1 Timothy 5

¹Ntuhambarire umutama, ariko umuhanure nka so, abakiri bato n'imisore ubahanure nk'abavukanyi bawe.

²Abatamakazi nyene ubahanure nka ba nyoko, abakiri bato n'abigeme nka bashiki bawe, uri n'umutima utanduye na gatoya.

³Wubahe abapfakazi b'inyakamwe vy'ukuri.

⁴Ariko, umupfakazi wese, namba afise abana canke abuzukuru, ni babanze kwiga kwubaha Imana ku vyo bagirira ababo, no kwishura ivyiza abavyeyi babo; kuko ivyo ari vyo bishimwa mu maso y'Imana.

⁵Umupfakazi w'inyakamwe asigaye ari umwe, yizigira Imana, agashishikara kwinginga no gusenga ku murango no mw'ijoro.

⁶Ariko, uwihaye ukwifuza aba apfuye ahagaze.

⁷Ubabwirize ivyo, kugira ngo ntibabeko umugayo.

⁸Ariko umuntu ni atatunga abo mu nzu y'i wabo, canecane abiwe, azoba yihakanye ukwizera, kandi azoba abaye hanyuma y'uwutizera.

⁹Ntihakagire umupfakazi yandikirwa gufashwa ataramara imyaka mirongo itandatu y'amavuka, kandi handikwe uwari afiswe n'umugabo umwe gusa.

¹⁰Handikwe uwushimirwa ibikorwa vyiza, namba yararera abana, namba yaratanga indaro, yaroza ibirenge vy'abera, yarafasha abababaye, yarashishikara gukurikira ibikorwa vyiza vyose.

¹¹Ariko abapfakazi bakiri bato ntubemerere, kuko kwifuza kw'umubiri ni kwamara kubatera kugarariza Kristo bazogomba kurongorwa,

¹²bagatsindwa n'urubanza kuko bavuye mw'isezerano ryabo rya mbere.

¹³Kandi ikindi, biga kugira ubunebwe, bagenda imihana; ariko rero si ubunebwe gusa, ikigeretseko bararegeteranya bita mu bitari ivyabo, bavuga ivyo badakwiye.

¹⁴Ni co gituma ngomba ko abapfakazi bakiri bato barongorwa, bakavyara abana, bakubaka ingo zabo, ntibahe umwansi urwitwazo rw'ibitutsi.

¹⁵Kuko n'ubu bamwe bamaze guta inzira, ngo bakurikire Satani.

¹⁶Umugore wese yizera namba afise incuti z'abapfakazi, abafashe, ishengero ntiriremerwe, ribone gufasha abapfakazi b'inyakamwe.

¹⁷Abakuru b'ishengero baganza neza ni babiyumvire ko bakwiye guhabwa icubahiro kirushiriza, kandi canecane abacumukura mu kuvuga ijambo ry'Imana no mu kwigisha.

¹⁸Kuko icanditswe kivuga, ngo Ntimuzorumye umunwa w'inka iriko irasekura ingano; kandi ngo Umukozi akwiye ingero yiwe.

¹⁹Umukuru ntukemere ico bazomukuregako hatabonetse ivyabona bibiri canke bitatu.

²⁰Abakora ivyaha ubahanire mu maso ya bose, kugira ngo abandi na bo batinye.

²¹Ndakwihanikiririza mu maso y'Imana na Yesu Kristo n'imbere y'abamarayika batoranijwe, witondere ivyo, ntuce urwo umwe, ntukore ivyo guca urwa nkunzi.

²²Ntukagire umuntu wihutira kurambikako ibiganza, kandi ntugafatanye n'abandi mu vyaha vyabo. Uzokwame wirinda ubuhumane.

²³Uhereye ubu ntunywe amazi gusa, ariko unywe n'utuvinyu dukeya kubwo mu nda hawe, kuko urwaragurika.

²⁴Hari abantu ivyaha vyabo biboneka bikabatanga mu kuja mu rubanza; hari n'abandi bibaza inyuma.

²⁵Kandi ibikorwa vyiza na vyo ni uko, hari ibiboneka; kandi n'ibitameze bityo ntibishobora kunyegezwa.