Matthew 25

¹Ico gihe ubwami bwo mw'ijuru buzosa n'inkumi icumi, zajanye amatara yazo, zija gusanganira umukwe.

²Batanu muri bo bari ibijuju, bandi batanu bari abanyabwenge.

³Kuko vya bijuju, mu kujana amatara yavyo, bitajananye n'amavuta.

⁴Ariko abanyabwenge bo, bajananye n'amavuta mu macupa yabo hamwe n'amatara yabo.

⁵Umukwe agitebaganye bose barahunyiza, barasinzira.

⁶Mu gicugu humvikana urwamo, ngo nguwu umukwe, ni musohoke mumusanganire.

⁷Buno za nkumi zose zirazanzamuka, zitunganya amatara yazo.

⁸Vya bijuju bibwira abanyabwenge biti: “Ni muduhe se ku mavuta yanyu, kuko amatara yacu ariko arazima.”

⁹Ariko abanyabwenge barabishura bati: “Kumbure ntiyodukwira twese; ivyiza ni muje ku badandaza mwigurire.”

¹⁰Bakigiye kugura umukwe arashika; abiteguye binjirana na we mu bukwe, umwango urugarwa.

¹¹Mu nyuma za nkumi zindi na zo ziraza ziti: “Mupfasoni, mupfasoni, ni utwugururire.”

¹²Na we arabishura ati: “Ndababwire ukuri: Sindabazi.”

¹³Nuko mwame mugavye kuko mutazi umusi canke isaha.

¹⁴Bizoba nk'ivyo umuntu agira agende mu mahanga, ahamagara abantu biwe, abasigarana ivyo atunze.

¹⁵Umwe amuha italanto zitanu, uwundi zibiri, uwundi imwe, uko umuntu wese ashobora, aja mu mahanga.

¹⁶Uwo mwanya uwahawe italanto zitanu aragenda arazicuruza, yungukamwo izindi talanto zitanu.

¹⁷N'uwa zibiri abigenza atyo, yungukamwo izindi zibiri.

¹⁸Ariko uwahawe imwe arigira, yimba mu kuzimu, ahisha amahera ya shebuja.

¹⁹Hashize igihe kirekire, shebuja w'abo bantu aragaruka, asuzuma ivyo yabasigaranye.

²⁰Uwari yahawe italanto zitanu araza, azana italanto zindi zitanu ati: “Mugenzi, wari wansigaranye italanto zitanu, ehe nungutsemwo izindi talanto zitanu.”

²¹Shebuja aramubwira ati: “Wagize neza, muntu wanje mwiza wo kwizigirwa, wizigiwe kuri bike, nzoguha kugaba vyinshi. Injira mu munezero wa shobuja.”

²²Haza uwari yahawe italanto zibiri ati: “Mugenzi, wari wansigaranye italanto zibiri, ehe nungutsemwo izindi talanto zibiri.”

²³Shebuja aramubwira ati: “Wagize neza, muntu wanje mwiza wo kwizigirwa, wizigiwe kuri bike, nzoguha kugaba vyinshi. Injira mu munezero wa shobuja.”

²⁴Kandi haza uwahawe italanto imwe ati: “Mugenzi, nari nkuzi ko uri umuntu w'ingare, wimbura ivyo utarimye, ukumakuma ivyo utasanzaje;

²⁵ndatinya, ndagenda ndahisha italanto yawe mu kuzimu; ehe ngibi ivyawe.”

²⁶Shebuja aramwishura ati: “Wa muntu wanje mubi we, wa kinebwe we, wari uzi ko nimbura ivyo ntarimye, nkumakuma ivyo ntasanzaje.”

²⁷Nuko wari ukwiye kujana amahera yanje mu bayacuruza, nanje nagaruka nkaronka ayanje n'inyungu yayo.

²⁸Nuko ni mumwake italanto, muyihe uwufise italanto icumi.

²⁹Kuko uwufise wese azohabwa, asesekarizwe; ariko uwudafise azokwakwa n'ico yarafise.

³⁰N'uwo muntu wanje w'imburakimazi ni mumute hanze mu mwiza, ni ho hazoba amarira no kuryanya insya z'amenyo.

³¹Ariko Umwana w'umuntu aho azozira afise ubwiza bwiwe ari kumwe n'abamarayika biwe bose, ni ho azovyagira ku ntebe yiwe y'ubwiza;

³²amahanga yose azokoranirizwa mu nyonga ziwe, na we azobarobanura, nk'uko umwungere arobanura intama mu mpene.

³³Intama azoziherereza i buryo bwiwe, impene na zo i bubamfu.

³⁴Maze Umwami azobwira abari i buryo bwiwe ati: “Ni muze, abo Data yahezagiye, muragwe ubwami mwateguriwe, uhereye ku kuremwa kw'isi.

³⁵Nari nshonje, murangaburira, nari mfise inyota, mumpa ico nywa; nari ingenzi, mumpa indaro;

³⁶nagenda gusa, muranyambika; nari ndwaye, muza kuraba uko meze; nari mw'ibohero, muza kundaba.

³⁷Maze abagororotsi bazomubaza bati: “Mwana, twakubonye ryari ushonje, tukakugaburira; canke ufise inyota, tuguha ico unywa?

³⁸Twakubonye ryari uri ingenzi, tuguha indaro; canke ugenda gusa tukakwambika?

³⁹Twakubonye ryari urwaye, canke uri mw'ibohero, tuza kukuraba?”

⁴⁰Umwami na we azobishura ati: “Ndababwire ukuri; ko mwabigiriye umwe muri aba bavukanyi banje bari hanyuma y'abandi, ni jewe mwabigiriye.”

⁴¹Maze azobwira n'abari i bubamfu ati: “Ni mumve i ruhande, mwa bivume mwe, muje mu muriro utazima wateguriwe wa mugarariji n'abamarayika biwe.

⁴²Nari nshonje, ntimwangaburira; nari mfise inyota ntimwampa ico nywa;

⁴³nari ingenzi, ntimwampa indaro; nagenda gusa, ntimwanyambika; nari ndwaye, nari mw'ibohero, ntimwaza kundaba.

⁴⁴Maze na bo bazomwishura bati: “Mwana, twakubonye ryari ushonje, ufise inyota, uri ingenzi, ugenda gusa, urwaye canke uri mw'ibohero, ntitwagira ico tugukorera?”

⁴⁵Maze azobishura ati: “Ndababwire ukuri; ko mutabigiriye umwe muri aba bari hanyuma y' abandi, nanje ntimwabingiriye.”

⁴⁶Abo bazoja mu gihano kidashira, ariko abagororotsi bazoja mu bugingo budashira.