James 2

¹Ilalashera o nkanashera aainei, emiaaku ilooata olkep imbung'itata enkirukoto o Laitoriani lang Yesu Kristo, Olaitoriani le nkisisa.

²Amu te nelotu naaji oltung'ani oata ilgiso le saabu, neishopito inkilani sidain atua enkaji inyi e ntumo, nelotu sii ninye ine oltung'ani aisinani oishopito isiapird.

³Ning'oring'oro intae elde oishopito inkilani sidain, nishilaa aajoki, “Totona te ne,” nijokiki elde aisinani, “Intasho te nde,” aashu, “Isukudoyu te mbata oo nkejek aainei.”

⁴Aimidol ajo iatata olkep maate, niaakuku ilooiguanare too ndamunot torrok?

⁵Entoning, ilalashera laainei o nkanashera aainei. Keitu egelu Enkai laisinak te nkop metaa karsisi te nkirukoto o lajung'ok le nkitoria naisiligieki lelo oonyor ninye?

⁶Kake eitu iyanyititi intae ilo tung'ani aisinani. Aime ilkarsisi doi ooibooki intae enkop?

⁷Aime ninche doi ooyiataki ntae inkajijik e nkiguana? Aime ninche doi oomor ina arna sidai nayanyiti?

⁸Te nintabayaya inkitanapat o Laitoriani anaa enajo isirat, “Tonyorra olelatia ino anaa eninyor kewan,” itaasa esupat.

⁹Kake te nintodolulu olkep, nitaasa eng'oki, neiguanare intae inkitanapat inchere irara ilagilak loo nkitanapat.

¹⁰Amu ore pooki ng'ae oibung inkitanapat pooki neitapong te nabo, netaa eitarruoyie te pooki.

¹¹Amu ore olotejo, “Miloloito,” netejo sii, “Miaar metua.” Metaa te neitu iloloito, kake itaara metua, itaa naa olagilani loo nkitanapat.

¹²Eroro, niaasishosho, anaa iloopuoi aaiguanare too nkitanapat e lakunoto.

¹³Amu meeta enkiguana olng'ur, te ilo leitu eitodolu olng'ur, kake kemir olng'ur enkiguana.

¹⁴Kaa dupoto, ilalashera o nkanashera aainei, eeta, te nejo oltung'ani keeta enkirukoto nemeeta nkiasin? Keidim enkirukoto enye aitajeu?

¹⁵Amaa te nemeishopo anaa te nemeeta endaa olalashe anaa enkanashe,

¹⁶nejoki obo linyi ninche. “Enchom te seriani, erowuaja, niraposhosho,” neitu eisho ninche nkolati o sesen, kaa dupoto eeta?

¹⁷Neijia etiu enkirukoto openy, te nemeeta nkiasin, netua naa pesho.

¹⁸Kake eidim oltung'ani oje atejo, “Iata iyie enkirukoto naata nanu nkiasin.” Intoduaaki naa enkirukoto ino aa ninye ake, metii nkiasin inono ore naa too nkiasin aainei naaitodol enkirukoto ai.

¹⁹Iruk iyie ajo nabo Enkai? Itaasa esidai. Eiruk sii ninche iloirriruani neikirikira.

²⁰Iyieu iyie nikintodoli lo tung'ani omoda inchere ore enkirukoto nemeeta nkiasin naa koolupi?

²¹Amaa papa lang Abraham keitu eikenakini sipat te nkaraki nkiasin, pee eishoyo oinoti lenye Isaak to olperere lo lasar?

²²Aimidol ajo ore enkirukoto o nkiasin enyena neasisho te nebo? Neitabayioki enkirukoto enye too nkiasin.

²³Pee ebaya osirata ojo, “Eiruko Abraham Enkai, ore te nkaraki enkirukoto neikenaki Enkai ninye esupatisho,” Neipoti aajo olchore le Nkai.

²⁴Idol taa ajo eikenakini oltung'ani isipat too nkiasin mme to lbae le nkirukoto ake.

²⁵Aime teina oitoi ake sii oo nkiasin eikenakaki Rahab ina mulayoi isipat pee eng'amu lelo aikitalak, neipang'ie ninche ti ae oitoi?

²⁶Ore anaa enatua osesen te nemetii enkiyang'et neijia etiu enkirukoto nemetii nkiasin ketua.