1 Peter 4

¹Nuko kuko Kristo yababarijwe mu mubiri, mwitwaze nk'ibirwanisho bene uwo mutima, kuko uwubabarijwe mu mubiri aba amaze kureka icaha,

²kugira ngo amare imisi isigaye akiri mu mubiri atagikorera ivyifuzo vy'abantu, ariko akora ivyo Imana igomba.

³Kuko igihe cashize gihagije gukora ivyo abanyamahanga bakunda gukora, no kugendera mu ngeso z'isoni nke, izo kwifuza, kunohorwa n'umuvinyu, kudandahirwa, kurundana aho bateretse n'ibizira vyo gusenga ibigirwamana.

⁴Birabatangaza yuko mudafatanya na bo kwirukira mu birenze urugero vy'ubuhumbu, bakabadendereza;

⁵mugabo ni bo bazobazwa ivyo n'uwiteguye kuzoca imanza z'abakiriho n'abapfuye.

⁶Kuko icatumye abapfuye na bo babariwe ubutumwa bwiza kwari ukugira ngo bacirirwe imanza mu mubiri mu buryo bw'abantu, ariko babeho mu mpwemu mu buryo bw' Imana.

⁷Ariko umuhero wa vyose uri hafi. Nuko ni mwitonde rero, mwirinde, kugira ngo mubone uko mushishikara gusenga.

⁸Ikiruta vyose, mukovye mu gukundana, kuko urukundo rupfuka ivyaha vyinshi.

⁹Muhane indaro mutidodomba.

¹⁰Nk'uko umuntu wese yagabiwe ingabire muzifashishe abandi, nk'uko bibereye ababwiriza beza b'ubuntu bw'Imana bw'uburyo bwinshi.

¹¹Umuntu iyo avuze, avuge nk'uwubivugishijwe n' Imana; umuntu iyo agaburira abandi, agabure nk'uwufise ubushobozi Imana itanga; kugira ngo Imana iterwe icubahiro muri vyose, kubwa Yesu Kristo, afise icubahiro n'ububasha ibihe bitazoshira. Amina.

¹²Abo nkunda, umuriro uri hagati yanyu wo kubagerageza ntukabatangaze, nk'aho mubonye akatabonetse.

¹³Ariko munezerezwe n'uko mufatanije n'imibabaro ya Kristo, kugira ngo no mu gihe co guhishurwa kw'ubwiza bwiwe muzonezerwe muhimbarwe.

¹⁴Iyo mututswe muhowe izina rya Kristo, muba muhiriwe; kuko Mpwemu w'ubwiza, ari we Mpwemu w'Imana, aba kuri mwebwe.

¹⁵Ntihakagire umuntu wo muri mwebwe ahorwa kuba umwicanyi, igisuma, inkozi y'ikibi canke kwita mu vyo atagezwemwo.

¹⁶Ariko ni hagira uwuhorwa kuba Umukristo, ntamaramare, ariko aheshe Imana icubahiro kubwo iryo zina.

¹⁷Kuko igihe gishitse c'uko urubanza rutangurira mu b'inzu y'Imana, none ko rutanguriye kuri twebwe, iherezo ry' abatumvira ubutumwa bwiza bw' Imana rizomera rite?

¹⁸Kandi ko umugororotsi akizwa agarukiye ku manga, uwutubaha Imana n'umunyavyaha bazoboneka hehe?

¹⁹Nuko rero abababazwa nk'uko Imana igomba ni babitse ubugingo bwabo uwo Muremyi wo kwizigirwa, bakore ivyiza.