Revelation 16

¹Naitoki aning oltoilo sapuk oing'uaa enkaji e Nkai ejoki lelo malaika oopishana, “Enchom entubukoki enkop lelo bakulini oopishana le ngoro e Nkai.”

²Nelo olmalaika le dukuya nebukoki olbakuli lenye oriong enkop. Nejing inkirondoni torrok naang'u lelo tung'ana ooata olmishire le ina ng'ues neserem enkitanyaanyukoto enye.

³Nebukoki olmalaika li aare olbakuli lenye enaiposha, netiu enkare anaa osarge lo ltung'ani otua. Neye pooki toki naishu natii atua enaiposha.

⁴Nebukoki olmalaika liokuni olbakuli lenye atua ilkejek o nchorroi e nkare, neaku ninche osarge.

⁵Naning ilo malaika loo nkariak ejo, “Ira iyie asipani te kuna kiguanat inono, iyie olotii taata nitii apake, losinyati obo, amu ena enkiguana ino.

⁶Amu eibukoitie iltung'ana osarge loo sinyat o loo loibonok le Nkai, ninchoo iyie ninche osarge metooko. Ina nairirikino ninche.”

⁷Naning olperere lo lasar pee eishir ajo, “Ee Olaitoriani Enkai, Olmagilani, esipa neitoriori nkiguanat inono.”

⁸Nebukoki olmalaika liong'uan olbakuli lenye enkolong, neishori ninye metapejo iltung'ana te nkima.

⁹Nepeji iltung'ana te nkirowuaj napi, nedek ninche enkarna e Nkai naa ninye naata engolon te kulo meita. Neitu eirridu ninche anaa eisho ninye enkitoo.

¹⁰Nebukoki olmalaika le miet olbakuli lenye ilo orika le nkitoo le ina ng'ues, nemisimisu enkitoria enye. Neony iltung'ana ilng'ejepa lenye te mion.

¹¹Nedek Enkai e keper te nkaraki emion o te nkaraki inkirondoni, neitu eirridu inkiaasin enye.

¹²Nebukoki olmalaika le ile olbakuli lenye olkeju kitok le Freti, netoyu enkare e ilo keju, pee eitobiri enkoitoi naimu ilaiguanak ooing'uaa enkilepunoto e nkolong.

¹³Nadol nanu, epuku te nkutuk e ina tiamasi, o te nkutuk e ina ng'ues, o te nkutuk e ilo le lejare, inkiyang'eta uni torrok naaijo ntuaan e nkare.

¹⁴Amu inkiyang'eta oo loiriruani ninche naas inkitoduaat, nepuaya enetii ilaiguanak le nkop pooki pee eiturrurru ninche te njore ena olong kitok e Nkai Magilani.

¹⁵“Ng'ura, kalotu nanu anaa olapurroni. Emayiana ilo oshololo, ogolie inkilani enyena pee melo ake meishopo nedoli meishopo.”

¹⁶Neiturrur ninche te wueji neji te nkutuk oo Lbrania Har-Magedon.

¹⁷Nebukoki olmalaika liopishana olbakuli lenye atua enkijape. Nepuku oltoilo sapuk tiatua enkaji e Nkai, eing'uaa ilo orika le nkitoo nejo, “Etaasaki!”

¹⁸Nepuku nkiwuang'at e enkimerlel, o ltoiloishi sapuki, o ndarat o enkikurrukur, o enkikirikirata e nkop neitu aekata etumi anaa nejing tung'ani oriong enkop. Kitok ilo okirikiri le nkop oleng.

¹⁹Neoro ina anasa kitok aaku matuan uni, neuror nkanas kituaak oo loreren. Nedamu Enkai Babilon kitok, pee eitook ninye metimita enkikompe e mpijan e ngoro enye.

²⁰Neilanyisho aaisik pooki lemankale, neitu eitokini aadol ildoinyo.

²¹Neshau enchan isoito sapukin oleng, laa nkiloi onom enkiroishi o soit obo, nedoiki iltung'ana eing'uaa keper, o metaba anaa nedek iltung'ana Enkai te nkaraki ina shan oo soito, ilo meitai oitureisho naleng.