1 John 2

¹Bana banje bato, ndabandikiye ivyo kugira ngo ntimukore icaha. Kandi ni hagira umuntu akora icaha, dufise Umwitsa kuri Data wa twese, ni Yesu Kristo umugororotsi,

²kandi uwo ni we ndishi y'ivyaha vyacu, mugabo si iyo ivyacu twenyene, ariko ni iyo ivyo abari mw'isi bose.

³Iki ni co kitumenyesha ko tumuzi, ni twitondera ivyagezwe na we.

⁴Uwuvuga ngo Ndamuzi, ntiyitondere ivyagezwe vyiwe, ni umubeshi, ukuri ntikuri muri we.

⁵Ariko uwitondera ijambo ryiwe wese, ugukunda Imana kuba guhinguwe muri we vy'ukuri. Iki ni co kitumenyesha ko turi muri we;

⁶uwuvuga ko ahora muri we, akwiye na we kugenda nk'uko uwo yagenda.

⁷Abo nkunda, si icagezwe gishasha ndabandikiye, ariko ni icagezwe ca kera, mwamanye uhereye mu bihe vya kera. Ico cagezwe ca kera ni co rya jambo mwumvise.

⁸Kandi ndabandikira icagezwe gishasha, kandi ico n'ico ukuri muri we no muri mwebwe. Kuko umwiza uriko urashira, umuco w'ukuri umaze kwaka.

⁹Uwuvuga ko ari mu muco, akanka umuvukanyi wundi, aba akiri mu mwiza gushika n'ubu.

¹⁰Uwukunda umuvukanyi wundi aguma mu muco, nta gitsitaza kiri muri we.

¹¹Ariko uwanka umuvukanyi wundi ari mu mwiza, kandi agendera mu mwiza, ntazi iyo aja, kuko umwiza wamuhumishije amaso.

¹²Ndabandikiye bana bato, kuko mwahariwe ivyaha vyanyu kubwo izina ryiwe.

¹³Ndabandikiye ba se, kuko mwamenye uwamyeho mu ntango. Ndabandikiye misore, kuko mwanesheje wa Mubi. Narabandikiye bana bato, kuko muzi Data wa twese.

¹⁴Narabandikiye ba se, kuko muzi uwamyeho mu ntango. Narabandikiye misore, kuko mufise inkomezi, kandi ijambo ry'Imana rikaguma muri mwebwe, kandi mwanesheje wa Mubi.

¹⁵Ntimugakunde isi, canke ibiri mw'isi. Umuntu ni yakunda isi, ugukunda Data wa twese ntikuzoba kuri muri we.

¹⁶Kuko ikiri mw'isi cose ari ivyifuzo vy'umubiri, ivyifuzo vy'amaso n'ubwibone bw'ubu bugingo, bitanduruka kuri Data wa twese, ariko vyanduruka mw'isi.

¹⁷Kandi isi iriko irashirana n'ivyifuzo vyayo, ariko uwukora ivyo Imana igomba yamaho ibihe bidashira.

¹⁸Bana bato, ubu ni igihe c'iherezo; kandi nk'uko mwumvise yuko Antikristo azoza, n'ubu hamaze guseruka ba Antikristo benshi. Ni co gitumye tumenya ko ari igihe c'iherezo.

¹⁹Bavuye muri twebwe, ariko ntibari abacu. Iyo baba bari abacu, baba baragumanye natwe; ariko icatumye batuvamwo kwari ukugira ngo bahinyuke bose ko atari abacu.

²⁰Namwe mwarobanujwe amavuta n'Uwera, kandi muzi vyose.

²¹Sindabandikiye kuko mutazi ukuri, ariko ni uko mukuzi, kandi kuko ata binyoma biva mu kuri.

²²Umubeshi ni nde, atari uwuhakana ko Yesu ari Kristo? Ni we Antikristo, ahakana Data wa twese n'Umwana.

²³Umuntu wese ahakana Umwana, na Data wa twese ntamufise. Uwemera Umwana afise na Data wa twese.

²⁴Mweho ico mwumvise uhereye ku va mu ntango kigume muri mwebwe. Ico mwumvise uhereye mu bihe vya kera ni caguma muri mwebwe, namwe muzoguma mu Mwana no muri Se.

²⁵Iri ni ryo sezerano yadusezeraniye, n'ubugingo budashira.

²⁶Ivyo ni vyo ndabandikiye ku vy' abobazimiza.

²⁷Mweho ukurobanuzwa amavuta mwarobanujwe na we kuguma muri mwebwe, namwe ntimurinda kugira uwo kubigisha, ariko nk'uko ukwo kubarobanura kwiwe kubigisha vyose, kandi ari uko ukuri, atari ibinyoma, kandi nk'uko kwabigishije, ni ko muguma muri we.

²⁸Na none bana bato, mugume muri we, kugira ngo ni yahishurwa tuzoshire ubwoba, ntidutetererwe imbere yiwe aho azozira.

²⁹Ko muzi yuko uwo ari umugororotsi, murazi yuko uwukora ivyo ukugororoka wese yavyawe na we.