Ephesians 5

¹Nuko mwigane Imana, nk' abana ikunda.

²Kandi mugendere mu rukundo, nk'uko Kristo na we yabakunze, akatwigura, akatubera ishikanwa n'ikimazi bihabwa Imana, umubabwe umota neza.

³Ariko ubusambanyi n'ibihumanya vyose canke ukwifuza ntimukabishire no mu kanwa, mube nk'uko bibereye abera.

⁴Ibiteye isoni canke amajambo y'ubupfu canke ibitwenza bibi ntibikumvikane muri mwebwe kuko ivyo bitabereye; ikibereye ni ugushima Imana.

⁵Kuko ibi mubizi neza, yuko ata mushakanyi, canke igihumane, canke uwifuza (ni we asenga ibigirwamana), azogira ico aragwa mu bwami bwa Kristo n'Imana.

⁶Ntihakagire umuntu abahendesha amajambo y'ubusa; kuko ivyo ari vyo bizanira ishavu ry'Imana abantu b'intabarirwa.

⁷Nuko ntimugafatanye na bo;

⁸kuko kera mwari umwiza, none mukaba muri umuco mu Mwami wacu. Mugende nk'abana b'umuco,

⁹kuko imbuto y'umuco iboneka mu ngeso nziza zose no mu kugororoka no mu kuri.

¹⁰Mumenye neza ibihimbara Umwami wacu.

¹¹Kandi ntimugafatanye n'ibikorwa vy'imburakimazi vy'umwiza, ariko canecane mubiserure,

¹²kuko ibikorwa na bo mu mpisho biteye isoni no kubivuga.

¹³Ariko vyose, iyo bishizwe ahabona, bigaragazwa n'umuco, kuko ikigaragazwa cose kiri mu muco.

¹⁴Ni co gituma bivugwa, ngo ikangure, wewe usinziriye, uzuke uve mu bapfuye, Kristo arakumurikira.

¹⁵Nuko mwirinde cane uburyo mugenda, ntimugende nk'imburabwenge, ariko mugende nk' abanyabwenge.

¹⁶Akaryo muronse, mugakoresha neza, kuko imisi ari mibi.

¹⁷Nuko ntimube ibipfu, ariko mutahure ivyo Umwami wacu agomba ivyo ari vyo.

¹⁸Kandi ntimukaborerwe umuvinyu, urimwo ubuhumbu; ariko mwuzure Mpwemu.

¹⁹Mubwirane zaburi, indirimbo n'amatazirano y'ivya Mpwemu, muririmba, mucurarangira Umwami wacu mu mitima yanyu.

²⁰Imana, Data wa twese, muyishimire vyose imisi yose, mw'izina ry'Umwami wacu Yesu Kristo.

²¹Mugamburukanire, kuko mwubashe Kristo.

²²Bagore, mugamburukire abagabo banyu, nk'uko mugamburukira Umwami wacu.

²³Kuko umugabo ari we mutwe w'umugore wiwe, nk'uko Kristo na we ari umutwe w'ishengero, akaba Umukiza waryo, ari wo mubiri wiwe.

²⁴Ariko nk'uko ishengero rigamburukira Kristo, kube ari ko abagore bagamburukira abagabo babo muri vyose.

²⁵Bagabo, mukunde abagore banyu, nk'uko Kristo na we yakunze ishengero, akaryigura,

²⁶ngo aryeze, aryogesheje amazi n'ijambo,

²⁷maze ngo arirengukane imbere yiwe, ari ishengero rifise ubwiza, ridafise amarabaga canke agatotsi canke ikintu cose gisa gityo, ariko ngo ribe iryera ridafise agasembwa.

²⁸Ni ko abagabo na bo bakwiye gukunda abagore babo nk'imibiri yabo bwite. Uwukunda umugore wiwe, aba yikunda,

²⁹kuko ata muntu yigeze kwanka umubiri wiwe, ariko arawugaburira, akawubungabunga, nk'uko Kristo na we agirira ishengero.

³⁰Kuko turi ingingo z'umubiri wiwe.

³¹Ni co gituma umuntu azosiga se na nyina, akabana n'umugore wiwe ubutakivana, bompi bakaba umubiri umwe.

³²Iryo banga rirahambaye, ariko ryerekeye kuri Kristo n'ishengero.

³³Ariko namwe nyene, umuntu wese akunde umugore wiwe nk'uko yikunda; umugore na we ni yubahe umugabo wiwe.