Matthew 3

¹Ore te nena olong'i nelotu Yohana Olaibatisani elikioo ti ong'ata e Yudea, ejo,

²“Erridutu, amu etinyikua enkitoria e keper.”

³Amu ore ele, ninye eimaka oloiboni le Nkai oji Isaya pee ejo, “Etii oltoilo obuaku ti ong'ata Entobiraki Olaitoriani enkoitoi nalala entorioi inkoitoi enyena.”

⁴Neishopito apa ninye Yohana enkila oo lpapit le ntames, o enkeene te mpolos enye; ore endaa enye na lmaat o naishi e ong'ata.

⁵Nepuo apa enetii ninye ina kata Yerusalem o Yudea pooki o lkirinen pooki lo lkeju Yordan;

⁶neibatisai pooki to lkejule le Yordan neirridu ing'ok enye.

⁷Ore pee edolu Yohana Ilfarisayo kumok o Sadukayo epuonu meibatisae nejoki ninche, “Naishoi oo lasuriaa ai ng'ae otoroja intae elanya engoro nalotu?

⁸Entoiu ilng'anayio ooishiaakinore enkirridunoto.

⁹Nimijojo tiatua ate, ‘Kiaata iyiook Abraham aa papa lang; amu ajoki intae, keidim Enkai aishoo Abraham inkera te kulo soito.

¹⁰Neiteleikiaki taata entolu intona oo lkeek naa ore pooki shani lemeiu lng'anayio sidain, nedung'i aanang'aki enkima.’ ”

¹¹“Kaibatisa nanu intae te nkare pee eitodolu nchere irridutua ing'ok; kake ore olaasujita, naa kegol ninye, aalang nanu, maaishiaakino hoo nanu te nanapaki inamuka enyena, naa ninye oibatisa intae te Nkiyang'et Sinyati o te nkima.

¹²Neeta esilet enye te nkaina enye, naa keor asip olkurroto lenye oidong'ishoreki, nesotoki enkano enye olkompe, ore isuut nepej te nkima nemearayu.”

¹³Ore te siadi ina nelotu Yesu eing'uaa Galilaya enetii Yohana meibatisa to lkeju le Yordan.

¹⁴Neyieu Yohana neany eibatisa Yesu, nejoki, “Keishiaakino naa iyie likimbatisa nanu, paa nilotu iyie enatii?”

¹⁵Newaliki Yesu ajoki, “Tonyorrai taata iyie, amu teina eishiakino nikintabaya naayieu Enkai pooki.” Nenyorraa Yohana.

¹⁶Ore pee eidipi aaibatisa Yesu, neilepu nabo kata aing'uaa enkare; ng'ura, nebolo shumata nedol ninye Enkiyang'et Sinyati e Nkai edou anaa enturkuluo, elotu shumata ninye;

¹⁷neningi oltoilo te shumata ejo, “Enkerai ai ena nanyor, natishipe te ninye.”