Revelation 9

¹Neitoki olmalaika le imiet aosh esekekua enye, nadol olakira otusulunye eing'uaa shumata elotu enkop. Neishori ninye olbolet lo lgos le ina gumoto nemeeta eneiting'ie.

²Nebol ilo gos le ina gumoto nemeeta eneiting'ie, neilepu empuruo te ilo gos naikununo anaa empuruo o lkokuet sapuk, nemisimisu enkolong, o enkijape teina puruo napuku teina gumoto.

³Nepuku teina puruo ilmaat nepuonu enkop. Neishori engolon natiu anaa engolon oo nkolopani e nkop.

⁴Nejokini ninche pee meinyal inkujit e nkop, aashu ae toki nabulu nanyori aashu pooki shani, kake lelo tung'ana ake lemeeta olmishire le Nkai too lpurai loo nkomomi enye.

⁵Neishori ninche meisilisilo ninche too lapaitin imiet, kake pee mear metuata. Netiu enkitamioto enye anaa emion e nkolopa, te neng'or oltung'ani.

⁶Naa ore te nena olong'i naa keing'oru oltung'ani keeya nemetum ninye. Neng'uar ninche keeya, neilany keeya ninche.

⁷Ore lelo maat te nidol, neikununo anaa mbartan naatanapate to larrabal. Netii ilukuny enye ntokitin naatiu anaa nkopiyiani e nkitoo e saabu, neikununo nkomomi enye anaa nkomomi oo ltung'ana.

⁸Neikununo ilpapit lenye anaa ilpapit loo nkituaak, neikununo ilala lenye anaa ilala loo lng'atunyo.

⁹Neeta ilpala laaijo nkilani oo lgooitie oo sekenke, ore enkikurrukur oo naipuko enye, netiu anaa enkikurrukur oo ngarrin oo mbartan kumok ekuetiki olarrabal.

¹⁰Neeta ilkidong'o laaijo loo nkolopani oonyisho, ore engolon enye naitameiyie iltung'ana too lapaitin imiet naa atua lkidong'o lenye etii.

¹¹Ore olaiguanani oitore ninche naa ilo malaika le ina gumoto nemeeta eneiting'ie. Ore enkarna enye too Lbrania naa Abadon neji te nkutuk o Lyunani Apolion (nchere olamutani).

¹²Eidipa entaboi e dukuya atulusoi, kake eton eng'or intabo are naapuonu te siadi.

¹³Neitoki olmalaika le ile aosh esekekua enye, naning oltoilo oing'uaa nena mowuarak pokira ong'uan o lperere lo lasar le saabu otii dukuya Enkai.

¹⁴Nejoki ilo malaika le ile, oata emowuo, “Talaku lelo malaika oong'uan ooena to lkeju sapuk le Frati.”

¹⁵Nelakuni lelo malaika pokira oong'uan apa ooibooki aaitaanyu ina saa, o ina olong, o ilo apa, oilo ari, pee ear ematua e uni oo ltung'ana.

¹⁶Ore esiana oo ltimito ookedito mbartan netasha are naa nkalifuni tomon katitin nkalifuni tomon. Atoning'o nanu esiana enye.

¹⁷Naa nji eikununo nena bartan natoduaa te nduaata ai, neeta lelo ookedito nkilani oo lgooitie oo sekenke naayia anaa enkima, neyia anaa soito pusi ooji Salfa neyia anaa enkima e nkibiriti. Neikununo ilukuny oo mbartan anaa ilukuny oo lng'atunyo Nepuku enkima e Nkibiriti too nkutukie enye.

¹⁸Ore te kulo meita pokira okuni near metuata ematua e uni oo ltung'ana te nkima o te mpuruo o te nkima e nkibiriti, naing'uaa inkutukie enye.

¹⁹Amu ore engolon e nena bartan naa atua inkutukie enye etii o lkidong'o lenye. Netiu ilkidong'o lenye anaa ilasuriaa, keeta ilukuny, naa ninche epikishore ilbaa.

²⁰Ore iltung'ana ootelekutua, leitu eari metuata te kulo meita, neitu eirridu inkiaasin oo nkaik enye, neitu epal eseremata o eomonoto oo loiriruani o nkitanyaanyukot neme nkaitin e saabu o enkosholai o suyai o soito o enoo nkeek nemedolisho, aashu ening'isho aashu aashom.

²¹Neitu sii eirridu too loikop lenye o te sakutore enye, o te loloito enye o te mpurrorre enye.