Matthew 24

¹Nepuku Yesu te nkaji e Nkai alo, nepuonu lkipaareta lenyena enetii pee eitodol enchetunoto e nkaji e Nkai.

²Newaliki ajoki, “Ai midolitata kuna pooki? Kesipa ajoki intae meing'uari te ne wueji osoit obo te shumata olikae, lemesulakini enkop.”

³Ore eton Yesu to Ldoinyo loo Loirienito, nepuonu lkipaareta enetii ninye too nkurrat nejoki, “Toliki iyiook ajo kanu ebau kuna baa? Naa kainyoo olmonekie le lotunoto ino o ene nkiting'oto e na kop?”

⁴Neng'amaa Yesu nejoki, “Entorrip ate meitapong'oo intae oltung'ani.

⁵Amu kepuonu ilkumok te nkarna ai oojo, ‘Kara nanu Kristo,’ neitapong'oo ilkumok.

⁶Naa ining'ining'i intae ilarrabali o mbaa oo njoreitin eimakini, naa entodol ake emirut amu meeta inchere pee mebau kuna baa; kake eton eng'or enkiting'oto.

⁷Amu kedumakino olorere olikae orere, nedumakino enkitoria enkae kitoria; naa kepuonu ilameitin o nkikirikirat e nkop too wuejitin kumok.

⁸Kake ore nena baa pooki naa ine nkiterunoto oo sinaitin.

⁹Teina kata taa eishoori intae meisilisili neari intae entuata; neibayu intae iloreren pooki te nkaraki enkarna ai.

¹⁰“Teina kata taa errorro ilkumok nekaldaa olikae olikae, neibayuno ninche maate.

¹¹Naa kepuku iloibonok kumok le lejare neiminie lkumok.

¹²Naa ore te nkaraki naponari entorroni neiropiju enyorrata oo lkumok.

¹³“Kake ore olongiri ometabaiki enkiting'oto nejeu.

¹⁴Naa kelikiori kulo omon supati le na kitoria e Nkai te nkop pooki metaa shakenisho too loreren pooki; ore ina kata nebau enkiting'oto.

¹⁵“Ore pee idolidolo ina torroni nabau e mutata natolimuo oloiboni le Nkai oji Daniel eitashe te wueji sinyati. (Inchoo ilo oisumita metayiolo.)

¹⁶Ore ina kata lootii Yudea neipukoki ldoinyo.

¹⁷Ore olotii shumata enkaji nemedou alo aitayu intokitin te nkaji enye.

¹⁸Ore olotii enkurma nemeshukunye adumu enkila enye.

¹⁹Wooi nena naanuta o naaitanakisho te nena olong'i!

²⁰Entoomon pee meaku enaipuk inyi ene nkata o loirujuruj anaa enkolong e nkiyeng'iyeng'ata.

²¹Amu keaku elotu ina kata entaboi sapuk neitu ae kata etumi, anaa pee eiteruni enkop o taata, nemeitoki aaku katukul.

²²Naa te neme keitodorropaki nena olong'i anaata mejeu toki naishu; kake ore te nkaraki oo lgelunot lenyena eitodorropaki nena olong'i.

²³“Te nejoki intae ina kata oltung'ani, ‘Nele Kristo otii ene!’, Anaa ‘Nelido otii idie!’, Emiiruk

²⁴amu kepuonu ilooitaa ate iloo Kristo le lejare o looitaakuno iloibonok ooitoduaaya ilmonek o nenking'asia kituaak pee te naa keidimayu naaji neiminie ninche lelo gelunot le Nkai.

²⁵Ng'ura ajo aidipa atoliki intae te dukuya eitu abau.

²⁶Metaa te nejoki intae, ‘Ng'ura, Etii ong'ata’, emipuku; anaa, ‘Etii lgilat li atua aji’ emiruk.

²⁷Amu ore anaa enatiu enkiwuang'ata naing'uaa eneilepunye enkolong nelioyu te nedoyiorie; neijia etiu elotunoto e Nkerai e Tung'ani.

²⁸Amu enetii empopok eiturrurrokino lmotonyi.

²⁹“Ore ake pee eish isinaitin le nena olong'i, neitomisimisi enkolong nemeitoki olapa awang'u, nesulunye ilakir to loing'ang'e, neigirigiro engolon o loing'ang'e.

³⁰Nelioyu ina kata olmonekie le Nkerai e Tung'ani te keper neaku olkiyioi lo lauui too loreren pooki le nkop, nedoli Enkerai e Tung'ani elotu too nkatampo e keper te ngolon o te nkitoo sapuk.

³¹Naa keirriwaa ninye ilmalaika lenyena te ndarata kitok e mouwo meiturrurru ilgelunot lenyena too lubot pokira ong'uan naaing'uaa osiwuo, neitung'uaa ineeiting'ie keper, too lubot pooki.

³²“Entuutarie ate enkitanyaanyukoto o lng'aboli ore te neiteru aitayu imbenek niyiolouu aajo etinyikua oladalu.

³³Ore sii intae ti nidolidolo nena pooki, entayiolo aajo etinyikua, ee etii inkutukie oo nkajijik.

³⁴Kesipa ajoki intae, meishari kulo tung'ana le na kata eitu ebau kuna baa.

³⁵Keish keper o enkop kake meish irorei laainei katukul.

³⁶“Kake meetae oloyiolo ina olong anaa ina saa, aa ilmalaika le keper anaa Enkerai, Papa ake oyiolo.

³⁷Amu ore anaa enatiu apa too nkolong'i e Noa, neijia sii etiu elotunoto e Nkerai e Tung'ani.

³⁸Amu ore te nena olong'i eton etioyo oloirrag le nkare, kedaae, neokishoi, neyamishoe, neishoori meyami, o metabau ina olong natijing'a Noa esafina,

³⁹neitu eyiolou o meeu oloirrag le nkare aya pooki ng'ae; neijia sii etiu elotunoto e Nkerai e Tung'ani.

⁴⁰Ore ina kata te netii ilewa oaare enkurma, neyae obo neing'uari olikae.

⁴¹Neiutuutisho nkituaak are to soit neyai nabo neing'uari enkae.

⁴²“Entorripisho naa, amu miyiolo enkolong nalotu Olaitoriani linyi.

⁴³Kake iyiololo aajo, te naa keyiolo olopeny enkaji enkata nalotu olapurroni, anaata etorripishe pee meisho enkaji enye metigili.

⁴⁴Enterretenata sii intae; amu te nkata niminteikiki elotu Enkerai e Tung'ani.

⁴⁵“Kalo naa sinka ilo oisiligayu naa ng'en otung'eikia olkitok lenye enkaji enye, meitotio ltung'ana te nkata naishiaakino?

⁴⁶Emayiana ilo sinka laa te nelotu olkitok lenye nenyorriki easita enatung'eikia.

⁴⁷Esipa ajoki intae, keisho meitoria intokitin enyena pooki.

⁴⁸Kake te nejo ilo sinka torrono to ltau lenye, ‘Keimutie olkitok lai’;

⁴⁹neng'as aar isinkan ooboitare, nedaa neokisho te nebo o lamerak;

⁵⁰kelotu olkitok le ilo sinka te nkolong nemeiteikini o te saa nemeyiolo,

⁵¹naa kedung'udung neitaboitaki sunkuro. Neaku enkishirata o eonyoto oo lala.