2 Corinthians 12

¹Numva mpambirwa kwirata, naho bitagira ikimazi. Ariko ngira mvuge ivyo kwerekwa no guhishurirwa n'Umwami wacu.

²Ndazi umuntu wo muri Kristo, yaduganywe akajanwa mw'ijuru rya gatatu, ubu hashize imyaka icumi n'ine—namba yari mu mubiri sindabizi; canke namba atari mu mubiri sindabizi, bizi Imana.

³Kandi nzi yuko uwumeze atyo—namba yari mu mubiri, canke Namba atari mu mubiri, sindabizi, bizi Imana—

⁴yaduganywe, akajanwa muri Paradiso, akumva ibitovugwa, ivyo umuntu atemererwa kuvuga.

⁵Kubwo umuntu ameze atyo ndirata, ariko ku bwanje sinokwirata, atari intege nke zanje.

⁶Kandi nogomvye kwirata sinobaye ndi igipfu, kuko noba mvuga ukuri. Ariko nsizeho kugira ngo ntihagire uwunyiyumvira ibiruta ivyo ambonako canke ivyo anyumvako.

⁷Kandi kugira ngo sinterwe kwishira hejuru birenze urugero, ndabitewe n'uko nahishuriwe ibirushiriza kuba ibihambaye, ni co catumye mpabwa igisata mu mubiri, intumwa ya Satani yo kunkubita ibipfunsi, ngo sinterwe kwishira hejuru birenze urugero.

⁸Kandi kuri ivyo natakambiye Umwami wacu gatatu ngo kimvemwo.

⁹Arambarira ati: “Ubuntu bwanje buraguhagije; kuko ubushobozi bwanje buhingurirwa mu ntege nke.” Nuko canecane nzonezererwa kwirata intege nke zanje, ngo ubushobozi bwa Kristo bunzeko.

¹⁰Ni co gituma kubwa Kristo nzonezererwa intege nke zanje, no gukubagurwa, n'imibabaro, no guhigwa, n'ivyago; kuko iyo mbaye umunyantege nke ari ho ndushiriza kugira ubushobozi.

¹¹Mbaye igipfu, ni mwebwe mwabinteye, kuko ivyari bikwiye ari uko mba narashimagijwe namwe. Za ntumwa zihambaye cane nta co zindushije, naho ndi ubusa.

¹²Ni ukuri ivyerekana intumwa vyakorewe hagati yanyu mu kwihangana kwose, ni vyo bimenyetso n'ibitangaza n'ibikorwa bikomeye.

¹³Ayandi mashengero yabarushije iki, atari uko jewe ubwanje ntababereye ikirusha? Mumparire ico caha!

¹⁴Ehe niteguye kuza i wanyu ubugira gatatu; sinzoba nje kubaremereza ivyo mu mpa. Kuko atari ivyanyu ndondera ariko ni mwebwe ubwanyu ndondera; kuko abana badakwiye kuziganiriza abavyeyi, ariko abavyeyi ni bo bakwiye kuziganiriza abana.

¹⁵Ku bwanje nzonezererwa cane gutanga ivyanje, no kwitanga rwose, nitangira ubugingo bwanyu. Mbega ko ndushiriza kubagirira urukundo, none urwo nkundwa rugabanuke?

¹⁶Ivyo vyo birahaye; ubwanje sinabaremereye; ariko, ko naciye mu kandi kenge, ubuhinga ubugunge.

¹⁷Mbega mu bo nabatumyeko hari umuntu natumye kubaka inyungu?

¹⁸Nagishije inama Tito, ndamurungikana; na wa muvukanyi wundi. Hari inyungu Tito yabatse? Ntitwagendeye muri Mpwemu umwe? Ntiyageze ikirenge mu canje?

¹⁹Uhereye kera mwiyumvira yuko tubiregurako. Imbere y'Imana no muri Kristo ni ho tuvugira. Ariko yemwe abo nkunda, vyose tubivugiye kubakomeza.

²⁰Kuko binteye akoba yuko, aho nzozira, kumbure nzosanga mumeze uko ntagomba, nanje muzosanga meze uko mutagomba; kandi yuko kumbure hazoba imitongano, ishari, ishavu, ikeba, ukuvuga abandi nabi, insaku, ukwihimbariza ubusa n'imivurungano;

²¹kandi yuko, aho nzozira, Imana yanje izosubira kuncisha bugufi muri mwebwe, nanje nkazoririra benshi bacumuye kera, ntibihane ivyonona, n'ubushakanyi, n'ivyo isoni nke bakoze.