2 Corinthians 7

¹Yaa michoota ko! Abdii kana erga qabaannee, kottaa, waanuma dhagna keenyaa fi hafuura keenya xureessuttii of in qulleessina; Waaqayyoon sodaachuutti jiraachuudhaanis qulqullummaa fiixaan in baafanna.

²Garaa nutti bal'adhaa! Nuyi nama tokko iyyuu hin yakkine, nama tokko iyyuu amala hin balleessine, nama tokko iyyuu gowwoomsinee waa irraa hin nyaanne.

³Kanas dubbachuun koo yakka isinitti muruudhaaf miti; akkuman kanaan dura jedhe, nuyi isinii wajjin du'uudhaaf isinii wajjin jiraachuudhaafis isinitti garaa bal'anneerra.

⁴Ani waanan isin amanadhuuf mul'isee isinitti nan dubbadha; isiniinis guddiseen of jaja. Garaa guutuudhaan nan jajjabaadha; rakkina keenya hundumaa keessattis, gammachuun koo irra-darbaa dha.

⁵Erga Maqedooniyaa geenyee iyyuu nuyi boqonnaa hin arganne; waan hundumaatti karaa alaa lolaan, karaa keessaa sodaadhaan rakkachaa turre.

⁶Waaqayyo inni warra yaadni isaanii gad qabame jajjabeessu garuu, dhufa Tiitoosiin nu jajjabeesse.

⁷Dhufa isaa duwwaadhaan miti, jajjabina inni ofii waa'ee keessaniif argateenis jajjabaadheera; Tiitoos ana yaaduu keessan, gadduu keessan, hinaaffaa isin anaaf qabdanis yommuu anatti hime, ani caalaa nan gammade.

⁸Caaffata kootiin yoon isin gaddisiise iyyuu ani amma hin gaabbu; yeroodhaaf isin gaddisiisuu isaa yommuun arge illee gaabbeen ture.

⁹Amma garuu waanan isin gaddisiiseef utuu hin ta'in, gaddi keessan yaada garaa keessanii akka geddarattan waan godheef nan gammada; wanta nuyi hojjenneen karaa kam illee akka hin miidhamnetti gaddi keessan isa Waaqayyo biratti fudhatamu ture.

¹⁰Akka Waaqayyo biratti fudhatamutti gadduun, yaada garaa geddarachuu fida; inni immoo gara fayyinaatti geessa malee, nama hin gaabsiisu; akka biyya lafaa keessatti fudhatamutti gadduun garuu du'a fida.

¹¹Egaa akka Waaqayyo biratti fudhatamutti gadduun keessan dhimmamuu attamii, falmachuudhaafis duudhamuu attamii, dheekkamsa attamii, naasuu attamii, ana yaaduu attamii, hinaaffaa attamii, adaba attamii akka isin keessaa kaase ilaalaa! Karaa hundumaas isin dubbii kanatti yakka akka hin qabne argisiiftaniittu.

¹²Ani kana yoon isiniif caafe iyyuu, hinaaffaan isin nuyiif qabdan Waaqayyo duratti isinumatti akka mul'atuuf malee, isa balleesseef yookiis isa itti balleeffameef jedhee miti.

¹³Kanatti nuyi jajjabina arganneerra. Jajjabina ofii keenyaa itti gammanne irratti immoo, isin hundumti keessan yaada isaa waan ciibsitaniif gammachuu Tiitoositti nuyis caalchifnee gammanneerra.

¹⁴Isiniin akkan of jaju isatti himeen ture, isinis ana hin qaanessine; akkuma wanti nuyi isinitti himne hundinuu dhugaa ture, wanti nuyi Tiitoos duratti of jajaa turres dhugaa ta'e.

¹⁵Akka itti isin hundumti keessan barsiisa isaatiif abboomamtan, sodaadhaa fi rom'aanis akka isa simattan yommuu yaadatu, isa durii caalaa garaan isaa isin bira in jiraata.

¹⁶Anis waan hundumaatti isin amanachuu waanan danda'uuf nan gammada.