John 4

¹Yesus yommus Yohannis irra kan caalu bartoota dabalachaa, cuuphaas akka ture warri Fariisotaa dhaga'uu isaanii, Yesusis in bare.

²Utuma ta'uu iyyuu bartoota isaatu cuuphe malee Yesus ofii isaatii hin cuuphne ture.

³Kana booddee inni kutaa biyya Yihudaa dhiisee Galiilaa dhaqe.

⁴Yeroo achi dhaqu immoo Samaariyaa keessa darbuun isa irra ture.

⁵Kutaa biyya Samaariyaa keessaa gara mandara Siikaar jedhamu tokkoo dhufe; mandarichi lafa isa Yaaqoob ilma isaa Yoseefiif kennetti dhi'oo dha.

⁶Bishaan boollaa Yaaqoob achi ture. Yesus karaa adeemaa oolee waan dadhabeef, boolla bishaanii sana bukkee taa'e; yeroon isaas akka sa'aatii ja'aa ture.

⁷Dubartiin Samaariyaa tokkos bishaan waraabbachuudhaaf dhufte; yommus Yesus, ?Bishaan dhugaatii anaaf kenni!? ittiin jedhe.

⁸Bartoonni isaa nyaata bituudhaaf gara mandaraa dhaqanii turan.

⁹Dubartiin Samaariyaa sun, ?Attamitti ati Yihudii taatee, ana dubartii Samaariyaa bishaan dhugaatii gaafatta?? ittiin jette. Yihudoonni warra Samaariyaa wajjin qodaa tokkotti hin sooratan.

¹⁰Yesus immoo deebiseefii, ?Kennaa Waaqayyoo utuu beektee, inni ?Bishaan dhugaatii anaaf kenni!? siin jedhe kunis eenyu akka inni ta'e utuu hubattee, silaa situ isa kadhata, inni immoo bishaan yeroo hundumaa jiraatu siif in kenna ture? jedheen.

¹¹Dubartittiin kana irratti, ?Yaa gooftaa, atoo waan ittiin budduqsitu hin qabdu, boolli bishaanichaa immoo gad fagoo dha, bishaan yeroo hundumaa jiraatu sana eessaa fidda ree?

¹²Abbaa keenya Yaaqoob isa bishaanicha dhugee, ijoolleen isaa, horiin isaas dhuganii, boolla bishaanichaa immoo nuuf kenne in caaltaa?? jetteen.

¹³Yesus immoo, ?Bishaan kana irraa kan dhugu hundinuu deebi'ee in dheebota;

¹⁴bishaan isa ani kennuufiif jiru irraa inni dhugu garuu, bara baraan hin dheebotu; bishaan inni ani kennuufiif jiru, isa keessatti burqaa bishaanii isa jireenya bara baraatiif burqu in ta'ao? ittiin jedhe.

¹⁵Kana irratti dubartittiin, ?Yaa gooftaa! Deebi'ee akka ani hin dheebonneef, bishaan waraabbachuufis akka ani as hin dhufneef, bishaan kana anaaf kenni!? jetteen.

¹⁶Yesus immoo, ?Dhaqi! Abbaa manaa kee waamii kottu!? jedheen.

¹⁷Dubartittiin deebiftee, ?Anoo abbaa manaa hin qabu? jetteen; Yesus immoo, ?Isa ?Abbaa manaa hin qabu? jette, ba'eessa dubbatte.

¹⁸Abboota manaa shan qabda yoo turte iyyuu, inni amma sii wajjin jiru abbaa manaa kee miti'o; kana dhugaa dubbatte? ittiin jedhe.

¹⁹Kana irratti dubartittiin, ?Akka ati raajii taate nan arga, yaa gooftaa.

²⁰Abboonni keenya gaara kana gubbaatti in sagadu; isin warri Yihudootaa immoo ?Lafti itti Waaqayyoof sagaduun ta'u Yerusaalem keessa jira? jettu? ittiin jette.

²¹Yesus yommus, ?Dubartii nana, yeroon itti isin gaara kana gubbaatti yookiis Yerusaalemitti abbaadhaaf hin saganne dhufuuf jira; na amani!

²²Isin waan hin beeknetti sagaddu, nuyi garuu waan beeknutti saganna, fayyinni Yihudoota keessaa in dhufa.

²³Yeroon itti warri dhuguma sagadan, hafuuraa fi dhugaadhaan abbaadhaaf sagadan garuu in dhufa; innis ammuma iyyuu ga'eera. Abbaanis warra akkasitti isaaf sagadan in barbaada.

²⁴Waaqayyo hafuura; warri isaaf sagadanis hafuuraa fi dhugaadhaan isaaf sagaduun in ta'aaf? ittiin jedhe.

²⁵Dubartittiin immoo deebiftee, ?Masiihiin inni Kristos jedhamu akka dhufu anuu beeka; inni gaafa dhufe waan hundumaa nutti in hima? jette.

²⁶Yesus yommus, ?Inni amma sii wajjin dubbachaa jira; kunoo ani isa? ittiin jedhe.

²⁷Yeroo kanatti bartoonni isaa deebi'anii dhufan; dubartii wajjin dubbachuu isaatiifis in dinqifatan, garuu isaan keessaa tokko illee, maal akka isheen barbaaddu, yookiis maaliif akka inni isheedhaa wajjin dubbatu hin gaafanne.

²⁸Dubartittiin yommus okkotee ishee achumatti dhiifte, gara mandaraa dhaqxee namootattis dubbattee,

²⁹?Kottaa namicha, waan ani kanaan dura hojjedhe hundumaa anatti hime tokko ilaalaa; kun Kristos laataa?? jette.

³⁰Namoonni yeroo sanatti mandaricha keessaa ba'anii, gara isaa dhufuutti ka'an.

³¹Kana gidduutti bartoonni isaa, ?Yaa barsiisa, waa nyaadhu!? jedhanii isa in kadhatu turan.

³²Inni garuu deebisee, ?Ani nyaata isin hin beekne kanan nyaadhu qaba? isaaniin jedhe.

³³Yommus bartoonni, ?Namni nyaata fideef jiraa ree?? waliin jedhan.

³⁴Yesus immoo, ?Nyaanni kan koo jaalala isa na ergee gochuudhaaf hojii isaa raawwachuu dha.

³⁵Isin amma, ?Haamaan ji'a afur booddee in ta'a? jettu mitii? Ija keessaniin maasicha ilaalaa! Ani immoo, midhaan ammuma iyyuu bilchaatee, haamaan akka ga'e kunoo isinittan beeksisa.

³⁶Inni haamu gatii isaa in argata, ija midhaanichaas jireenya bara baraatiif walitti in qaba; kunis inni facaasuu fi inni haamu walii wajjin akka gammadaniif in ta'a.

³⁷Egaa mammaaksichi, ?Namni tokko in facaasa inni kaan immoo in haama? jedhu sun kanaan dhugaa in ta'a.

³⁸Waan itti hin dadhabin akka haamtaniifan isin erge; warri kaan itti dadhabaniiru, isin immoo isa isaan itti dadhabanitti galtan? isaaniin jedhe.

³⁹Sababii dubartittiin, ?Waan ani kanaan dura hojjedhe hundumaa anatti hime? jettee dhugaa baateef, mandara sanaa warri Samaariyaa baay'een isatti amanan.

⁴⁰Warri Samaariyaa kunis yeroo isa bira ga'an, isaan bira akka turuuf Yesusin kadhannaan, inni guyyaa lamaaf isaan bira ture.

⁴¹Namoonni sonaan baay'eenis dubbii isaatiif jedhanii itti amanan.

⁴²Jarri garuu dubartittiidhaan, ?Egaa nuyi si'achi waan ati dubbatteef amanna miti; nuyi ofuma keenyaa dhageenyeerra, inni kun dhuguma fayyisaa biyya lafaa akka ta'es in beekna? jedhan.

⁴³Guyyaa lamaan sana booddees Yesus achii ba'ee kutaa biyya Galiilaa dhaqe.

⁴⁴Innumtuu ofii isaatii illee raajiin tokko biyya isaa keessatti akka hin fudhatamne dubbatee ture.

⁴⁵Warri Galiilaas gara ayyaanichaatti ol ba'anii, guyyaa ayyaanaa sana Yerusaalemitti kan inni hojjete hundumaa waan arganiif, yeroo inni Galiilaa ga'e isa siman.

⁴⁶Inni deebi'ee Qaanaa Galiilaa, iddoo itti bishaan daadhii wayniitti geddare in dhufe; Qifirnaahomis namichi mootiidhaaf hojjetu tokko ture; ilmi isaa duraa dhukkubsatee ture.

⁴⁷Yesus Yihudaadhaa Galiilaa dhufuu isaa yommuu dhaga'es, namichi gara isaa dhaqee Qifirnaahomitti gad bu'ee, akka inni ilma isaa isa du'atti dhi'aate fayyisuuf Yesusin kadhate.

⁴⁸Yesus immoo, ?Silaa isin milikkitaa fi dinqii yoo arguu dhabaattan hin amantan? jedheen.

⁴⁹Namichi mootiidhaaf hojjetu sunis, ?Yaa gooftaa kottu, mucaan koo utuu hin dui'n gad bu'i!? jedheen.

⁵⁰Yesus immoo, ?Dhaqi! Ilmi kee siif in jiraata? ittiin jedhe; namichis dubbicha Yesus isatti dubbate amanee dhaqe.

⁵¹Gara manaatti utuu inni adeemaa jiruu, hojjetoonni isaa karaatti itti dhufanii, ilmi isaa du'a akka oole itti himan.

⁵²Inni immoo sa'aatii mucichi itti foyya'e isaan irraa qorannaan, isaan immoo ?Kaleessa sa'aatii torbaffaatti dhagna gubaan isa dhiise? jedhaniin.

⁵³Yommus abbaan mucichaa yeroo itti Yesus, ?Ilmi kee siif in jiraata? ittiin jedhetti ta'uu isaa hubate; kana irratti inni, namoonni isaa hundinuus in amanan.

⁵⁴Yesus Yihudaadhaa gara Galiilaatti erga deebi'ee, kanaan milikkita lammaffaa gochuu isaa ti.