii, “Keishiaakino olaisiaayiani olekoisiaayio lenye.”

¹⁹Minyorraa te neitang'ori olpayian aashu te naa ketii ilchakenini oaare anaa okuni.

²⁰Kake ore lelo ooenikino ing'ok tabuaaki etii pooki pee etum iltung'ana pooki enkuretisho.

²¹Ore te dukuya Enkai o Kristo Yesu o lelo malaika oogeluno, aaitanap iyie nchere imbung'a kuna kitanapat miaata nyorrakino, nimiaas hoo ae bae to lkep.

²²Misioki enkiteleikinoto oo nkaik te lelo ooputokini enkisiaayiare, niming'arie likae tung'ani ing'ok enyena, torripo kewan, taa sinyati.

²³Mintoki aok enkare narok, kake tooko enkiti aisho oo sabibu te nkaraki enkoshoke ino o teina muoyian e anaa ake.

²⁴Keibala ing'ok e kulikae tung'ana neutu endung'okinoto e nkiguana, kake ore kulikae te siadi eyooki aaibalayu.

²⁵Neijia sii etiu iasat supati e kulikae tung'ana, keibalayu aasioki, naa te nemeibalayu nemeidim aaisudori o kenya.