John 7

¹Hanyuma y'ivyo Yesu agendagenda i Galilaya; ntiyashaka kugendagenda i Yudaya kuko Abayuda barondera ingene bomwica.

²Imisi mikuru y'Abayuda yitwa iyo Amahema yariko irashika.

³Nuko abavukanyi biwe baramubwira bati: “Ni uve ino, uje i Yudaya, abigishwa bawe na bo barabe ibikorwa ukora;

⁴kuko ata wogira ico akora mu mpisho, na we ngo arondere kumenyekana. Ko ukora ivyo, ni wiserure mu b'isi.”

⁵Kuko n'abavukanyi biwe na bo batamwizera.

⁶Maze Yesu arabishura ati: “Igihe canje ntikiragera, ariko igihe canyu co, cama kiriho.

⁷Abo isi ntibabanka, ariko jewe baranyanka, kuko ndabavugira ibikorwa vyabo ko ari bibi.

⁸Mwebwe ni muduge kumara iyo misi mikuru, ariko jeho sindayidugako, kuko igihe canje kitaragera.

⁹Ababwiye ivyo, aguma i Galilaya.

¹⁰Abavukanyi biwe bamaze kuduga i Yerusalemu kumara iyo misi mikuru, na we araduga, ntiyiyerekana, ariko agenda mu mpisho.

¹¹Maze Abayuda bamurondera muri iyo misi mikuru bati: “Mbega wa wundi ari hehe?”

¹²Haba ivyongoshwe vyinshi mw'ishengero bamuvuga, bamwe bati: “Ni umuntu mwiza,” abandi bati: “'Oya, arazimiza abantu.'”

¹³Ariko nta n'umwe yamuvuze atobora, kuko batinya Abayuda.

¹⁴Ya misi mikuru igeze hagati, Yesu aduga mu rusengero, arigisha.

¹⁵Abayuda baratangara bati: “Mbega uwu yakuye ubwenge hehe, atigishijwe?”

¹⁶Maze Yesu arabishura ati: “Izi nyigisho zanje si izanje, ni izo uwantumye.

¹⁷Ni haba hari uwugomba gukora ivyo uwo akunda, azomenya izi nyigisho, ko zavuye ku Mana, canke ko ndabivuga ndavyigeneye.

¹⁸Uwuvuga ivyo yigeneye aba yironderera icubahiro; ariko uwurondera icubahiro c'uwamutumye, ni we w'ukuri, kandi nta kugabitanya kuba kuri muri we.

¹⁹Mbega Mose si we yabahaye ivyagezwe? Ariko muri mwebwe nta n'umwe yitondera ivyo vyagezwe. Muronderera iki kunyica?”

²⁰Ishengero riramwishura riti: “Urimwo dayimoni! Ni nde ashaka kukwica?”

²¹Yesu arabishura ati: “Nakoze igikorwa kimwe, mwese muratangara.”

²²Mose yabahaye guhimbura igikoba c'ubugabo mugabo ntikwavuye kuri Mose, ni kuri ba sogokuruza banyu kandi muhimbura igikoba c'ubugabo umuntu kw'isabato.

²³None se, ko umuntu ahimburwa igikoba c'ubugabo kw'isabato, kugira ngo icagezwe ca Mose ntimukirenge, none jewe mumpora iki ko kw'isabato nakijije umuntu akwiye?

²⁴Ntimupfe guca imanza ku biboneka, ariko muce imanza z'ukuri.

²⁵Bamwe mu b'i Yerusalemu baravuga bati: “Mbega uwo Si we bashaka kwica?”

²⁶Ehe avuga akararamango, nta co baruha bamubwira. Mbega harya abakuru bemeye vy'ukuri ko uyo ari we Kristo?

²⁷Uwo ko tuzi aho yaturutse, ariko Kristo aho azozira, nta wuzi aho azoturuka.

²⁸Nuko Yesu arasemerera yigisha mu rusengero ati: “Jewe muranzi, n'aho naturutse murahazi, kandi sinaje nitumye, ariko uwantumye n'uwo ukuri, mwebwe ntimumuzi;

²⁹jeho ndamuzi, kuko navuye kuri we, kandi ari we yantumye.”

³⁰Buno barondera ingene bomufata, ariko ntihagira uwumukozako n'intoke, kuko igihe ciwe kitaribwagere.

³¹Benshi mw'ishengero baramwizera baravuga bati: “Kristo ni yaza, mugira ngo azokora ibitangaza vyinshi birengeye ivyo uwu akora?”

³²Abafarisayo bumvise ko ishengero rimuvugavuganako ivyo mu twongoshwe, abaherezi bakuru n'Abafarisayo batuma abagendanyi kumufata.

³³Maze Yesu aravuga ati: “Hasigaye igihe gito nkiri kumwe namwe, hanyuma nkaja ku wantumye.

³⁴Muzondondera, ariko ntimuzombona, kandi iyo nzoba ndi ntimuzoshobora gushikayo.”

³⁵Maze Abayuda baravugana bati: “Mbega uwo agira aje hehe, aho twebwe tutazoshobora kumubona? Agira aje mu basabagiriye mu Bagiriki, ngo azokwigishe Abagiriki?

³⁶Mbega iryo jambo atubwiye ni iriki, ngo Muzondondera, ariko ntimuzombona, kandi ngo iyo nzoba ndi mwebwe ntimuzoshobora gushikayo?”

³⁷Nuko ku musi uherukira ya misi mikuru, ni wo musi uruta iyindi, Yesu arahagarara, arasemerera ati: “Namba hari uwufise inyota, ni aze kuri jewe, anywe.

³⁸Uwunyizera, inzuzi z'amazi y'ubugingo zizotemba ziva mu nda yiwe, nk'uko ivyanditswe bivuga.”

³⁹Ariko ivyo yabivuze kuri Mpwemu, uwo abamwizera bagira bahabwe; kuko Mpwemu ataribwatangwe, kuko Yesu ataribwashike mu bwiza bwiwe.

⁴⁰Bamwe mw'ishengero bumvise ayo majambo bati: “Ni ukuri uwu ni wa muntu avugishwa n'Imana.”

⁴¹Abandi bati: “Uwu ni we Kristo. Abandi bati: “Oya, mbega Kristo yova i Galilaya?

⁴²Mbega icanditswe ntikivuga ko Kristo azova mu ruvyaro rwa Dawidi, i Betelehemu, wa musozi Dawidi yabako?”

⁴³Ishengero riramupfa,

⁴⁴bamwe muri bo bashaka kumufata, ariko ntihagira n'umwe amukozako n'intoke.

⁴⁵Nuko ba bagendanyi basubira ku baherezi bakuru n'Abafarisayo, na bo barababaza bati: “Ko mutamuzanye?”

⁴⁶Abagendanyi barabishura bati: “Erega ntihigeze kuboneka umuntu avuga nka we.”

⁴⁷Abafarisayo barababaza bati: “Mbega namwe mwajimijwe?

⁴⁸Hari umukuru n'umwe yamwizeye, canke Umufarisayo?”

⁴⁹Ariko abo bantu batazi ivyagezwe ni ibivume.

⁵⁰Nikodemu, umwe yaza kuri we mbere, yari umwe muri bo, arababaza

⁵¹ati: “Mbega ivyagezwe vyacu biratsindisha umuntu batabanje kumwumva no kumenya ico yakoze?”

⁵²Baramwishura bati: “Mbega nawe uri uwo i Galilaya? Soma witonze urabe yuko hari uwuvugishwa n'Imana yova i Galilaya.” [

⁵³Bose baca baritahira.