Matthew 7

¹Ntimugahinyurire mu mitima yanyu, namwe mukazohinyurwa.

²Kuko, uko muhinyura abandi, ari ko muzohinyurwa namwe; kandi ingero mugeramwo muzoyigererwa namwe.

³Urabira iki akabango kari mu jisho rya mugenzawe, kandi akabango kari mu jisho ryawe ntukitegereze?

⁴Wobwira ute mugenzawe uti: “Zana ndagutosore akabango kari mu jisho ryawe, nawe ufise akandi mu jisho ryawe?

⁵Wa ndyarya we, banza witosore akabango kari mu jisho ryawe, uheze ubone neza gutosora akabango kari mu jisho rya mugenzawe.

⁶Ivyera vy'Imana ntimukabihe imbwa, kandi amabuye yanyu y'agaciro ntimuyaterere ingurube, kugira ngo ntizizohonyange n'inzara zazo, maze zikabahindukirira, zikabatabagura.

⁷Musabe, muzohabwa; murondere, muzoronka; muramutse, muzokwugururirwa.

⁸Kuko uwusaba wese ahabwa; uwurondera aronka; uwuramutsa yugururirwa.

⁹Hari umuntu muri mwebwe, umwana wiwe yomusaba umutsima, akamuha ibuye?

¹⁰Canke yomusaba ifi, akamuha inzoka?

¹¹None mwebwe, ko muzi guha abana banyu ingabire nziza muri babi, mbega So wo mw'ijuru ntazorushiriza rwose guha ivyiza abamusavye?

¹²Nuko ivyo mugomba ko abantu babagirira vyose mube ari ko mubagirira namwe; kuko ivyo ari ivyagezwe n'ivyo abavugishijwe n'Imana.

¹³Muce mw'irembo ripfunganye; kuko irembo ryagutse, n'inzira yagutse, ari vyo bijana abantu mu mahonero, kandi abahaca ni benshi.

¹⁴Ariko irembo ripfunganye, n'inzira ntoya, ni vyo bija mu bugingo, kandi abahabona ni bake.

¹⁵Mwirinde abigira abavugishwa n'Imana; baza kuri mwebwe bambaye nk'intama; ariko imbere ari amabingira y'inkazi.

¹⁶Muzobamenyera ku vyo bama. Mbega hari uwokwamura inzabibu ku munyinya, canke insukoni ku bitovu?

¹⁷Nuko igiti ciza cose cama ivyiza, ariko igiti kibi cama ibibi.

¹⁸Igiti ciza ntigishobora kwama ibibi, kandi igiti kibi ntigishobora kwama ivyiza.

¹⁹Igiti cose kitama ivyiza kiracibwa, kigatererwa mu muriro.

²⁰Nuko muzobamenyera ku vyo bama.

²¹Umuntu wese amvumereza ati: “Mwami, Mwami;” si we azokwinjira mu bwami bwo mw'ijuru, atari uwukora ivyo Data wo mw'ijuru agomba.

²²Kuri wa musi benshi bazombwira, ngo Mwami, Mwami, ntitwavugishwa n'Imana mw'izina ryawe, ntitwasenda abadayimoni mw'izina ryawe, ntitwakora ibitangaza vyinshi mw'izina ryawe?

²³Ni ho nzobajinjiburira nti: “Nta ho nigeze ndabamenya; mviraho, mwa bakora ibizira mwe.”

²⁴Uwumva ayo majambo yanje wese, akayashira mu ngiro, asa n'umuntu w'umunyabwenge yubatse inzu yiwe ku rutare.

²⁵Isegenya iragwa, inkukura iratwaza, igihuhuta kirahuhuta, bisurira kuri nya nzu, ntiyagwa, kuko yari ishimangiye ku rutare.

²⁶Ariko uwumva ayo majambo yanje wese, ntayashire mu ngiro, asa n'umuntu w'imburabwenge, yubatse inzu yiwe ku musenyi.

²⁷Isegenya iragwa, inkukura iratwaza, igihuhuta kirahuhuta, bisurira kuri nya nzu, irasenyuka, kandi isenyerana ryayo riba irikomeye.

²⁸Yesu arangije ayo majambo yose, ishengero ritangazwa n'inyigisho ziwe,

²⁹kuko yabigisha nk'uwufise ububasha, ntase n'abahinga b'ivyanditswe babo.