Revelation 6

¹Nadol ina kata pee elo ilo Kuoo le Ker abol obo le lelo mishiren oopishana, naning nabo e nena ng'uesi ong'uan naaishu ejo to ltoilo le ndarata, “Wou!”

²Nadol te dukuya nanu embarta naibor, neeta ilo okedito enkawuo o enkopiyia e nkitoo naishooki ninye, neipang alo.

³Ore pee ebol ilo kuoo ilo mishire li aare, naning ina ng'ues e are naishu ejo, “Wou!”

⁴Neipang'u enkae barta nanyokie oleng, ore ilo okedito neishooki engolon meiwuang'ie eseriani aitung'uaa e nkop pee eyiang'a iltung'ana maate, neishooki ninye olalem sapuk.

⁵Ore pee ebol olmishire li okuni, naning ina ng'ues e uni naishu ejo, “Wou!” Naing'orisho nadol nanu, embarta narok, ore ilo okedito neeta entemet te nkaina enye.

⁶Naning entoki naaijo oltoilo te mpolos e nena ng'uesi ong'uan naaishu ejo, “Emborei e mpirlbil e nkano te mpisai nabo, o mboreitin uni e shairi te dinari nabo. Kake mintarruoo eilata o enaisho oo sabibu.”

⁷Ore pee ebol ilo kuoo leker olmishire li ong'uan, naning oltoilo le ina ng'ues e ong'uan naishu ejo, “Wou!”

⁸Naing'orisho nanu, nadol embarta pus, ore enkarna e ilo okedito naa keji Keeya, neirukurukore ninye Enemeneng'a. Neishooki ninye engolon meitoria ematua e ong'uan e nkop, peyie ear metuata to lalem o to lameyu o too lmeitai o too ng'uesi e ntim naatii enkop.

⁹Ore ebol ilo kuoo olmishire le miet nadol ti abori olperere lo lasar iltauja le lelo apa ootaaraki te nkaraki ororei le Nkai o te shakenisho naitayutuo.

¹⁰Neishir aajo to ltoilo sapuk, “Iyie Olaitoriani Kitok, Oyanyiti nesipa, kanu kenya inguan nintalaku osarge lang te lelo ootii enkop?”

¹¹Neishori pooki te lelo olkila oibor, nejokini meyeng'iyeng'ata te nkiti kata, o metaba anaa neiputayu esiana e lelo ooisiaaishote te nebo ninche leton eitokini aar anaa apa ninche maate.

¹²Ore pee ebol ilo kuoo olmishire le ile, naing'orisho nadol etii enkikirikirata sapuk enkop, neroku enkolong netiu anaa olkila orok, neibelekenya olapa olulung'a netiu anaa osarge.

¹³Nesulunye ilakir to loing'ang'e nesulakino enkop anaa ilng'abolo oorrarrunye ilng'anayio te nkata enkirobi eyukito olkutati.

¹⁴Neng'ishari oloing'ang'e anaa olpiyayati otununukoki. Neiwuang'ieki pooki doinyo, o pooki lemankale aaitung'uaa ewueji enye.

¹⁵Ore ilaiguanak le na kop, o ltung'ana kituaak, o larikok loo njorin, o lkarsisi o loogol, o pooki ng'ae orrindik aashu ololakuno. Neisudori too nkapuniaa o too soito loo ldoinyo.

¹⁶Neipot nejoki ildoinyo o soito, “Entusulakinoto iyiook, nisudoo iyiook too nkonyek e ilo otonita to lorika le nkitoo, o te ngoro e ilo Kuoo le Ker.

¹⁷Amu etabawua ina olong kitok e ngoro enye, naa ai ng'ae oidim aitasho te dukuya ninye?”