Galatians 5

¹Etalakua iyiook Kristo pee kibik kilakuno, Entashoito naa oleng, emincho eitokini aaibooki intae abori enchata e sinkaisho.

²Nanu Paulo, ele oirorie intae. Entisipu kuna najoito. Te neaku inchosho emurati intae, nimintokiki aata dupoto te Kristo.

³Kaigil ake aaishakenoki pooki ng'ae olo metumurati nchere, ketioorie ninye meitabai nena pooki naajo nena Kitanapat.

⁴Etudung'oyioki intae aarishie Kristo, intae taa lelo ooimu nkitanapat eji pee eikenaki Enkai intae isipat; imbelokinote oriong empiris e Nkai.

⁵Ore iyiook, Enkiyang'et naidimie iyiook maape dukuya te nkirukoto kianyu ilo siligi oikenakinye Enkai iyiook isipat.

⁶Amu ti nikitii atua Kristo Yesu nemeitoki aaku olomurata anaa olememurata ooata tipat; ore entoki e tipat naa enkirukoto naimu enyorrata.

⁷Anaaijo apa isosionono te lototo inyi; kainyoo nanyaaka aibooyo intae pee mining'ining'i esipata?

⁸Mme ake ninye mbaa e Nkai naipoto intae etiaaka ntae ilo oewuo aitapong'oo intae.

⁹Keisuishie enkinyi aisuishoi e ntapa naipurji pooki.

¹⁰Aata osiligi to Laitoriani, nchere kuna najo ijojo sii intae; kake ore pooki ng'ae olotu aitanyamal intae, ketum ilo enkiguana enye, era toki nara.

¹¹Amaa ninye nanu, lalashera laainei te naa naaji kemuratare eton alikioo ajo kemuratishoe ake, kainyoo naa doi pee eton ake aainosieki nanu osina? Te naa naaji keton aa emuratare alikioo, nemeitoki elikioroto nalikioo nanu osalaba aitagor likae.

¹²Keyieu naaji naa ore lelo ooliman intae naa kepuo aagelem ate.

¹³Ore intae, lalashera laainei, elakunoto eipotokoki intae, nabo emiaas, emincho elakunoto inyi eaku enaitiship ing'uarrat torrok osesen; kake tareto olikae olikae te nyorrata;

¹⁴amu eitabari nkitanapat tele rorei obo, nchere, “Tonyorra ole latia ino anaa eninyor kewan.”

¹⁵Kake te neaku ionyonyo ninosasa maate anaa ng'uesi, entodol naa ake pee mimutumutu ate.

¹⁶Kake ajoki ntae enchom te Nkiyang'et pee mintabayaya iyieunot o sesen;

¹⁷amu ore iyieunot o sesen naa kegilunore ine nkiyang'et ore iyieunot e nkiyang'et negilunore ino sesen, amu mening'o pokira are, neaku mindimidimi aataas nena niyieuu niaasiasa.

¹⁸Te naa Enkiyang'et narikito intae, nimitii intae abori nena Kitanapat.

¹⁹Keibala nkiaasin o sesen, naa ninche kuna: emarmalisho e loloito, ilduruki, ng'uarrat torrok,

²⁰eseremata e kulie tokitin neme Enkai, esakutore, mang'atisho, enchankar, olom, engoro, olorok, eoro, olarrabal le oro,

²¹enkiba te neeta likae toki, emerai, eului, o kulie naatiu neijia. Aikok nanu intae anaa enaidipa oshi aikoo, nchere, ore lelo ooas mbaa naaijo nena nemejung katukul Enkitoria e Nkai.

²²Kake ore ilng'anayio le Nkiyang'et naa enyorrata, eng'ida, eseriani, eng'iriata, enanai e nkoshoke, esupatisho, enkisiligunoto,

²³emboron o enkibooroto e kewan. Nemeetae nkitanapat naagilunore mbaa naaijo kuna.

²⁴Ore lelo oora ile Kristo Yesu neidipa ninche aatasho enkewan o sesen o nena yieunot enyena.

²⁵Tenaa ke Nkiyang'et taata kinchuyie iyiook, ematurubare naa erikore e Nkiyang'et.

²⁶Ematalam olwuasa le modai; nimikintagor olikae olikae aashu kimbaikino olikae olikae.