Matthew 5

¹Ore pee edol Yesu iltung'ana kumok neilepaki oldoinyo: ore pee eton nepuonu lkipaareta lenyena enetii.

²Neiteng'en ninye ninche nejo:

³“Emayiana ilaisinak too ltauja; amu enenye enkitoria e keper.

⁴“Emayiana ilooishir; amu ninche eilejileji.

⁵“Emayiana ilo obor; amu ninche oojung enkop.

⁶“Emayiana ilooata esumash o enkure eing'oru enayieu Enkai; amu ninche eitaraposhi.

⁷“Emayiana ilooata olng'ur amu ninche eing'urrieki.

⁸“Emayiana ilooitukuo iltauja; amu ninche oodol Enkai.

⁹“Emayiana lelo ooitayu osotua; amu ninche eji inkera e Nkai.

¹⁰“Emayiana lelo ooisilisili te nkaraki enayieu Enkai amu enenye enkitoria e keper.

¹¹“Imayianana intae te nesukeny ninche intae, neisilisil, neiteeniki intae imbaa pooki torrok e lejare te naa te nkaraki nanu.

¹²Enting'idata nishipapa oleng; amu kitok olerrinyore linyi te keper; amu eisilisilo ninche aaiko neijia iloibonok le Nkai ootii apa te dukuya intae.

¹³“Irara intae emunyan e nkop; kake te netuyiatuyu emunyan, ainyoo eshukokinyeki enkisuisho? Meitoki aata tipat katukul, kake kenang'ari boo meitunyoi iltung'ana too nkejek.

¹⁴“Irara intae ewang'an e nkop. Meisudoroyu enkanasa natii oldoinyo.

¹⁵Nemeinok sii ltung'ana oltaa nepising to ltoo, kake eiteleiki olperere; neitawang'aki pooki ootii aji.

¹⁶Ore sii ntae enchoo ewang'an inyi metawang'a te dukuya iltung'ana pee edol iasat inyi supati, pee eyanyituni Papa linyi otii keper.

¹⁷“Emijo kaewuo aitarruoo Nkitanapat aashu inaaigero loibonok le Nkai, eitu alotu aitarruoo kake pee aitabaya.

¹⁸Amu esipa ajoki intae, ore ometaba anaa nelusoo shumata o enkop, melusoo osirata obo anaa oltipoto obo loo Nkitanapat eitu eitabari.

¹⁹Ore pooki ng'ae ogil enkitanapata nabo e kuna kutiti, hoo te naa enkinyi, neitayiolo ilkulikae metigila, naa keji ninye olkini te pooki te nkitoria e keper; kake ore oloas nena neitayiolo sii ilkulikae metaasa, naa keji ilo olkitok te nkitoria e keper.

²⁰Amu ajoki intae te nemelusoo esupatisho inyi alang enoo laiteng'enak loo nkitanapat o enoo Lfarisayo, nimijing'ijing'i enkitoria e keper.

²¹“Itoning'o aajo etiaakaki iltung'ana li apa, ‘Miar metua; naa ore oloar metua neishiaakino enkiguana.’

²²Kake ajoki nanu intae, ore pooki ogorokino olalashe, naa keishiaakino enkiguana; ore olosukeny olalashe, neishiaakino, nerikokini ilkituaak; ore olodekisho ajo ‘Lo modai!’ Keishiaakino olbalbal le nkima.

²³Naa ti niyau enkishooroto ino olperere lo lasar, nidamu teine olalashe lino likiaatakinore,

²⁴tung'uai teine enkishooroto te mbata o lperere lo lasar, shomo; tang'asa toning'ore olalashe lino, pee intoki ashukunye aitayu enkishooroto ino.

²⁵“Tasioki toning'ore olintarrikinore eton iriamariri te nkoitoi; pee mikirik enetii oladung'oni le nkiguana nikirikoki oladung'oni le nkiguana osikari, nikinang'akini jila.

²⁶Esipa aajoki, mipuku teine katukul ometaba anaa nilak empisai nabayie.

²⁷“Itoning'o aajo etejoki, ‘Miloloito.’

²⁸Kake ajoki nanu intae, ore oloing'or eng'oruoi neng'uar eidipa atololoito to ltau lenye.

²⁹Ti nikintasur enkong'u ino e tatene, tukurtu, inturrai, amu enaikash te neimin erubata nabo alang te nenang'akini osesen lino pooki olbalbal le nkima.

³⁰Naa ti nikintasur enkaina ino e tatene, tudung'u inturrai; amu eikash erubata ino nabo te neimin, alang osesen lino pooki te nenang'akini olbalbal le nkima.

³¹“Etejoki sii, ‘Ore oloorore enkitok enye, inchoo eisho ninye empalai naorore.’

³²Kake ajoki nanu intae, ore pooki ng'ae oorore enkitok enye, neme te nkaraki e loloito ake, etipika ninye atua eloloito; ore oloyam ina natoororeki, etololoite ninye.

³³“Itoning'o sii iltung'ana li apa enatiaakaki, ‘Minya olmumai le lejare, kake intabai ilmuma linono to Laitoriani.’

³⁴Kake ajoki nanu intae eminya ilmuma katukul hoo te keper, amu olorika le nkitoria e Nkai;

³⁵aashu te nkop, amu olorika loo nkejek enyena; aashu te Yerusalem, amu enkang o laiguanani kitok.

³⁶Minya olmumai te ndukuya ino, amu mindim aiborrie olpapita obo anaa aitoroka.

³⁷Kake enchoo irorei linyi metaa ee, neaku ee, aashu mme, neaku mme, amu ore enalusoo te nena naa ilo torrono eing'uaa.

³⁸“Itoning'o aajo etejoki, ‘Enkong'u o te nkong'u, o olalae to lalae.’

³⁹Kake ajoki nanu intae, migilunore olikintaas entorrono kake ore olikiosh eseder e tatene, imbelekenyaki sii enkae.

⁴⁰Ore oltung'ani pooki oyieu nikirik enkiguana, eyieu nikioru olkila li atua, inchoo meewa sii oli oriong.

⁴¹Ore olikiaraki, shomo enkilomita nabo, shomo are.

⁴²Ore olikiomon, inchoo; ore olikisilen, mimitiki.

⁴³“Itoning'o aajo etejoki, ‘Tonyorra ole latia ino, nimbayu olmang'atinta lino.’

⁴⁴Kake ajoki nanu intae, entonyor ilmang'ati linyi, niomonokiki lelo ooisilisil intae;

⁴⁵pee itumutumu intae aataa inkera e Papa linyi otii keper; amu eilepakinye enkolong enye iltorrok o supati neirriwaki enchan ilooata sipat o ilemeeta.

⁴⁶Amu ti ninyorrinyorro iloonyor intae, kaa shunet itumutumu intae? Ai meiko neijia oshi ilasotok le kodi?

⁴⁷Naa te naa ilalashera linyi ake irorokiki, kaa yasata naa italang'ie ilkulikae? Ai meiko oshi neijia ilkulikae oreren?

⁴⁸Entaa naa bayarot anaa Papa linyi otii keper laa aibayaroti.