Revelation 11

¹Naaitokini aaisho entemet naikununo anaa eng'udi, naajokini nanu, “Inyo tetema enkaji e Nkai o ewueji o lperere lo lasar o lelo ooserem teine.

²Kake mitem ake olgoriet otii boo e nkaji e Nkai. Tapala ilo amu eishooki iloreren, naa keituny ninche ina ang sinyati too lapaitin artam o aare.

³Naa kaisho ilchakenini laainei oaare engolon naibonishore nkolong'i enkalifu nabo o iip are o ntomoni ile, eishopito ilkuniyiani.”

⁴Kulo ninche lelo oirienito aare, o lelo kilang'ilang'eta aare ooitashe te dukuya Olaitoriani le nkop.

⁵Naa te neyieu oltung'ani neinyal ninche, nepuku enkima too nkutukie enye, nemut ilmang'ati lenye. Te neyieu oltung'ani near ninche neari metua aaiko neijia.

⁶Keeta ninche engolon naikenie oloing'ang'e pee meshau enchan te nena olong'i e naibon enye. Neeta ninche engolon naitoreyie inkariak o enaibelekenyie metaa osarge. Near enkop to lmeitai ake pooki oba anaa enayieu ninche.

⁷Ore ake pee eidip ninche shakenisho enye, ore ina ng'ues nailepua teina gumoto nemeeta eneiting'ie nedumaki ninche enjore, nemir ninche, near ninche metuata.

⁸Neirrag impopoki enye te nkoitoi nalala eina anasa kitok, naji te nkiroroto e nkitumususet, Sodom o Misiri, naa teine apa etashoki Olaitoriani lenye.

⁹Ore too nkolong'i uni o lpisiai ore iltung'ana loo loshon, o lng'ejepa o loreren neshil nena popoki enye, nemit enukari aapik inkuraren.

¹⁰Ore lelo tung'ana omanya enkop, neshipakino ninche, neitayu isiruai neishoro inkishoorot, amu ore kulo oibonok le Nkai pokira aare, neisomita oleng lelo ootii enkop.

¹¹Kake ore te siadi nena olong'i uni o lpisiai, nejing enkiyang'et e nkishui naing'uaa Enkai, atua ninche neitashe ninche too nkejek enye, neiput enkuretisho sapuk lelo ootoduaa ninche.

¹²Ore ina kata nening lelo oibonok le Nkai aare oltoilo sapuk oing'uaa keper ejoki ninche. “Elepu wootu ene!” Ore eing'orita ilmang'ati lenye neilep ninche aapuo keper te nkatampoi.

¹³Ore teina saa nejing olokirikiri kitok enkop, neurori ematua e tomon e ina anasa. Neari iltung'ana inkalifuni naapishana, metuata teina kikirikirata. Neiputukuny lelo ootelekutua, neisho enkisisa Enkai e keper.

¹⁴Etulusoyie entaboi e are kake kelotu entaboi e uni asieku.

¹⁵Neitoki olmalaika li oopishana aosh esekekua enye, netii iltoiloishi sapuki te keper oojoito, “Etaa enkitoo e nkop enkitoo o Laitoriani lang o ene Kristo lenye, naa keitoreisho ninye intarasi o ntarasi.”

¹⁶Ore lelo payiani tikitam oong'uan ootoni too lorikan lenye le nkitoo te dukuya Enkai nebatata too nkomomi enye aaserem Enkai.

¹⁷Nejo, “Kincho iyie enashe, Olaitoriani Enkai, olopeny enkidimata pooki, otii taata, netii apa amu iwa te ngolon ino sapuk, ninterua aitoreisho.

¹⁸Etagorote loreren, kake eewuo engoro ino, neewuo enkata naiguanareki ilootuata, nilaaki ole koisiaayio isinkan linono, iloibonok sinyat o lelo ooure enkarna ino, ilooti o lkituaak, o enkata namuti lelo amutak le nkop.”

¹⁹Neitokini aabol enkaji e Nkai te keper nedoli osanduku lo sotua lenye ti atua enkaji enye. Netii enkimerlel oo nkiwuang'at o ltoiloishi oobuak, o ndarat e nkikurrukur o lokirikiri le nkop, o enchan sapuk oo soito oleng.