Romans 11

¹Naikilikuanu naa ajo, keidipa ninye Enkai atanya ltung'an lenyena? Mme nejia pae! Kara nanu makewan Osiraeli, ole ishoi e Abraham, ole ntalipa o losho le Benchamen.

²Eitu eany Enkai ltung'ana lenyena laa ninche apake etayiolo. Aimiyiololo enajo Ilkigerot te Eliya o ina natasayia Enkai agilunore Isiraeli ejo?

³“Olaitoriani, etara ninche iloibonok linono metuata, eturoitie lpereren loo lasarri linono, nanu ake openy otelekua, naa enkishui ai taata eing'oru.”

⁴Ketawalikia ninye Enkai ajoki aa? “Atelekaka kewan ilewa oora inkalifuni naapishana leitu egilaki kung enkitanyaanyukoto e nkai naji Baal.”

⁵Nejia sii taata etiu keetae olpisiai, laa te mpiris egeluno.

⁶Kake te naa te mpiris nemeekure aa too nkiasin amu meitoki naa empiris aaku empiris.

⁷Kainyoo naa? Siraeli leitu etum ina apa naing'oru ninche. Nenoto ninche lelo oogeluno, kake neitiming'ani lelo kulikae,

⁸anaa enatisiraki aajo, “Eishoo Enkai ninche ltauja o lukuny nemening'u toki o nkonyek nemedolisho o nkiyiaa nemening'isho ometabaiki ena olong.”

⁹Nejo Daudi, “Enchoo metaa osirua lenye orreshet o eloket, neaku enarror o enaitalakuni te ninche;

¹⁰nchoo emisimisu nkonyek enye pee medolishoyu, neirrugori too nkoriong'i te nkaraki nyamalaritin enye ntarasi.”

¹¹Naikilikuanu naa ajo, amaa, amu etabatatate Ilyahudi teine metaa meekure esarunoyu? Mme nejia pae! Kake te nkaraki natagolo onyek pee eewuo enjeunoto Iloreren, peyie epiki Siraeli olom.

¹²Amaa te nenyaaka taata engolon enye oo nkonyek aaku enkarsisisho too loreren, naa amaa te netaa ina natalaikinote ninche naitaa Iloreren karsisi, kebaa kenya elusoo ina nayau emborei e ning'oto te nening'ishoyu ninye?

¹³Ore taata, intae Iloreren airorie. Naa te nkaraki nara nanu olkipaaret oirriwakaki Iloreren, esiaai ai aitasapuk

¹⁴peyie atumoki atipika Ilyahudi lang olom, pee ebaiki neitajeu ina kulikae lenye.

¹⁵Amu te naa ina natanyaita ninche nayaka enkop metoning'ore Enkai, keeta ae nayau enyorrarroto enye neme empiunoto too lootuata?

¹⁶Te nesinya eoroti e nkurma naipurji naiteri aaisho Enkai aaitaa ilng'anayio ooiteruni aatum, nesinya sii ninye enkae lulung'ata pooki; naa te nesinya ntona o lchani, nesinya sii ninche ilng'osil.

¹⁷Kake amaa te netigiluaki kulikae ng'osil, ore iyie olng'osila lo loirien le ntim, nikirubakini ine netigilunyeki pee king'arieki ina arsisisho e ilo oirien,

¹⁸nimiwuasa naa ake tialo lelo kulikae ng'osil. Naa ti niwuasa, tadamu tejo mme iyie doi onapita ina tonai, kake ina tonai nikinapita.

¹⁹Naa iyie oyooki ajo, “Etigiluaki ilng'osil peyie aarubakini nanu.”

²⁰Nesipa ina. Etigiluaki te nkaraki neitu eiruk, kake te nkirukoto ake sii pee intashe iyie. Metaa miwuasa ake iyie, kake tureisho nintashe.

²¹Amu te neitu eing'urrie Enkai ilng'osil ate le ilo shani, mikiduaaya sii ninye iyie.

²²Toduaa naa olng'ur o empijan e Nkai, ina pijan enye te lelo ootabatatate, kake ore olng'ur le Nkai, tenebik tiatua iyie, te neme nejia nikidung'ori sii ninye iyie.

²³Naa ore sii ninche lelo kulikae, te neibelekenya aapal ina neitu eiruk, kerubakini sii ninche, amu keeta Enkai engolon naitoki arubakinye ninche.

²⁴Amu ti nikitudung'uoki to loirien le ntim, nikipuonunui aarubaki oloirien oramati, kebaa naa etumoki lelo ng'osil le ilo oirien oramati enkibung'ata einyiaakaki ilo oirien liopeny.

²⁵Ore pee miakuku iloowuasa te ng'eno inyi, kayieu niyiolouu ena naisudoro, ilalashera laainei, nchere einepua engoloto ae shoto e nkop oo Siraeli, o metaba anaa neiputayu esiana oo Loreren oopuonu,

²⁶neaku keitajeuni kenya ake Siraeli pooki; anaa enatisiraki aajo; “Ekelotu Olasarunoni eing'uaa Sion, neoru Yakobo enkiba naiba Enkai;

²⁷naa nelo osotua lai o ninche ina kata alotu aiwuang'ie iung'ok enye.”

²⁸Ore tialo ororei supat, ilmang'ati le Nkai ninche, naa te nkaraki intae; kake ore te nkalo e ngelunoto nenyorri te nkaraki lekua loo menye.

²⁹Amu meibelekenyayu nkishorunot aashu engelunoto e Nkai.

³⁰Ore anaa enapa nining'ining'i intae Enkai nitang'amutua olng'ur lenye te nkaraki natagolong'utua ninche,

³¹nejia sii taata etiu, ore te nkaraki engolong'u enye neing'urrieki intae naa keyookini aaing'urrie sii ninche.

³²Amu eteenikia Enkai ltung'ana pooki engolong'u pee etum aing'urrie pooki.

³³Wooi kebaa enguton o enkarsisisho o enkarriyiano e ng'eno nagut e Nkai! Mejurrunoyu inkiguanat enyena nemeturunoyu inkoitoi enyena!

³⁴“Amu ai ng'ae doi otayiolo oltau le Nkai amu ai ng'ae otaa oloiguen ninye?”

³⁵“Amaa, ai ng'ae oishoo ninye enkishorunoto metaa keyookini aalaaki?”

³⁶Amu ninye eing'uaa naa ninye eimu naa enetii ninye epuo intokitin pooki. Metaa enenye enkitoo ntarasi. Eesai.