Acts 7

¹Nejoki Olapolosani Kitok Stefano, “Ei nejia etiu nena baa?”

²Nejo Stefano, “Ilalashera laainei, o loo papa! Entoning'oki! Enkai e nkitoo naipang'aka papa lang Abraham eton emanya Mesopotamia, eitu eidur alo Haran,

³nejoki, ‘Tung'uai olmarei linyi o enkop inyi, shomo enkop naautaki.’

⁴Neaku etung'uayie enkop e Kaldea nelo amany Haran. Ore pee eitianya menye Abraham, nejoki Enkai meidurraki ena kop taata namanya intae.

⁵Eitu taa eisho Enkai ninye hoo enkiti wueji metujung'o aitaa enenye, eitu hoo eisho enkiti rashe e nkop, kake eishoo Enkai ninye o siligi ajoki keaku ene ishoi enye eshomo ninye. Naa ore taa ejoki Enkai ninye nejia, meeta Abraham enkerai.

⁶Inji etiaaka Enkai ninye, ‘Kepuo kenya ilng'anayio linono aamany ai kop eeiking'a, nepuoi aaisinkanishore’ teine neinyali too larin iip ong'uan.

⁷Kake kadung'oki enkiguana ilo orere oisinkanishore Enkai najo. ‘Naa ore te siadi neidurru teina kop naapuonu aaserem nanu tene wueji.’

⁸Neisho Enkai ina kata Abraham olkerreti le muratare. Neiu Abraham Isaak, nemurat te nkolong e isiet; neiu Isaak Yakobo, neiu Yakobo lelo loo papa pokira tomon o aare.

⁹“Ore te nkaraki olom oatayie apa lelo loo papa Yosef, olalashe lenye, nemiraki Misiri, kake etii apa Enkai te nebo ninye,

¹⁰nesaru too sinaitin lenyena pooki, neisho ninye omom o eng'eno nagut te dukuya Farao, olaiguanani le Misiri; neisho ninye meitoria Misiri neitore enkaji enye pooki.

¹¹Neaku eewuo olameyu Misiri, o Kanaan, nelotu osina sapuk; nelau lelo loo papa entoki nanya.

¹²Kake ore pee ening Yakobo nchere keetae enkurma te Misiri, neirriwaa lelo loo papa te nkata e dukuya.

¹³Ore te nkata e are neibalakinye Yosef kewan ilalashera lenyena, neyiolou Farao, olorere le Yosef.

¹⁴Neirriwaa Yosef olkilikuai aipotu menye, Yakobo, o lmarei lenye pooki, iltung'ana oobaya ntomoni naapishana o miet.

¹⁵Nedoyio Yakobo alo Misiri, teine eitianye ninye o lelo loo papa.

¹⁶Nenapuni seseni lenye aayau Shekem nenukari te nkurare apa nainyiang'ua Abraham ainyiang'u too layiok le Hamor te Shekem te nkosholai.

¹⁷“Kake ore pee etaanu enkata apa naisiligie Enkai Abraham, nebul olorere oleng te Misiri,

¹⁸o metaba anaa netumi likae aiguanani kitok te Misiri lemeyiolo Yosef.

¹⁹Neesek ilo olorere lang, nearaki te ngolon iloo papa metanang'ai nkera naaini ong'ata peyie eye.

²⁰Teina kata eini Musa naa sidai apa ninye oleng te dukuya Enkai; neitubuluni ninye lapaitin okuni te nkaji e menye:

²¹ore pee eyai ninye ong'ata, nedumu entito e Farao, neitubulu aitoti, neitaa olenye.

²²Neiteng'eni Musa aaishaki eng'eno pooki oo Lmisiri; neaku magilani to rorei o too nkiaasin.

²³“Ore pee eaku Musa oloo larin artam nejo kelo abaiki ilalashera lenyena.

²⁴Nedol obo lenye einyalitai oltung'ani le Misiri; nelo amitu aitalaku te ilo Misiri near metua.

²⁵(Aa kejo apa ninye keyiolou olorere lenye aajo ninye eyooki Enkai aisiaaishore elaku ninche te sinkaisho; kake eitu eyiolou ninche ina).

²⁶Ore te nkolong nasujita ina nedol Siraeli aare ooara, nejo aitaiki osotua. Nejoki, ‘Oyie, irara doi lalashera, kainyoo iorrorro pokira?’

²⁷Kake eiponyayie ilo oinyal olikae nejoki, ‘Ai ng'ae doi likinchoo iyie ntoria nirish iyiook?

²⁸Ijo sa pee kiaar matua anaa eninkuna olang'ole Misiri?’

²⁹Neisik Musa te nkaraki ilo rorei, nelo aaku olomoni te nkop e Midian, nelo aiu layiok aare teine.

³⁰“Ore etulusoitie larin artam, neipang'aki olmalaika Musa ti ong'ata o ldoinyo le Sinai, to sanag oyupuyup.

³¹Ore pee edol Musa neing'asiayie ina, nejo anyikaki adol, nelotu oltoilo lo Laitoriani ojo,

³²‘Kara Enkai oo loo minyi, Enkai e Abraham o Isaak, o Yakobo.’ Neikirikira Musa meitieu aing'ora.

³³Nejoki Olaitoriani ninye, ‘Talaku namuka too nkejek inono, amu ore ene nintasheyie, ewueji nesinya.

³⁴Kesipa nchere atoduaa osina loo ltung'ana laainei te Misiri, natoning'o olkiyioi lenye, naewuo pee asaru: wou naa taata amu, kaairriwaa Misiri.’

³⁵“Olapa taa Musa ilo otanyaita nkera oo Siraeli ejo, ‘Ai ng'ae doi likinchoo iyie ntoria nirish iyiook?’ Ninye eirriwaka Enkai metaa oloitore nesaru te nkaina e ilo malaika oipang'aka to sanag oyupuyup.

³⁶Ilo tung'ani otorikuo, eidipa ataasa ine nking'asia o nkitoduaat te Misiri o te naiposha nanyokie, o ti ong'ata, larin artam.

³⁷Ilo Musa otiaaka nkera oo Siraeli, ‘Keputoki intae Enkai oloiboni too lalashera linyi, laaijo nanu.’

³⁸Olapa taa otii atua ina siamo ti ong'ata te nebo olmalaika apa oirorie ninye to ldoinyo le Sinai, neirorie loo papa netang'amua sii nkitanapat naaishu naaishoo iyiook.

³⁹Ninye eitu ening iloo papa, neaku etaaraitie aarishie ate, nerrinyo ltauja lenye aaito Misiri,

⁴⁰nejoki ninche Aaron, ‘Ntobiraki iyiook inkaitin naarik iyiook; amu ore ele oji Musa, otorikuo iyiook aitung'uaa enkop e Misiri, mikiyiolo inaanoto ninye.’

⁴¹Neitobiru enkitanyaanyukoto o lashe te nena olong'i, neyaki lasarri lenye enkitanyaanyukoto, neng'idakino esiaai oo nkaik enye.

⁴²Kake eibelekenya Enkai neishooyo ninche meteserema lakir le shumata anaa enatisiraki aajo te mbuku oo loibonok le Enkai, ‘Ei nanu nchoo ng'uesi naayieng'i te lelo arin pokira artam ti ong'ata, na aji e Siraeli?

⁴³Itudumutua olng'obor le Molek, o lakira le nkai e Rafan, nkitanyaanyukot nintobirakita ate iteserema; kaidurrie naa intae aitogiroo Babilon.’

⁴⁴“Neeta apa iloo papa olapa ng'obor le shakeni ti ong'ata. Neitobiraki ninye ilo anaa enaitanapa Enkai Musa meiturubare anaa enaitoduaaki.

⁴⁵Ilo ng'obor enyaakita loo papa aanapu te nebo o Yoshua pee epuonu aajung enkop etaarayie Enkai kulikae oreren aing'atarie ninche. Nebik ilo ng'obor o metabaiki enkata e Daudi.

⁴⁶Enoto ninye kirotetisho te Enkai, neomonu meishoo meteshetaki Enkai e Yakobo enkaji.

⁴⁷Kake Solomon oteshetaka enkaji.

⁴⁸Hoo nememany Olotii Shumata Aisul te pooki inkajijik naashetuni too nkaik: anaa enatejo oloiboni,

⁴⁹‘Olorika lai le nkitoo Keper, naa olorika loo nkejek aainei enkop. Kenkaji natiu aja pasa kishetakiki? Olaitoriani ojo: Naa kaji ine nayeng'iyeng'are?

⁵⁰Ai mme enkaina ai naitobira kuna pooki?’

⁵¹“Lo tung'ana oogol ilukuny, lememurata ltauja nememurata nkiyiaa, igolong'akiki oshi ake Enkiyang'et Sinyati; ore enapake nataasa iloo minyi, ina itaasa sii intae.

⁵²Kalo oiboni eitu einyal iloo minyi? Netara metuata lelo apa ooitera aalimu elotunoto e ilo obo supat, lietuo intae aaitarasaa niariaara metua;

⁵³naa intae ootang'amutua nkitanapat, anaa enaishorutua lmalaika kake eitu ntabayaya.”

⁵⁴Ore ake pee ening enkiguana kuna baa, neminisu neonyiki lala te ngoro.

⁵⁵Ore ninye Stefano oiganya Enkiyang'et Sinyati neitirring'a aing'or shumata, nedol enkitoo e Enkai o Enkerai e Tung'ani eitashe te nkaina e tatene e Enkai,

⁵⁶nejo, “Kadolita etabole Keper, neitashe Enkerai e Tung'ani te nkaina e tatene e Enkai.”

⁵⁷Kake etabuaa ninche to ltoilo sapuk, neiken inkiyiaa enye, nekuetiki pooki te nebo;

⁵⁸nearaa auluo e ina anasa neurrui too soito: ore lelo ootaa shakeni neirragie nkilani enye te nkalo oo nkejek o lbarnoti oji Saulo.

⁵⁹Neirrui ninche Stefano too soito, eomonito ninye Olaitoriani, ajo, “Olaitoriani Yesu, tang'amai enkiyang'et ai.”

⁶⁰Negil kung, nebuak ajo to ltoilo sapuk, “Olaitoriani, mintalak ninche ena ng'oki.” Ore pee ejo nejia nudung'o tau.