Mark 13

¹Ariko arasohoka mu rusengero, umwe mu bigishwa biwe aramubwira ati: “Mwigisha, raba aya mabuye uko ari, n'iyi nyubako uko iri!”

²Yesu aramubaza ati: “Uraraba iyi nyubako ihambaye?” Ntihazosigazwa ibuye rigeretse ku rindi, ridasamburiwe hasi.

³Yicaye ku musozi wa Elayono yerekeye ku rusengero, Petero, Yakobo, Yohana na Andereya baramubaza bihereranye

⁴bati: “Tubwire, ivyo bizobaho ryari, ikimenyetso kizoba iki, c'igihe ivyo vyose bizoba bigira bishike?”

⁵Yesu atangura kubabwira ati: “Mwirinde ntihagire uwubazimiza.”

⁶Benshi bazoza mw'izina ryanje bati: “Ndi we; kandi bazozimiza benshi.”

⁷Kandi ni mwumva intambara n'impuha z'intambara, ntimuzohagarike imitima; ntibizobura kubaho, ariko umuhero uzoba utaraza.

⁸Kuko ihanga rizotera irindi hanga, n'ubwami buzotera ubundi bwami, isi izonyiganyiga henshi, amapfa azotera. Ivyo n'itanguriro ryo kuramukwa.

⁹Ariko mwirinde, kuko bazobashengerana mu manza, muzokubitirwa mu masengero y'Abayuda, kandi muzohagarara imbere y'abaganza n'abami babampora, mube ikimenyetso kibabere icabona.

¹⁰Ubutumwa bwiza bukwiye kubanza kuvugwa mu mahanga yose.

¹¹Kandi ni babajana babashengeranye, ntimuzohagarikire imitima ico muzovuga; ico muzohabwa cose muri ako kanya, muzobe ari co muvuga, kuko atazoba ari mwebwe muvuga, azoba ari Mpwemu Yera.

¹²Umuntu azoshengerana uwo bavukana ngo bamwice, na se w'umwana azomushengerana, n'abana bazogabagabira abavyeyi babicishe.

¹³Muzoba mwanswe na bose, babahora izina ryanje, ariko uwihangana, agashitsa iherezo, ni we azokira.

¹⁴Ariko, aho muzobonera ca kizira c'ishano ry'ubugesera gihagaze aho kidakwiye, (uwusoma ni yiyubare), ico gihe abazoba bari i Yudaya bazohungire ku misozi miremire,

¹⁵uwuzoba ari hejuru ku nzu ntazokwururutswe no kwinjira gusahura ikintu cose mu nzu yiwe;

¹⁶uwuzoba ari mu mirima ntazosubizwe inyuma no gusahura umutamana wiwe.

¹⁷Ariko muri iyo misi abazoba batwaye inda n'abonsa bazobona ibara;

¹⁸kandi muzosenge kugira ngo ntibizobe mu gatasi.

¹⁹Kuko iyo misi izoba iyo amarushwa atigeze kubaho, kuva kw'itanguriro ry'ibiremwa Imana yaremye ugashitsa n'ubu, kandi atazokwongera kubaho.

²⁰Iyaba Umwami Imana itogeruye iyo misi, ntihorokotse umuntu n'umwe, ariko ku bwo abatoranijwe yatoranije, yarayigeruye.

²¹Ico gihe ni hagira umuntu ababwira ati: “Ehe Kristo ari hano;” canke ati: “Ari hariya: ntimuzovyemere.”

²²Kuko hazokwaduka abigira Kristo n'abigira abavugishwa n'Imana, bagakora ibimenyetso n'ibitangaza, kugira ngo bazimize n'abatoranijwe, ni vyashoboka.

²³Ariko mweho mwirinde; raba ndabibabwiye vyose bitaraba.

²⁴Ariko muri iyo misi, hanyuma y'ayo marushwa, izuba rizocura umwiza, n'ukwezi ntikuzoba kucaka umuco wakwo,

²⁵n'inyenyeri zizoba ziriko zirakoragurika ziva kw'ijuru, n'ivyo inkomezi vyo mu majuru bizonyiganyizwa.

²⁶Ni ho bazobona Umwana w'umuntu aje mu bicu, ari n'ububasha bwinshi n'ubwiza.

²⁷Ni ho azotuma abamarayika, akoranye abatoranijwe biwe, bave mu birere bine, guhera ku mpera y'isi kugeza impera y'ijuru.

²⁸Ni mwigire ku musukoni umugani wawo, ishami ryawo iyo ritoshe, amababi agatutuza, mumenya yuko agatasi kari hafi.

²⁹Nuko namwe ni mwabona ivyo bibaye, muzomenye ko ari hafi, ku rugi.

³⁰Ndababwire ukuri; abo iki gihe ntibazorangira, ivyo vyose bitarashika.

³¹Ijuru n'isi bizorangira, ariko amajambo yanje nta co azoba.

³²Ariko uwo musi canke iyo saha, nta wubizi, n'iyo boba abamarayika bo mw'ijuru, canke Umwana w'Imana, atari Data gusa.

³³Mwiyubare, mube maso, musenge; kuko mutazi igihe bizoshikira.

³⁴Ni nk'umuntu yasize urugo rwiwe, aja mu kindi gihugu, asigarana abashumba biwe urugo, kandi ahejeje kugerera umuntu wese igikorwa ciwe, abarira umuteramyi ngo yame agavye.

³⁵Nuko mwame mugavye, kuko mutazi igihe nyene urugo azozamwo, namba ari ku mugoroba, canke mu gicugu, canke mu nkoko, canke umutwenzi ukitse;

³⁶kugira ngo ni yaza giturumbuka, ntasange musinziriye.

³⁷Ariko ico ndababariye, ndakibarira bose nti: “Mwame mugavye.”