2 Corinthians 4

¹Ni co gituma tutihebura, kuko dufise ubwo busuku, nk'uko twagiriwe ikigongwe.

²Twanse ibiteye isoni bikorerwa mu mpisho, ntitugenda mu bugunge, ntidufudika ijambo ry'Imana, ariko kwerekana ukuri ni kwo twishimagirisha mu maso y'Imana ku mutima w'umuntu wese.

³Ariko namba ubutumwa bwiza twahawe butwikirwa, butwikirirwa abahona,

⁴ni bo batizera, bamwe ikigirwamana c'iki gihe cahumye imitima, ngo umuco w'ubutumwa bw'ubwiza bwa Kristo ntubakire, ni we shusho y'Imana.

⁵Kuko tutigisha abantu ivyacu, ariko tubigisha ivya Kristo Yesu ko ari we Mwami, natwe yuko turi abashumba banyu ku bwa Yesu.

⁶Imana, imwe yavuze ngo umuco wake, uvuye mu mwiza, ni yo yakiye mu mitima yacu, kwerekana umuco, ni wo kumenya ubwiza bw'Imana buri mu maso ha Yesu Kristo.

⁷Ariko dufise ubwo butunzi mu nzavya z'ibumba, ngo ubushobozi buhebuje bube ubwo Imana, butavuye kuri twebwe.

⁸Dusugerezwa impande zose, ariko ntidushika mu mpatane; turazazanirwa, ariko ntituranduka umutima;

⁹turahamwa, ariko ntiduhebwa; dukubitwa hasi, ariko ntitugwaho.

¹⁰Imisi yose tugendana mu mubiri urupfu rwa Yesu, ngo ubugingo bwa Yesu na bwo buserukire mu mubiri wacu.

¹¹Kuko twebwe abariho, na ntaryo dutangwa ngo dupfe baduhora Yesu, ngo ubugingo bwa Yesu na bwo buserukire mu mubiri wacu uzopfa.

¹²Nuko rero urupfu rudukoreramwo, ariko ubugingo bubakoreramwo.

¹³Ariko ko dufise uwo mutima wizera, uboneka mu vyanditswe, ngo nizeye, ni co catumye mvuga; natwe nyene turizera, ni co gituma tuvuga.

¹⁴Kuko tuzi yuko iyazuye Umwami Yesu, natwe izotuzurana na Yesu, kandi izomudushira, twe namwe.

¹⁵Kuko ivyo vyose biba ku bwanyu, kugira ngo ubuntu bw'Imana bwongeranishwe n'ukugwira kw' abantu, bugwize ishimwe, ngo ritere Imana icubahiro.

¹⁶Ni co gituma tutihebura; ariko, naho umuntu wacu wo ku rukoba ariko arabora, umuntu wacu w'imbere yama ahinduka musha uko bukeye.

¹⁷Kuko amarushwa yacu ahwahutse y' akanya ka none yiyongeranije cane kudushikiriza ubwiza buremereye bw'ibihe bidashira.

¹⁸Natwe ntituraba ku biboneka, ariko turaba ku bitaboneka; kuko ibiboneka ari ivyo igihe gito, ariko ibitaboneka bikaba ivyo ibihe bidashira.