Matthew 20

¹Ubwami bwo mw'ijuru busa na nyene urugo azindutse kurondera abamukorera mu ruzabibu rwiwe.

²Yemeranya n'abakozi ku musi ko azobaha idenariyo, abarungika mu ruzabibu rwiwe.

³Nko kw'isaha zitatu aragenda, abona abandi bihagarariye mu kaguriro ata co bakora.

⁴Na bo arababwira ati: “Namwe ni mugende mu ruzabibu, ndabagerera ivyo mukwiranye.” Baragenda.

⁵Yongera kugenda kw'isaha zitandatu no ku y'icenda, agira kuno.

⁶Kandi nko kw'isaha icumi n'imwe aragenda, abona abandi bihagarariye; arababwira ati: “Mbega ko mwahagaze hano umusi wose ata co mukora?”

⁷Baramwishura bati: “Ni uko ata waturaritse.” Arababwira ati: “Namwe ni mungire mu ruzabibu.”

⁸Bugorovye, nyene umurima w'inzabibu abwira umukoresha wiwe ati: “Hamagara abakozi, ubagerere ingero zabo, utangurire mu bo hanyuma gushitsa ku ba mbere.”

⁹Abaje kw'isaha icumi n'imwe bahabwa idenariyo imwimwe

¹⁰Abatanguye kare baje, bagira ngo bagererwa ibirenze; ariko bahabwa idenariyo imwimwe na bo.

¹¹Bayahawe bidodombera nyene umurima w'inzabibu

¹²bati: “Abaherutse kuza, bagakora isaha imwe gusa, none ko ubaringanije natwe twacumukuye umurango wose no mu ndugumba!”

¹³Na we yishura umwe muri bo ati: “Mugenzi wanje, sinkugiriye nabi; ntitwemeranije idenariyo imwe?

¹⁴Fata iyawe, ugende. Uwo wo hanyuma nagomvye kumugerera nkawe.

¹⁵Hari ikimbuza kugira uko ngomba mu vyanje? Canke ugize ijisho ribi kuko jewe ndi mwiza.

¹⁶Uko ni ko abo inyuma bazoba abo imbere, kandi abo imbere ba zoba abo inyuma.”

¹⁷Yesu agira aduge i Yerusalemu, yihererana na ba bigishwa icumi na babiri, maze bari mu nzira arababwira

¹⁸ati: “Ehe turaduze Yerusalemu, kandi Umwana w'umuntu azoshirwa mu maboko y' abaherezi bakuru n'abahinga b'ivyanditswe, bazomucira urubanza rwo gupfa,

¹⁹kandi bazomuha abanyamahanga ngo ashinyagurirwe, akubitwe, abambwe kandi ku musi ugira gatatu azozurwa.”

²⁰Buno nyina w'abana ba Zebedayo aza kuri we, ari kumwe n'abahungu biwe, aramupfukamira, amusaba ijambo.

²¹Aramubaza ati: “Uragomba iki?” Na we ati: “Bivuge ko aba bahungu banje babiri ngo bazokwicare umwe i buryo bwawe uwundi i bubamfu mu bwami bwawe.”

²²Yesu arishura ati: “Ntimuzi ico musaba. Mwoshobora kunywera ku gikombe jewe ngira nywereko?” Na bo bati: “Turashobora.”

²³Arababwira ati: “Igikombe canje koko muzokinywerako, ariko gutanga ivyicaro i buryo bwanje i bubamfu, si ivyanje, atari abo Data yabiteguriye.”

²⁴Bamwe icumi bavyumvise, bidodombera ivyo abo babiri bavukana.

²⁵Yesu arabahamagara, arababwira ati: “Murazi yuko abaganwa b'amahanga bayatwaza amanyama, kandi n'abakuru bayo bayagirako ububasha.

²⁶Muri mwebwe si ko biri. Ariko uwugomba kuba mukuru muri mwebwe azobe umukozi wanyu;

²⁷kandi uwugomba kuba uwo imbere azobe umushumba wanyu,

²⁸nk'uko Umwana w'umuntu atazanywe no gukorerwa, atari ugukorera abandi, no gutanga ubugingo bwiwe ko incungu ya benshi.

²⁹Bakiva i Yeriko, ishengero ryinshi riramukurikira.

³⁰Impumyi zibiri zari zicaye i ruhande y'inzira, zumvise yuko Yesu ahaciye ziratakamba ziti: “Mwami, mwana wa Dawidi, tugirire imbabazi.”

³¹Ishengero rirazizibiranya ngo zihore. Zirushiriza gutakamba ziti: “Mwami, mwana wa Dawidi, tugirire imbabazi.”

³²Yesu arahagarara, arazihamagara, arazibaza ati: “Mugomba ko ndabakorera iki?”

³³Ziti: “Tugomba ko amaso yacu ahumuka Mwami.”

³⁴Yesu azigirira akagongwe, akora ku maso yazo, zica zirahumuka, baramukurikira