Hebrews 11

¹Ukwizera ni ukumenya rwose ivyizigirwa, udakekeranya ngo ntibizoba, kandi ibitabonwa ni kwo kubitumenyesha ko ari ivyo ukuri.

²Icatumye aba kera bashingirwa intahe ni uko bari bagufise.

³Ukwizera ni kwo kutumenyesha yuko isi yaremwe n'ijambo ry'Imana, ni co catumye ibiboneka bitaremwe mu biseruka.

⁴Ukwizera ni kwo kwatumye Abeli aha Imana ikimazi kiruta ica Kayini, ni kwo kwamuhesheje gushingirwa intahe ko ari umugororotsi, hamwe Imana yashingira intahe ibimazi vyiwe yuko ari vyiza, kandi ni kwo kwatumye n'ubu akivuga, naho yapfuye.

⁵Ukwizera ni kwo kwatumye Henoki ajanwa mw'ijuru, ngo ntabone urupfu, kandi ntiyaboneka, kuko Imana yamujanye. Kuko yashingiwe intahe atarajanwa yuko yahimbaye Imana.

⁶Kandi uwutizera ntibishoboka ko ayihimbara; kuko uwegera Imana akwiye kwizera yuko iriho, igaha impera abayirondera.

⁷Ukwizera ni kwo kwatumye Nowa yubaha, amaze kuburirwa n'Imana ibitaribwaboneke, akabaza ubwato bwo kurokora abo mu nzu yiwe, kandi ni kwo kwamuhaye gutsindisha abari mw'isi, no kuragwa ukugororoka kuzanwa n'ukwizera.

⁸Ukwizera ni kwo kwatumye Aburahamu yumvira Imana imuhamagaye, akaja ahantu yari abikiwe kuragwa. Nuko agenda, atazi iyo aja.

⁹Ukwizera ni kwo kwatumye aba umwimuka mu gihugu yasezeraniwe, nk'ikitari iciwe, akabana mu mahema na Isaka na Yakobo, abaraganywe na we ivyo vyasezeranywe.

¹⁰Kuko yari arorereye ca gisagara cubatswe kw'umushinge, umugezi n'umwubatsi waco n'Imana.

¹¹Ukwizera ni kwo kwatumye na Sara ashobozwa gusama inda, naho yari yaraciye, kuko yiyumviriye yuko iyasezeranye ari iyo kwizerwa.

¹²Ni co catumye umuntu umwe—kandi uwo yari akaheze—yamukwako n'isinzi nk'inyenyeri zo kw'ijuru, kandi n'abangana n'umusenyi utoharurika uri kw'isesero ry'ikiyaga utoharurika.

¹³Abo bose bapfuye bacizeye, batarahabwa ivyasezeranywe, ariko barabibona biri kure bakabisanganira, bakemera ko ari akavantara n'ingenzi kw'isi.

¹⁴Abavuga batyo baba berekana yuko barondera igihugu cabo bwite.

¹⁵Iyo baba barakumbuye ico bavuyemwo, baba barabonye uburyo bwo gusubirayo.

¹⁶Ariko noneho barifuza igihugu kirushije ico kuba ciza, ni ico mw'ijuru. Ni co gituma Imana itamaramazwa no kwitwa Imana yabo, kuko yabateguriye igisagara.

¹⁷Ukwizera ni kwo kwatumye Aburahamu atanga Isaka ko ikimazi, hamwe yagezwa; mbere uwari yarakiranye igishika amasezerano, yariko aratanga umwana wiwe w'ikinege kw'ikimazi,

¹⁸uwo yari yarabariwe ivyiwe, ngo Kuri Isaka ni ho uruvyaro rwawe ruzokwitirirwa;

¹⁹kuko yishimiye yuko Imana ishobora no kuzura abapfuye, ni co catumye amugarurirwa nk'uwuzutse.

²⁰Ukwizera ni kwo kwatumye Isaka ahezagira Yakobo na Esawu abahesha imigisha y'ibizoba.

²¹Ukwizera ni kwo kwatumye Yakobo, aho yagira acikane, ahezagira abana ba Yosefu bompi, agasenga yishimikije ipfundo ry'inkoni yiwe.

²²Ukwizera ni kwo kwatumye Yosefu, aho yagira apfe, avuga ivyo kuvayo kw'Abisirayeli, agatanga amategeko y'ivyo amagufa yiwe.

²³Ukwizera ni kwo kwatumye Mose, amaze kuvuka, anyegezwa n'abavyeyi biwe amezi atatu, kuko babonye ko ari akana keza, ntibatinya ibwirizwa ry'umwami.

²⁴Ukwizera ni kwo kwatumye Mose, amaze gukura, yanka kwitwa umwana w'umukobwa wa Farawo,

²⁵agahitamwo kugiriranwa nabi n'abantu b'Imana, akabirutisha kumara igihe mu bihimbaro vy'ivyaha.

²⁶Kuko yiyumviriye yuko gucokoranwa na Kristo ari ubutunzi burengeye itunga ryo mu Misiri, kuko yatumbera ingero azogererwa.

²⁷Ukwizera ni kwo kwatumye ava mu Misiri, ntiyatinya ishavu ry'umwami, kuko yashikamye nk'aho abona Iyitaboneka.

²⁸Ukwizera ni kwo kwatumye ashinga Pasika, no kumijagira amaraso, kugira ngo uwuhonya imfura ntabakoreko.

²⁹Ukwizera ni kwo kwatumye baca mu Kiyaga Gitukura, nk' abaca ku musozi, ariko Abanyamisiri babigejeje, bararengerwa.

³⁰Ukwizera ni kwo kwatumye impome z'amabuye z'i Yeriko zisenyuka, bamaze kuzikikuza imisi indwi.

³¹Ukwizera ni kwo kwatumye Rahabu, maraya, ataranduranwa n'abatumviye Imana, kuko yakiranye amahoro abaje gusuma urusaku.

³²Mvuge ikindi ki? Kuko igihe condengana ndondoye ivya Gideyoni, ivya Baraki, ivya Samusoni, ivya Yefuta, ivya Dawidi, ivya Samweli n'ivyo abavugishwa n'Imana,

³³baheshejwe n'ukwizera gutsinda abami, no gukora ibigororotse, no kuronka ivyasezeranywe, no kuziba iminwa y'intambwe,

³⁴no kuzimya ubukare bw'umuriro, no gukira ubugi bw'inkota, no guhindurwa mu ntege nke ngo zicike inkomezi, no kuba agahebuza mu ntambara, no kunesha ingabo z'abanyamahanga.

³⁵Abagore basubiye kubona abo babuze kuko bazutse, abandi bicishwa amahiri ntibemera gucungurwa, kugira ngo bazohabwe ukuzuka kurushiriza kuba kwiza.

³⁶Abandi bageragereshwa gushinyagurirwa no gukubitwa ibimoko, mbere bashirwa mu migozi no mu mabohero;

³⁷bicishijwe amabuye, bakerewemwo kubiri, barageragejwe, bicishijwe inkota, bayerera bambaye insato z'intama n'izo impene, bari baburaniwe, bababazwa, bagirirwa nabi,

³⁸(isi ntiyari ibabereye ko bayibamwo), bayerera mu bugaragwa no mu misozi no mu masenga yo mu vyobo.

³⁹Abo bose bamaze gushingirwa intahe kubwo ukwizera kwabo, ntibahabwa ivyasezeranywe,

⁴⁰kuko Imana yabonye kera ikirushiriza kutubera iciza, kugira ngo abo ntibatunganywe rwose tutari kumwe.