Matthew 10

¹Ahamagara abigishwa biwe icumi na babiri, abaha ububasha ku mpwemu zihumanye n'ubwo kuzisenda, no gukiza indwara zose n'ubumuga bwose.

²Amazina y'izo ntumwa icumi na zibiri ni aya: Uwa mbere ni Simoni, yitwa Petero, mwene nyina Andereya, Yakobo umwana wa Zebedayo, mwene nyina Yohana,

³Filipo, Barutolomayo, Toma, Matayo umutozakori, Yakobo umwana wa Alufayo, Tadayo,

⁴Simoni Umunyakananayo na Yuda Isikaryota, umwe yamugura.

⁵Yesu atuma abo icumi na babiri arababarira ati: “Ntimuzojane inzira ija mu banyamahanga, canke mu bisagara vy'Abasamariya.

⁶Ariko muje mu ntama zazimiye zo mu nzu ya Isirayeli.

⁷Uko mugenda kwose mwigishe muti: 'Ubwami bwo mw'ijuru buri hafi.'

⁸Mukize abarwaye, muzure abapfuye, mukize abanyamibembe, musende abadayimoni. Mubiherewe ubusa, mubitangire ubundi.

⁹Ntimutekere izahabu canke amahera canke ibingorongoro mu mipfuko yanyu,

¹⁰canke isaho y'induhuro, kandi ntimujane n'amakanzu abiri, canke ibirato canke inkoni, kuko umukozi akwiye impembo yiwe.

¹¹Igisagara cose canke imihana muzoshikamwo, muhabaze uwubereye, mumurarire gushitsa aho muzovirayo.

¹²Mucinjira mu nzu muyiramutse;

¹³nya nzu ni yaba ibereye, amahoro yanyu azoyizako. Ni yaba itabereye, amahoro yanyu azobagarukako.

¹⁴Kandi umuntu ni atabakira, canke ngo yumve amajambo yanyu, muve muri ino nzu canke muri nya gisagara, muzokunkumure umukungugu wo mu birenge vyanyu.

¹⁵Ndababwire ukuri, ku musi w'imanza igihugu c'i Sodomu n'i Gomora kizogira agahengekezo kurusha nya gisagara.”

¹⁶Raba ndabatumye muri nk'intama mu mabingira hagati. Nuko mugire ubwenge nk'inzoka, mumere nk'inuma ata karohe.

¹⁷Mwirinde abantu. Bazobashengerana mu manza, babatonagurire mu nsengero zabo.

¹⁸Bazobajana imbere y'abaganza n'abami babampora, muzoba ikimenyetso kibabere icabona, bo n'abanyamahanga.

¹⁹Ariko babashengeranye, ntimuzohagarikire imitima ico muvuga n'ingene muzokivuga, kuko ivyo muzovuga muzobihabwa muri ako kanya.

²⁰Kuko atazoba ari mwebwe muvuga, azoba ari Mpwemu wa So avugira muri mwebwe.

²¹Umuntu azoshengerana uwo bavukana ngo bamwice, na se w'umwana azomushengerana, n'abana bazogabagabira abavyeyi babicishe.

²²Muzoba mwanswe na bose babahora izina ryanje; ariko uwihangana agashitsa kw'iherezo ni we azokira.

²³Ni babahama mu gisagara kimwe, muhungire mu kindi; kuko ndababwira ukuri yuko mutazohetura ibisagara vyose vy'i Bwisirayeli, Umwana w'umuntu ataraza.

²⁴Umwigishwa ntaruta umwigisha; kandi n'umushumba ntaruta shebuja.

²⁵Umwigishwa biramubereye kumera nk'umwigisha wiwe, n'umushumba nka shebuja. Nyene urugo ko bamwise Beyezebuli, none abo mu rugo rwiwe ntibazorushiriza kubita batyo?

²⁶Nuko ntimuzobatinye, kuko ata catwikiriwe kitazotwikururwa, canke kinyegejwe kitazomenyekana.

²⁷Ico ndababaririra mu mwiza muzokivugire mu muco, kandi ico mwongorewe mu gutwi muzokivugire ku mazu hejuru.

²⁸Ntimuzotinye abica umubiri, badashobora kwica ubugingo, canecane mutinye uwushobora guhonereza ubugingo n'umubiri muri Gehinomu.

²⁹Mbega utunyoni tubiri ntitugurwa ikuta? Ariko muri two nta na kamwe gakorokera hasi, So atabizi.

³⁰Ariko n'umushatsi wo ku mitwe yanyu wose waraharuwe.

³¹Nuko ntimutinye: mwebwe muruta utunyoni twinshi.

³²Umuntu wese azonyaturira imbere y'abantu, nanje nzomwaturira imbere ya Data wo mw'ijuru.

³³Ariko umuntu wese azonyihakanira imbere y'abantu, nanje nzomwihakanira imbere ya Data wo mw'ijuru.

³⁴Ntimwiyumvire ngo naje gutera amahoro mw'isi, sinaje gutera amahoro, atari inkota.

³⁵Kuko naje guteranya umwana na se, umukobwa na nyina, umukazana na inabukwe.

³⁶Kandi abansi b'umuntu bazoba abo mu rugo rwiwe.

³⁷Uwukunze se canke nyina akabandutisha, ntaba ankwiye; kandi uwukunze umuhungu wiwe canke umukobwa wiwe akabandutisha, ntaba ankwiye.

³⁸Kandi uwutikoreye umusaraba wiwe ngo ankurikire, ntaba ankwiye.

³⁹Uwurokora ubugingo bwiwe azobubura; n'uwuheba ubugingo bwiwe kubwanje azoburonka.

⁴⁰Uwubakiriye aba anyakiriye, kandi uwunyakiriye aba yakiriye uwantumye.

⁴¹Uwakira umuntu avugishwa n'Imana kuko avugishwa na yo azohabwa impera nk'iyo uwuvugishwa n'Imana; uwakira umuntu agororotse kuko agororotse azohabwa impera nk'iyo umugororotsi.

⁴²Kandi uwuzoha umwe muri abo bato urwato rw'amazi apfutse gusa kuko ari umwigishwa, ndababwira ukuri yuko atazobura impera yiwe.