Matthew 7

¹“Eminguanare pee meiguanareki intae.

²Amu ore enkiguana ning'uanarere, naa ninye eiguanareki intae; ore enintorisiokiki ilkulikae, naa ninye eitorisiokini intae.

³Kainyoo pee ing'uraa entubuloi natii enkong'u o lalashe lino, nimidol olchata otii enkong'u ino makewan?

⁴Anaa kaji inko ti nijoki olalashe lino, ‘Inchooki maitayu entubuloi te nkong'u ino;’ etii olchata atua enkong'u ino makewan?

⁵Lo sunkuroi, tang'asa intayu ilo shata te nkong'u ino makewan pee itumoki atoduaa oleng, aitayu ina tubuloi te nkong'u o lalashe lino.

⁶“Emincho ildiein entoki nasinya, niminang'akiki ilului inyi ilbitiro pee meituny too nkejek enye, neibelekenyakino intae aanya.

⁷“Entoomonu pee eishori intae; eng'oru naa itumutumu entooshiosh kutuk aji pee eboluni intae.

⁸Amu ore pooki oomonu neishori, ore olooshiosh neboluni.

⁹Anaa kalo tung'ani te intae laa, te neomon enkerai endaa, neisho ninye osoit?

¹⁰Aashu aa te neomon osinkirri, neisho olasurai?

¹¹Aiti niyiololo intae oora torrok aaishoo inkera inyi inkishoorot sidain, kebaa eitulusoo naleng Papa linyi otii keper aisho intokitin sidain lelo oomon ninye?

¹²Metaa ore pooki niyieuu neitaas intae iltung'ana entaasa sii intae ninche nena, amu kuna nkitanapat o loibonok le Nkai.

¹³“Entijing intae te nkishomi napirik amu dapash kishomi nelala enkoitoi nalo enkiminata, naa kumok iloojing ina kishomi nalala.

¹⁴Amu kepirik kishomi naa ronkai enkoitoi nalo enkishon, naa ilkuti ootum ina kishomi napirik.

¹⁵“Entorrip ate too loibonok le lejare oopuonu enitii eishopito inkilani oo ntare, kake ore atua ninche, naa isuyian ooata enkarri.

¹⁶Too lng'anayio lenye iyiolouu. Keitayuni isabibu too lkiku anaa ilng'abolo too ilkeek loo ilkiku?

¹⁷Neijia etiu, eiu pooki shani sidai ilng'anayio sidain, neiu pooki shani torrono ilng'anayio torrok.

¹⁸Meidim olchani sidai atoiu ilng'anayio torrok, nemeidim sii olchani torrono atoiu ilng'anayio sidain.

¹⁹Ore pooki shani lemeiu ilng'anayio sidain, nedung'i aauroo nenang'akini enkima.

²⁰Neijia naa etiu, too lng'anayio lenye iyiolouu ninche.

²¹“Mme pooki tung'ani laajo ‘Olaitoriani, Olaitoriani,’ ojing enkitoria e Nkai, kake ilo oas enayieu Papa lai otii keper.

²²Aayooki aajoki ilkumok teina olong, ‘Olaitoriani, Olaitoriani, keitu kimbonisho te nkarna ino, nikiaraa iloiriruani te nkarna ino, nikiaas ine nking'asia te nkarna ino?’

²³Naa kashirraki ina kata ajoki ninche, ‘Eitu aekata ayiolou intae, enchom entung'uayioki intae, ilaasak loo ntorok.’

²⁴“Metaa ore pooki ng'ae oning lelo rorei laainei neas, neitanyaanyukieki oltung'ani otesheta ng'en enkaji enye te ndapidapoi,

²⁵nesha enchan, nenang'unye enkare, nekutu olkutati, neosh ina aji, neitu euroo; amu etuunokoki olkitamanyunoto lenye shumata endapidapoi.

²⁶“Naa ore pooki ng'ae oning kulo rorei laainei nemeas, neitanyaanyukieki oltung'ani omoda otesheta enkaji enye te shumata osinyai;

²⁷nesha enchan nenang'unye enkare, nekutu olkutati, neosh ina aji, neurori neaku kitok euroroto enye.”

²⁸Ore pee eidip Yesu kulo rorei, neing'asia siamon te nkiteng'enare enye;

²⁹amu eiteng'ena Yesu ninche anaa oloata enkidimata nemetiu anaa ilaiteng'enak lenye loo nkitanapat.