Mark 5

¹Bafata hakurya y'ikiyaga mu gihugu c'Abageraseni.

²Avuye mu bwato, umuntu yinjiwemwo n'impwemu ihumanye ava mu masenga y'imva, aca aramusanganira.

³Yaba muri ayo masenga, ntihagira uwuba akibona ico ashobora kumubohesha, n'iyo woba umunyororo;

⁴kuko bamubohesheje iminyororo ku maguru no ku maboko kenshi, iyo amaboko akayicagagura, iyo amaguru akayivutagura. Ntihagira umuntu afise inkomezi zomustinda.

⁵Maze imisi yose ku murango no mw'ijoro yama muri ayo masenga no ku misozi, ataka, yikebesha amabuye.

⁶Abonye Yesu akiri kure, arirukanga, arunama,

⁷asemerera n'ijwi rirenga ati: “Duhuriye hehe ga Yesu Mwana w'Imana Isumbavyose? Ndakurahiye Imana, ntubabaze ushinyagurira.”

⁸Kuko yari amubariye ati: “Va mu muntu, wa mpwemu ihumanye.”

⁹Aramubaza ati: “Witwa nde?” Aramwishura ati: “Gitero ni ryo zina ryanje kuko turi benshi.”

¹⁰Aramwinginga cane ngo ntazirukane muri ico gihugu.

¹¹Kandi kuri uwo musozi hari ubusho bwinshi bw'ingurube zirisha;

¹²izo mpwemu mbi ziramwinginga ziti: “Turungike muri ziriya ngurube, tuzinjiremwo.”

¹³Arazemerera. Izo mpwemu zihumanye zimusokorotsemwo, zinjira muri nya ngurube, umukuku wirukira ku gatembwe, zisuka mu kiyaga, zari nk'ibihumbi bibiri, amazi araziniga.

¹⁴Abaziragira barahunga, babivuga mu gisagara no mu misozi; na bo baza kuraba ibibaye ivyo ari vyo.

¹⁵Bashika aho Yesu ari, basanga uwari yinjiwemwo n'abadayimoni yicaye, yambaye, ubwenge bwagarutse, umwe nyene yari yinjiwemwo na ca gitero; baratinya.

¹⁶Ababibonye babadondera ivyo uwari yinjiwemwo n'abadayimoni n'ivyo ingurube.

¹⁷Batangura kwinginga Yesu ngo ave mu ntara yabo.

¹⁸Ariko aratambukira mu bwato, uwari yinjiwemwo n'abadayimoni aramwinginga ngo agume kuri we.

¹⁹Ntiyamukundira, ariko aramubarira ati: “Ja i muhira i wawe mu b'i wanyu, ubabarire ivyo Umwami Imana igukoreye vyose, kandi ingene ikugiriye ikigongwe.”

²⁰Aragenda, atangura gukwiza i Dekapoli ivyo Yesu yamukoreye vyose, abantu bose baratangara.

²¹Nuko Yesu agenda mu bwato, asubira hakurya, ishengero ryinshi rikoranira kuri we; yari i ruhande y'ikiyaga.

²²Haza umwe mu bakuru b'isengero ry'Abayuda, yitwa Yayiro, amubonye amwitembagaza imbere y'ibirenge,

²³aramwinginga cane ati: “Akana kanje k'agakobwa kari ku mpfiro, ndakwinginze, ni uze se, umurambikeko ibiganza, akire, abeho.”

²⁴Aragenda, ajana na we. Ishengero ryinshi riramukurikira rimubanda.

²⁵Kandi umugore atakaza amaraso menshi yari abimaranye imyaka icumi n'ibiri,

²⁶yababajwe cane n'abavuzi benshi bamumarisha ibintu vyiwe vyose abitangamwo ingemu, ntihagira ico bamumarira, mbere arushiriza kurwara;

²⁷yumvise ivya Yesu, araza, aca hagati y'ishengero, amuturuka inyuma, akora ku mpuzu yiwe.

²⁸Yari yibwiye ati: “N'iyo nokora ku mpuzu ziwe gusa, nokira.”

²⁹Uwo mwanya isoko y'amaraso irakama, amenya mu mubiri wiwe yuko akize ico cago.

³⁰Ako kanya Yesu yumva muri we ubushobozi bumuvamwo, ahindukira abandana n'ishengero, arababaza ati: “Ni nde akoze ku mpuzu zanje?”

³¹Abigishwa biwe baramwishura bati: “Ubone abantu bariko barakubanda, nawe ukagira ngo ni nde ankozeko?”

³²Aberaguzamwo amaso, ngo abone uwumukozeko.

³³Uwo mugore aratinya, ahinda agashitsi, kuko azi ikimubayeko, araza amwikubita imbere, amubarira ivyo ukuri vyose.

³⁴Yesu aramubwira ati: “Mwana wanje, ukwizera kwawe kuragukijije, genda amahoro, ukire rwose icago cawe.”

³⁵Akivuga, haza abavuye kwa wa mukuru w'isengero ry'Abayuda bati: “Wa mwana wawe aracikanye, uracagorera iki Umwigisha?”

³⁶Ariko Yesu ntiyashira umutima kw'ijambo rivuzwe, abarira uwo mukuru w'isengero ry'Abayuda ati: “Ntutinye, wizere gusa.”

³⁷Ntiyakundira uwundi muntu kujana na we, atari Petero, Yakobo na Yohana mwene nyina wa Yakobo.

³⁸Bashitse ku nzu y'uwo mukuru w'isengero ry'Abayuda, asanga bariko barakoma induru barira baboroga cane.

³⁹Yinjiye arababaza ati: “Ni igiki gitumye mukoma induru murira? Umwana ntahwereye, ariko arasinziriye.

⁴⁰Baramutwenga bamushimanga. Arabakumira bose, ajana se w'umwana na nyina n'abari kumwe na we, yigira haruguru aho ikiziga kiri,

⁴¹afata ukuboko kw'ikiziga, arakibarira ati: “Talisa kumi;” bisobanurwa ngo Gakobwa, ndakubariye nti: “Vyuka.”

⁴²Umukobwa aca avyuka uwo mwanya, aragendagenda, kuko yari amaze imyaka icumi n'ibiri avutse: baca baratangara cane.

⁴³Arabihanikiriza cane, ngo ntihagire umuntu n'umwe abimenya, arababarira ngo bamugaburire.