Philippians 4

¹Ore naa ilalashera o nkanashera aainei nanyor, ntae eng'ida o enkopiyia ai e nkitoo, entashoito enkuna neijia tiatua Olaitoriani, ilanyor laainei.

²Asai Eudia, nasai Sintike metoning'oto anaa nkanashera tiatua Olaitoriani.

³Naaikilikuan sii iyie encholiek ai nadede, taretu kuna kituaak amu aatang'arie ninche enyamali te nkaraki ororei supat, te nebo Klement o lelo kulikae ootaasishote te nebo nanu, ootii nkarn enye atua embuku e mpuaan.

⁴Enting'idata tiatua Olaitoriani anaake, naitoki ake ajo enting'idata.

⁵Nchoo iltung'ana pooki metayioloito emborron inyi. Etataana Olaitoriani.

⁶Emintanyamal ate ti ae toki, kake ore te pooki toki te nkomono o te nkishooroto e nashe, Enchoo Enkai metayiolo inkolati inyi

⁷neaku eseriani e Nkai nalang eyiolounoto pooki narrip iltauja linyi o ndamunot inyi tiatua Kristo Yesu.

⁸Ore enabayie ilalashera o nkanashera naa inchere, ore pooki naasipa, ore pooki nayanyitayu, ore pooki naata errepet sidai, te netii orrekie sidai netii orrekie oiririkino enkisisa, kuna entadamu.

⁹Ore nena nitayioloito o nitang'amutua o nitoning'o o nitoduaa te nanu, entaas; neaku Enkai e seriani te nebo intae.

¹⁰Ekang'ida tiatua Olaitoriani lang amu inyaakita aaitopiu osotua te nanu, esipa kitadamutua sii apa kake eitu itumutumu erishata.

¹¹Neme taa kaing'unyung'uny ayieu ae toki, amu ateng'enaka aidipakinore mbaa pooki.

¹²Kayiolo eneikununo eng'orikinoto aashu enkiputakinoto, ore te pooki toki oo too rishat pooki atayiolo olosek lashurakinye eraposhoi o esumash, ti ari o ti ameyu.

¹³Kaidim ataasa mbaa pooki tiatua ilo laa ninye laaidimie.

¹⁴Kake itaasa enaishiaakino te nkaraki kitang'arie osina lai.

¹⁵Niyiololo intae Ilfilipi oopeny nchere ore apa te nkiterunoto o rorei supat, ina kata pee aing'uaa Makedonia, nemetii esirit naatang'arie enkishooroto aashu eng'amunoto meteleku intae ake.

¹⁶Ore ninye apa atii Sesalonike, kirriwakita nanu eretoto e dukuya o ene are.

¹⁷Neme taa enkishorunoto aing'oru, kake aing'oru ilng'anayio ooponari ooikenakini intae.

¹⁸Atang'amua te Epafroditas nkishoorot nirriutua, enkishorunoto narropil, o lasar ong'amaroyu naa oloitiship Enkai.

¹⁹Naa keiputaki Enkai ntae pooki olat inyi te risioroto e nkarsisisho enye te nkitoo tiatua Kristo Yesu.

²⁰Metaa ene Enkai naa Papa lang, enkitoo ntarasi o ntarasi. Eesai.

²¹Eroroki lelo pooki sinyat tiatua Kristo Yesu. Eiroroki intae ilalashera ootii te nebo nanu.

²²Eiroroki intae isinyat pooki neisulaki lelo le nkaji e Kaisari.

²³Metaa empiris o Laitoriani Yesu Kristo te nebo ntae pooki.