Acts 23

¹Pahulo ahanga amaso abacamanza, arababwira ati: “Bagabo bavukanyi, namanye umutima utarimwo ijwi rinyagiriza ikibi na kimwe imbere y'Imana gushitsa kuri uwo musi.”

²Ananiya umuherezi mukuru abarira abamuhagaze i ruhande kumukubita ku munwa.

³Maze Pahulo aramubwira ati: “Imana izogukubita, wa rusika rukuyengejeko ingwa, mbega wewe ko wicaritswe no kuncira urubanza nk'uko ivyagezwe biri, ugatako ukavuga ko bankubita ukanyuranya n'ivyagezwe?”

⁴Abari bahagazeho bati: “Mbega uratuka umuherezi mukuru w'Imana?”

⁵Pahulo ati: “Sinari ndamuzi, bavukanyi, ko ari umuherezi mukuru; kuko handitswe ngo Ntukavuge nabi umukuru wo mu bwoko bwanyu.”

⁶Maze Pahulo amenye yuko umuce umwe ari uwo Abasadukayo, uwundi ari uwo Abafarisayo, ashira ijwi hejuru mu bashingantahe ati: “Bagabo bavukanyi, ndi Umufarisayo, ndi umwana w'Abafarisayo; ivyo ivyizigiro vy'ibizoba n'ukuzuka kw'abapfuye ni vyo bimpagaritse muri izi manza.”

⁷Avuze atyo, havyuka ibihari mu Bafarisayo n'Abasadukayo, abanyarubanza birema ibice.

⁸Kuko Abasadukayo bahakana yuko ata kuzuka kuriho, canke umumarayika n'impwemu; ariko Abafarisayo bavyemera vyose.

⁹Habaho urwamo rwinshi; bamwe mu bahinga b'ivyanditswe bo mu muce w'Abafarisayo bava hasi baraharira bati: “Nta kibi twabonye kuri uwo muntu. Kumbure impwemu canke umumarayika yoba yavuganye na we.”

¹⁰Habaho ibihari vyinshi, umukuru w'intwazangabo z'abasoda atinye ko bogabangana Pahulo, abarira ingabo ngo zimanuke zimubashikure, zimujane mu gisagara gikikijwe n'uruhome rw'amabuye.

¹¹Ijoro ry'uwo musi, Umwami Yesu amuhagarara hejuru ati: “Humura; nk'uko wanshingiye intahe i Yerusalemu, ni ko ukwiye kuzonshingira intahe i Roma.”

¹²Iryo joro rikeye, Abayuda barakorana, barahira bisiba yuko batazorya ntibanywe batarica Pahulo.

¹³Abahize batyo barenga mirongo ine.

¹⁴Baja ku baherezi bakuru n'abakuru bati: “Twarahiye twisivye bikomeye yuko ata co tuzotamira tutarica Pahulo.”

¹⁵Nuko rero mwebwe n'abashingantahe, ni mubwire umukuru w'intwazangabo z'abasoda amubamanukanire, nk'abarondera kurushiriza gutahura ivyiwe neza. Natwe, atarabashikira, twiteguye kumwica.”

¹⁶Umwishwa wa Pahulo yumva uwo mutego, araza ashika mu gisagara gikikijwe n'uruhome rw'amabuye, abibarira Pahulo.

¹⁷Pahulo ahamagara umwe mu ntwazangabo z'abasoda ijana ati: “Jana uwu muhungu ku mukuru w'intwazangabo z'abasoda; afise ijambo amubarira.”

¹⁸Na we aramujana amushira uwo mukuru w'abagabisha ati: “Ya mbohe Pahulo yampamagaye aranyinginga, ngo nkuzanire uwu muhungu, afise ico akubarira.”

¹⁹Uwo mukuru amufata ukuboko, aramukebukanya aramubaza biherereye ati: “Ico ufise kumbarira ni igiki?”

²⁰Aramwishura ati: “Abayuda bahuje inama yo kukwinginga ngo ejo uzomanukane Pahulo mw'ikoraniro ry'abashingantahe, nk'uwugomba kubaza ivyiwe ngo urushirize kubimenya neza.”

²¹None rero ntuje kubumvira, kuko abantu babo barenga mirongo ine bamuryamiye, barahiye bisivye ko batazorya ntibanywe bataramwica; kandi none bariteguye, barorereye ico uribubemerere.

²²Uwo mukuru arungika uwo muhungu, amaze kumwihanikiriza ati: “Ntugire umuntu ubarira yuko umenyesheje ivyo.”

²³Ahamagara babiri bo mu ntwazangabo z'abasoda ijana, arababarira ati: “Ni mwitegure abasoda amajana abiri bo kuja i Kayisariya, n'abagendera ku mafarasi mirongo irindwi, n'abo amacumu amajana abiri, bahenge mw'ijoro isaha zitatu bagende.”

²⁴Kandi bazane n'amafarasi kugira ngo bayashireko Pahulo, bamushikane kwa Feliki icegera ca Kayisari akiri muzima.

²⁵Yandika ikete nka bene iri

²⁶ati: “Jewe Kilawudiyo Lusiya ndakuganutsa wewe Feliki umwubahwa, icegera ca Kayisari.

²⁷None uwo mugabo Abayuda bari bamaze kumuta mu maboko bagira bamwice, nanje menye ko ari Umuroma nzanana n'ingabo ndamubakiza.

²⁸Kandi nshatse kumenya ico bamurega, ndamumanukana mw'ikoraniro ry'abashingantahe ryabo.

²⁹Mbona yuko bamurega amajambo y'ivyagezwe vyabo, ariko ko ata co yarezwe gikwiye kumwicisha canke kumubohesha.

³⁰Maze mbariwe yuko bahigiye uwo mugabo, nca ndamukurungikira, mbarira abarezi ko bamuregera imbere yawe. Ndakwikebanuye.”

³¹Nuko abasoda bakira Pahulo uko babariwe, bahenga mw'ijoro bamujana muri Antipatiri.

³²Bumaze guca basigayo abagendera ku mafarasi, ngo abe ari bo bajana na we, na bo basubira iyo bavuye ku gisagara gikikijwe n'uruhome rw'amabuye.

³³Abo bashitse i Kayisariya bashira icegera ca Kayisari ca cete, bamushikiriza na Pahulo.

³⁴Amaze kugisoma abaza intara y'i wabo iyo ari yo; amenye ko ari uwo i Kilikiya,

³⁵aravuga ati: “Nzokwumva ivyawe abarezi bawe ni bamara kuza.” Agera ko bamurindira mu gisagara ca Herode gikikijwe n'uruhome rw'amabuye.