Ephesians 2

¹Naa intae eitopiwuoki, enapa kata ituata te nkaraki oo nkitarruorrot o ng'ok,

²inaa ninche apa ipuoyieyie isujitata olkerreti lena kop, nisujitata ilo kitok le ngolon o loing'ang'e, ina kiyang'et naisiaaisho taata tiatua nena kera naagolong'u.

³Naa atua kuna apa kitii sii iyiook pooki too ng'uarrat oo seseni lang, nikisuj iyieunot o sesen o enoo ndamunot, nikiaku iyiook maate te ikinet inkera e ngoro, anaa ina natiu ilkulikae tung'ana pooki.

⁴Kake ore Enkai, naata olng'ur kitok, te nkaraki enyorrata kitok naa ninye etonyorrie iyiook,

⁵hoo nikituata apa te nkaraki nkitarruorrot ang, enyaaka ninye aitopiu iyiook pee kinchu te nebo Kristo, (te nkaraki empiris pee eitajewuoki intae).

⁶Neitopiwuo Enkai iyiook te nebo Kristo neisho iyiook matotoni te nebo ninye too wuejitin e keper tiatua Kristo Yesu,

⁷paa ore too lporori oopuonu netum aitoduaai eneba enkarsisisho e mpiris enye nemetemayu te nanai e nkoshoke enye tialo iyiook tiatua Kristo Yesu.

⁸Amu te mpiris eitajewuoki intae to rrekie le nkirukoto: neme hoo te nkaraki ae nitaasa intae, enkishorunoto e Nkai,

⁹neme te nkaraki nkiaasin pee metum ake likae tung'ani enawuasare.

¹⁰Amu kira iyiook esiaai e Nkai naitayioki tiatua Kristo Yesu te nkaraki isiaaitin sidain naaitobira apa Enkai te nkiterunoto pee kias.

¹¹Neaku entadamu inchere, ore apa aekata intae Iloreren tialo osesen ooji ilmemurata lelo kulikae ooji iloomurata naa entoki naitobiri to sesen too nkaik.

¹²Entadamu nchere ore apa ina kata miatata Kristo niminkenaroro intae tiatua olorere loo Siraeli, nirara apa ileeiking'a minkenaroro too sotuaitin le ina kisiligata, nimiaatata osiligi nimiaatata Enkai te nkop.

¹³Kake ore taata tiatua Kristo, ore intae oolakua apa oleng neitinyikuaki intae tiatua ilo sarge le Kristo.

¹⁴Amu ninye eseriani ang, olaa ninye oitaa iyiook indung'ot pokira nabo, neturoyie enapa suntai e nkiba narish iyiook,

¹⁵naa to sesen lenye eiwuang'ie ninye nena kitanapat o nkoon naaitanapishoteki pee etum ninye aitaiki kewan oltung'ani obo ng'ejuk te lelo ootoorote are, neyau eseriani,

¹⁶netum aitutumoki iyiook pokira Enkai tiatua ilo sesen obo te nkoitoi o salaba, neishu ina kiba neiting'ie.

¹⁷Neewuo ninye aliki intae eseriani iloolakua apa neliki eseriani lelo apa ootaana,

¹⁸te ninye kiindim indung'ot pokira are, teina kiyang'et nabo, aatinyikaki Papa.

¹⁹Meekure naa irara lomon o leeiking'a; kake ing'aring'ara olorere obo o lelo sinyat nitaa ile nkaji e Nkai,

²⁰ooteshetakaki shumata olkitamanyunoto le lelo kipaareta o loibonok le Nkai, aa Kristo Yesu makewan ilo soit kitok lo lmairroto,

²¹laa atua eidikidikokini enchetata pooki te nebo, nebulu enkaji nasinya tiatua Olaitoriani,

²²laa atua ninye sii eteshetakaki intae entaa ewueji nemanya Enkai tiatua ina Kiyang'et.