2 Timothy 3

¹Kake tayiolo ena nchere ore too nkolong'i e nkiting'oto naa kepuonu nkatitin oo sinaitin.

²Amu keaku iltung'ana iloonyor ate, iloonyor mpisai, iloowuasa, ilooilash, iloomorisho, iloogolong'aki intoiwuo enye, ilemeeta enashe, nemeure Enkai.

³Iloorook oishuaa, ilemesayiayu, nekurrisho, nemeeta esupatisho, ilemeibooyo ate too ntorrok pushunot, ilooiba esupatisho.

⁴Ilooudoo ilkulenye, neipopong'a to lwuasa, iloonyor esikar alang enanyor Enkai.

⁵Iloitaakuno kenyor Enkai netanyaita engolon enye. Talama iyie iltung'ana ooikununo neijia.

⁶Amu ore tiatua ninche netii lelo ooruk inkajijik, neibung nena kituaak naamoda naanapita lolan loo ng'ok nerikito ng'uarrat enye oo mpukunot kumok,

⁷nkituaak naainining pooki ng'ae nemebaiki aikata eyiolounoto e ina sipata.

⁸Anaa Yanes o Yampres ootanyaita enatejo Musa, neijia sii etiu kulo tung'ana ootanyaita esipata, iltung'ana ootarruoitie indamunot ninche.

⁹Kake meeta dikae nebaya ilenkirukoto e nkitaakuno amu keibalayu emodai enye te pooki anaa ene lelo tung'ana apa pokira oaare.

¹⁰Kake indipa iyie atoduaa enkiteng'enare ai o rrekie lai o enaipirta te nkishui ai o nkirukoto ai o eng'iriata ai o enyorrata ai, o enkitashoto ai o

¹¹inkisilisilot aainei o sinaitin laainei. Iyiolo iyie nena naaineputua te Antiok o te Ikonio o te Listra, eneba inkisilisilot nating'iria nanu; kake ore te nena pooki naatokordua Olaitoriani.

¹²Kesipa ore lelo pooki ooyieu neibung orrekie le Nkai tiatua Kristo Yesu, nemeeta nchere pee meisilisili.

¹³Ore lelo tung'ana torrok o lalejak neponari aaku torrok, elejisho neleji sii ninche.

¹⁴Kake ore iyie, tobiko te nena nindipa atayiolo aitisip, amu iyiolo iyie ajo aing'ae likinteng'ena nena.

¹⁵Naa ore ebaiki keraisho ino itayiolo lelo kigerot sinyat likindim aaiteng'ena te njeunoto naimu enkirukoto tiatua Yesu Kristo.

¹⁶Ore ilkigerot pooki naa Enkai nayang'ua naa keeta dupoto te nkiteng'enare o te nkisikong'ata o ereriot o te nkitubulunoto tiatua esupatisho,

¹⁷paa ore oltung'ani le Nkai neitabari te nkiaas pooki sidai.